Read Southern Rengma Naga JEREMIAH 19 Bible Online

JEREMIAH 19 - Southern Rengma Naga bible

JEREMIAH 19

¹Npugü le ano gü nnyonla nme hilo tse shü. A-le ano temi dan nyu pelü ju lo püshükeda when nyu dan tse peha zenlo,

²tson-o La keka Khinrun gü pfüthü sen-o Hinnon kazü ketejon nyu tsü gülo tse shü. Tsü nyu ano a-le khikeshü jo pe zoshü lotse.

³Npugü le ano hihontse zolo tse shü, “Juda raja dan lo Jerusalem temi dan, nyülo, Kekvutsin Npugü, Israel nyu Sunggigü le hagun ka zoti. Ale kenke zenryüo bin hinyu shüti; lo tsü nyü kelonyu aphu anyunzi tse lati.

⁴Ale tson shüti, temi dan le akhelao thape anyugun lo anyugun bonnyu lo Juda raja nyue shahü kemvu tero rüshvuo bin higü nrhukela genyu. Anyugun le kemu kendinyu zi tsun pe bin higü swü laso,

⁵anyugun le anyugun nyenyu rope kershvu thyü nrün genyu Baal kershvu bin thyü laso. Ale anyugun no tsü thyülo tse zomvu nmvue tsü le thame kae a nyun nyu yüryü mvule.

⁶Tsügenyu bin higü lope Topheth nmvue Hinnom ketejon letse ko nimvukela gwünkho le ryüti. Tsü sunka pe Dukeshvu bin ketejon gü letse lati.

⁷Bin hinyu ale Juda lo Jerusalem temi dan tharhi aphu pe lihi kemvu thyü shüti. Ale anyugun kenrhinyu no anyugun so kvulo-o terinyu anyugun gala ti. Tson-o ale anyugun simin lope tegü lo tehen thyü chvu thyü lati.

⁸Ale kenke ketetsin zenryüo nyida higü gen shüo tsü pvüthü gükethyü nyu aphu no tsü hyuo anyugun kerüo dun thyüti.

⁹Kenrhinyu le nyidagü hunlo-o a-temi dan boshvu titse ndoti. Anyugun hunkelo tsügü le kenrin kethyü genyu nyida nyu kebin nyu le khinyu nyu thyü lo anyenyu thyüe tyüti.”

¹⁰Tsüsika Npugü le ano azen gü kethyü danmhundyü ka nnyonla gü vükho shüo

¹¹anyugun ka kekvutsin Npugü le hihontse zobin tsonshü. “Ale temi hidan lo nyida higü vüshwen lati, lo tsüle nnyonla higü vükho shüo kensü nilo mvukela hontse lati. Anyugun kesun bin ndikela genyu Tophet nyue sunti.

¹²Ale nyida higü lo tsünyu keyhun nyu no Tophet hontsela titse zo laso.

¹³Jerusalem nyu ka dan, Juda raja dan ka, lo a-kanyu tharün kenyü rope shyenyü tero rüshvu lo zu lope tero kecha dan rüshvu kela nyu ka aphu lope Tophet nshünkemvu hontse shüti.”

¹⁴Tsüsika ale Npugü le anipe jünzo shülo tse nikeshü bin Topheth tsü nkenla. Ale güo Kershvuka jo kekerabin nyu solo-o temi aphu ka zo-o,

¹⁵Kekvutsin Npugü, Israel Sunggigü le zo binnyo, “Hagun nyunrüo ale zokeshü zenmvu kela genyu ale nyida higü lo a-kajon nyu dan gen shüti tse zokenjü shaja aphu zen ryüla tiso.”