Read Southern Rengma Naga JEREMIAH 2 Bible Online

JEREMIAH 2 - Southern Rengma Naga bible

JEREMIAH 2

¹Npugü, le ano,

²jolo higü pe Jerusalem nyu keyhun nyu aphu tephu shü lotse zo. “N ncheka ajo zenkehü, lo nnyi kami thyülo keri ka we a sosa kehü ale rüchün hü; nle kazü kesi ntsi gwenshü kemvu kie a sithen hü.

³Israel, nle ahon nti; nle a kanyü kenshün. N nthyü kehünyu gen ale kenjünkethyü lo kenke nishü hü. Ale Npugü, ale zoshü laso.”

⁴Npugü jo hi nyülo, Jakob tsipwen, Israel kami dan.

⁵Npugü le zo: “Hagun bonnyu le kenkhin jo nyu sen-o a ntsun la? Nyugenyu anyugun no akipon rani tinla la? Anyugun le kenrun kenrü teromen rüshvu tinlao thalihi kemvu nyu thyü laso.

⁶Anyugun le ashamvu, ale Ijipt nyu anyugun kenishwishü, lo tehen yhunkemvu ki, kazü kesi lo hachon, kesin lo kenshvu kazü temi nme-e yhun binkemvu lo nme-e njwen-e hü kemvu bin nyu anyugun tson rihüe.

⁷Ale anyugun zenryüo kazü kebwen nyushü, tson-o anyugun no a-sha kegwa lo kegwa kechae sen-o ketegvü nrün genyu. Ai anyugun le a kazü kecha la; ale khipe anyugun ketsü kazü nrhu laso.

⁸Peshükeda dan le, ‘Npugü le diki binla?’ tse shün mvü. A püshükeda ju le ashamvu laso. Kekvu kesen nyu le a nren; Sidyükeshanyu le Baal zan nyu jozo, lo kenrun teromen rüshvu tin laso.

⁹“Tsügenyu Npugü ahigü le kenyo jo pe atemi dan ntsun niti. Ale kenkhin jo pe anyugun nyenyu ntsunti.

¹⁰Sypra zü kehun kazü nkhün ki güta, lo temi peha nipe Kedar kazü nphon ki shülo. Hi mhundyü ki hihontse thyü mvuzun letse nle hyu loti.

¹¹Senye kecha nme-e a-tero kelu mvuzu le, anyugun le ketsin mvu yatse-e. Ai atemi dan we, kerhvu pe anyugun ketsügü Sunggigü a higü lope anyugun genyu thame thyüshü hükemvu tero kelu laso.

¹²Tsügenyu ale meno nshvu lo adunthyülo nrün genyu tsang no kenrin thyü nnun shü lotse zoshü hü,

¹³kechamvule atemi le kemu shahvu thyü laso: anyugun le zü kenshün kepünbin, ahigü nyu rani la, lo zü ndünlo keho zülvu tso laso.

¹⁴“Israel le donyu kemvu; a-no donyu thyü nrün genyu nnyulo mvule. Tsonlo nyu thyüo a-kenrhinyu le a-hü shyela sela?

¹⁵Tsüdan le shünyho hontse nho-o a-ketsun; anyugun le a-kazü thyü pe sila, lo a-rünyi dan kechalao kheshü laso.

¹⁶Ketsin, Memfi lo Tahpanhes temi dan le a-peru vükho laso.

¹⁷Israel, nle n npvü higü senryüo ngen shü laso! Hagun le Npugü hagun Sunggigü, ahigü khela, ale hagun tson ri kehü kae.

¹⁸Hagun le Ijipt nyu gü nyu nyu kechwi hyulo gwa letse hü nla? Nile zü tsüti tse ole? Hagun le Assiria nyu gü nyu nyu kechwi hyulo gwa letse hü nla? Eufrates zü tsüti tse ole?

¹⁹Ngwakemvu npvü shaja pe ntsüti, lo hagun le akipon ranikela genyu hagun nmu lati. Hagun le sha loti Npugü Sunggigü ahigü khekela le dihontse gwamvu lo thyüzü yo, lo ajokezen nyu binmvu kela le. Aphuso kekvu, kekvutsin Npugü ale zo laso.”

²⁰Aphuso kekvu Npugü le zo, “Israel, kethon gükela ka nle akekvu kenila; nle akhwen nyü lo arüshvu mvula. Rincho ketetso aphu gen lo senbin kenjvu aphu pha nyu nle keyüla terodan rüshvu tinla.

²¹Vain tsi kenshün, kejükho kelo hontse ale nkhipe sen shü le. Ai nle dihontsela seyo nri shülo! Nle vain renkela lo a-min kendi hontsela sele.

²²Nle Sabu kekvutsin pe nsü lae, Ale nkemu kerhu dan hyu loti.

²³Nle n npvü n nrhu mvu lo Baal rüshvu mvu letse dihontse zolo gwala? Kazü ketejon nyu nle mukela nrishü, nle nyu thyülayo shwi shülo. Nle Ut le chonyü chwikeryü ka, a-ronthyü a-ron pvüthü sen-o,

²⁴Kazü kesin ki tinla titse kebin hontse le. A-le chonyü chwiryülo segü le khinlo tila? A-tsegü le tsü füo kenjünthyü mvue gwa, a-le a-gwünkho ka a-nizin le bin hünyo.

²⁵Israel, npha nyü bin nya, nmvue nra tero kecha hüo ntero no sinla nyata. Ai nle, ‘Ale sin rünyi kecha zen-o keso bin lo ale tsüdan sithen ti, ale ranilo kemvui sele,’ ” tse zo hünyo.

²⁶Npugü le zo, “Kerühu nyu le mele a-tenlo lalo kejo lola kehü hontse hagun Israel nyu raja nyu, kedanyu, püshükedanyu lo sidyükeshanyu aphu kejo lati.

²⁷Senbin le hagun pvü lo tso le hagun jvu letse kehü aphu kejo pvü lati. Hagun le aki ryükethyü gü mvule rani tin kela genyu tsonti. Ai hagun le kenjünthyü kelo ka we ano ryü hagun kenilo lotse hi hünyo.

²⁸“Hagun le tero thyükelo dan tsüle dikipon hü nla? Tsüdan le hagun kenilo gwa yatselo hagun kenjünthyü kelo ka anyugun no hagun kenilota! Juda, n nyida kechon le kebin hontse ntero ko tson binle.

²⁹Nle nyu kenya hü nla? Nle nyuthyüo a nren hü nla?

³⁰Ale shaja pe ntsüshüe gwalomvu; nle ano nthyü kenjü shü mvu laso. Shünyho nyunkenta hontse ntemi sidyükeshanyu dushvula.

³¹Israel nyu, ale jokebin hi nyülo. Ale hagun genyu kazü kesi, kezün lo kenshvu kazü hontse thyüla ole? Tsonlo nyuthyüo hagun kenyü gü thyüo aki rani ryü mvu letse zo hü nla?

³²Nyegibennyu le a-kontyü nmhinla, nmvue shenhügi le a-sunkethyü kanyü rüchün mvüla logwa le? Ai atemi dan we jon swü lobukeho a nmhin laso.

³³Hagun le hagun sonyu sithen lo sha bin nyo. Tenunyu keshvutsin nyue hagun ka shalo gwa bin sele.

³⁴Hagun phinya le kerühu nyu zi mvuo kemu kendinyu lo rhokedyünyu zi lope nyün laso. “Tson yatse-e,

³⁵nle zo, ‘Ale mu mvule; Npugü le agen a-nyunta mvula sela.’ Ai nle mu mvu letse kela genyu Npugü, ahigü le shaja pe ntsüti.

³⁶Nle tsipwen kecha tero then tin kela genyu n npvü nthyü kenshe laso. Assiria nyu le nthyü pe shese kela hontse Ijipt nyu le ngen tson lati.

³⁷Hagun le Ijipt mhundyü nyu tinlao kejo pvü lati. Ale Npugü, hagun rüchün ngwa kehü khe laso; hagun le anyugun gen thame kechwi hyulo kemvui so.”