Read Southern Rengma Naga JEREMIAH 20 Bible Online

JEREMIAH 20 - Southern Rengma Naga bible

JEREMIAH 20

¹Immer nyugü Püshükedagü Pashhur, Kershvuka nyu kedatsingü le ale jo hidan zokebin nyülo-o,

²meno avüo aphin pe Benjamin Khinrun tesogü khoka Kershvuka nyu shüla lo tse ahza shüla.

³Lonyü gü Pashhur le akephin shwüshü kela siki ale a-ka zo-o, “Npugü le nzan lope Pashhur letse mvu. A-le nzen khikeshü le ‘Bin aphu ka kevükeben gü’ tseshüle.

⁴Npugü le a-npvü hihontse zoshü. ‘Ale nno n npvü ngen metse lo npvünyu gen metse kevükeben gü thyü shüti, lo nle kenrhinyu le zhethon pe anyugun aphu dushvukela hyuti. Ale Juda temi aphu lope Babilon raja kekvu hensin shüla titse bin, a-le temi peha zen-o a-kazü nyu dothyü tinla lo kecha dushvu lati.

⁵Ale anyugun kenrhinyu no nyida anyugun kenya aphu seülo lo anyugun hon aphu lo Judanyu raja dan kenyae aphu pvüo Babilon ki tsülati.

⁶Lo Pashhur, nle lo nkami-e aphu tün zen-o Babilon ki gü lati. Tsünyu nle silao pe nle kenku jo kechon pe zokela npvünyu dan sin-o sun lati.’ ”

⁷Npugü, nle asala, asa laso. Nle anyeki kvu, lo nle anye kvu laso. Temi aphu ashwinyü, lo jongwen atsin bin laso.

⁸Ano jozo keso aphu nra lo sen-o “Gwamvusa! Kenke!” tson nti laso. Npugü, ale njün kejo genyu gwünkho aphu ka mele a nshwen lo ashwinyü bin laso.

⁹Ai ale “Npugü nmhin lati lo a-zan nyu zoni mvuso” tse zo yatselo njo le anyunki mah le rokebin hontse lola gwenzin. Ale ayhenthyü kekhela titse ndo, ai matse binlo mvu.

¹⁰“Bin aphu kevükeben! Ngun a-rüla pe kekvukesen nyu ka zotesha la tile!” tson-o temi aphu phisinki zokebin nyübin laso. Apvünyu ketsin nyue ano chekela khwen bin laso. “A-salo kegwa thyü yatselo ngun a-tenlo-o khünlo tile” tse anyugun le zobin nyo.

¹¹Ai kekon lo Kekvutsin Npugü, nle aden zin hü, tsügenyu a nshwen kehünyu le che lati. Anyugun le kethonthen kejo pvü lati, anyugun le kvulo kemvui genyu. Anyugun kejokepvü le nmhinlo keho thyüti.

¹²Ai Kekvutsin Npugü, nle joketsinnyu ntemi nri hü nyo; anyugun nyun lo kerüchün nyu le bin yo nle sha. Tsügenyu ashwikerüchün nyu gen nle a khün lo keshü ano hyuta, kechamvule ale kenya nrün pe ntenyen kela genyu.

¹³Npugü gen ronlo! Npugü shwen! A-le gwakemvu nyu kemvu nyu mele nshwen kehünyu kenishwi shü kehü genyu.

¹⁴Akenyu jongü swetsü lo! Ajvü le annyu keshü jon nmhin lalo!

¹⁵Apvü ka, “Tsüle pechenyu le! Nle pechenyu hyulo laso,” tsonkethyü jolo senryüo Apvü no sherhün kelo temi gü swetsü lo!

¹⁶Temi tsügü no Npugü le shwinjün mvutse nkekela nyida dan hontse lalo. A-no lonyüe kethyü pvüo kechü khwen nyü lo nhenyue teri kenshvu khwen nyülo nda,

¹⁷a-le a nnyulo kemvu ka aboshvula kemvu genyu. Tson yatse kethyü we ajvu gin le asika thyüla nrün le.

¹⁸Nyuthyüo a nnyushüyo? Tsüle kenjünthyü lo nyunkenjünthyüo kejokepvü lope akeyhun keni thyüshü nrün genyu ole?