Read Southern Rengma Naga JEREMIAH 21 Bible Online

JEREMIAH 21 - Southern Rengma Naga bible

JEREMIAH 21

¹Juda Raja gü Zedekiah le Malkhiah nyugü Pashhur lo Maaseiah nyugü Zephaniah püshukedagü hvu no jo higü pe aka hilo tse nishü:

²“Ncheno-e agun genyu Npugü nthon shüta, kechamvule Babilon nyu rajagü Nebuchadnezzar lo a-rihüdan le nyidagü hunpvü bin laso. Npugü le agun genyu nduntho nme thyü shüo Nebuchadnezzar no ranila logwa le!”

³Tsüselo Npugü le aka zo, a-le nipe aki keshünyu dan no

⁴Zedekiah ka Israel Npugü le hihontse zo binle tse zola lotse shü, “Zedekiah, ale nrihüdan le Babilon nyu raja lo a-rihüdan zen-o kaga kebin dan tsü no kvulo mvu lati. Ale nshüpahü ju teri kanyü dan lope nyida chvu nyu kequen lati.

⁵Ale anyun kenta, nyunkenthün, nyunkekhü lo akekvu aphu pe nzen kenren ti.

⁶Ale nyida hinyu temi aphu ga lati, temi lo senru dan-e npen lati.

⁷Ai nle lo nhensin kedanyu, teri, chenda lo kethyü kenpen nyu nrho kelo nyu aphu tse Raja Nebuchadnezzar lo hagun kenrhinyu hagun boshvula nyü kebin nyu no tün zen tin lati. Nebuchadnezzar le hagun boshvu lati. A-le hagun nme-e nsen loho nmvue hagun shwinjün shüe kemvui. Ale Npugü, tsü zo laso.”

⁸Tsüsika Npugü le ano temi dan ka hihontse zolo tse shü, “Nyülo! Ale Npugü, ale nno kerhün lo kesi tson kejükekholo nrün pe ntsü bin nyo.

⁹Ligü higüe nyida gü nyu kebin nyu le teri nyu gala nmvue khünsi nmvue kenpen nyu siti. Ai seg"ü le chwigü nyida hunpvü kebin Babilon nyu ben nyu yüla yo tsü nyu boshvu loho; lo a-le kesi nrhilo gwa.

¹⁰Ale nyida higü nsen mvuo nkela titse rhilo laso. Tsü lope Babilon raja gü tsüla lo a-le tsü rope kemphü thyü lati. Ale Npugü, tsü zo laso.”

¹¹Npugü le ano jo higü lope David tsipwen, Juda kanyu zo lotse shü: “Ale Npugü, ale zokebin jo hinyülo. Khenyütsen joketsin senlo. Mele sa kebin nyu ju nopen-o a-sa kebin gü ben nyu kenishülo, hagun le tson mvula lo hagun le thyü kebin tho gwakemvu gü tsüle anyun gwün kekhün pe nmhüla hü kemvu mah hontse lati.

¹³Jerusalem, nle kazü ketejon sa tsothun hontse kazü ketejon nyu bin ketetso ki dunbin nle. Ai ale nzen kenrenti. Nle, temi nme-e nwhen lo chwida boren yüryü lo kemvui letse zohü nyo.

¹⁴Ai ale ntho dan genyu shaja pe ntsüti. Ale nkedabin rolati, lo mah gü le a-sühun kebin aphu rokü lati. Ale Npugü, tsü zo laso.”