Read Southern Rengma Naga JEREMIAH 22 Bible Online

JEREMIAH 22 - Southern Rengma Naga bible

JEREMIAH 22

¹Npugü le ano David tsipwen Juda raja bin nyu güo rajagü ka, a-hensin kedanyu lo Jerusalem temi dan no Npugü jo nyülo tse zoshülo tse zo:

³“Ale Npugü, ale joketsin lo kenjü gü thyü lotse hagun ka zohü. Me sakebin gü ben nyu mele a-sa kehünyu ntsen lo. Tesin rünyi ki keryünyu, tego nyu, nmvue maginyu nshwen nya; lo bin kenshün hinyu kemu kendinyu ga nya.

⁴Hagun le ajohokeshü hontse thyüketsin thyülo David senye le raja thyü binti. Lo anyugun, anyugun hensin kedanyu lo anyugun temidan le terigari lo keru gen bin-o kedabin higü Khinrun nyu gü loti.

⁵Ai hagun le ajohokeshü zen mvulo, kedabin higü nkela ti tse kethyü ale hagun ka swe bin. Ale Npugü, tsü zo laso.

⁶“Amhundyü nyu Juda kedabin le Gilead kazü lo Lebanon kazüthun hontse zegwa; ai ale tsü lope khekela kazü thyü lao meno yhunmvu lati.

⁷Ale tsü nkela nrün temi nishüti. Anyugun aphu nri penryüo Sedar sen pe kethyü kachon kezegwa dan phen pe mah nyu shwen lati.

⁸“Tson kethyü siki tesin rünyi kechon le tsü pfüthü güo khinyunyu ka nyu tse thyü Npugü ahigü le nyida higü gen hihontse layo tseti.

⁹Tson-o anyugun le tsüle hagun le hagun Sunggigü ahigü zen-o kejozenkelo khekela lo tero kecha rüshvuo tsüdan lothyü tinkela genyu letse zoti.”

¹⁰Juda temi dan, raja Josiah genyu chünya; a-kesi chechünya. Ai a-nyugü Joahaz genyu chü salo; anyugun le a-ten zen tin jü laso, lo rani kemvui so. a-kenyu kazü hyunilo hoso.

¹¹Npugü le Juda Rajagü Josiah nyugü Joahaz, a-pvü sun thyükelo gü rüla zohü, “A-le hinyu tin laso, lo rani loho.

¹²A-le mele a-ten zen tinkela kazü nyu sila o kazü higü hyuni lo hoso.”

¹³Njükemvu sen-o a-ka thyü lo joketsin kemvu nyu tsü thyükethün kehügü we thyülo tiso; anyugun le anyugun temi no kenrun nyu tha thyü tson-o tsüdan chün pe tsü hümvu.

¹⁴“Ale agenyu kahe kechacha gwasa lo nmhunsa tse thyü loti,” tse zokehügü we thyülo tiso; a-le tson-o sedar sen pe a-kanyu kafüphe chakegwa thyü, tson-o kenhon pe nyenla hü.

¹⁵Nle Sedar sen pe nka thyüpe kechanyu ka nyeki zegwa kela genyu nraja le gwakvula sele? Npvü le a-rhünthen a-kenyü loso. A-le a-zin tse joketsin lo kenshün nyu yhun, tsügenyu a-thakethyü aphu ka gwakenyelo.

¹⁶A-le kenjü nyu rhokedyü nyu jün kera lo a-phu a-zen kengü gwa hü. Npugü sha kehü tsüle tsü zohü nyo.

¹⁷Ai nwe tsenshvuo nkenyü kethyü nti hyu hünyo; nle kemu kendi nyu boshvu lo ntemidan nshwen hü nyo. Npugü le zo laso.

¹⁸Tsügenyu Npugü le Josia nyugü Jehoiakim, Juda rajagü rüla zo, “Temi nme-e a-kesi chechü, nmvue ‘Ketetsin le, apvügü, ketetsin sele!’ tson loho. Nme-e a-chechüo, ‘A npugü, A rajagü!’ tson-e loho.

¹⁹Gada pe kesun hontse a-süsen chwigü Jerusalem Khinrun ngwenzin shwen lati.”

²⁰Jerusalem temi dan, Lebanon ki güo sen lo, Bashan kazü ki güo nrashü; Moab kazüthun dan gen bin-o koshü lo, npvünyu aphu kvulo mvu kela genyu.

²¹Hagun le gwakenye kehü ka Npugü le hagun ka zo, ai hagun le nyü mvula. Tsüle hagun rhünthen thyükela tho; hagun le Npugü jo zen mvula.

²²Tsangkenbu le hagun sharhidan whün sen tin lati, lo npvünyu ju tsüle terinyu tenzen tin kela nyu hontse lati, hagun nyidagü le kemeni lo kejopvüla hagun tho gwakemvu dan aphu genyu.

²³Hagun le Lebabon ki sedar bin dan nyu bin-o kenshvu ndi bin, ai kethyü le hagun vükeshü ka hagun njün hoso, tsüle nyeginyu le nyukezen ka kenjün kethyü hontse ti.

²⁴Npugü le Juda raja Jehoiakim nyugü raja Jehoiachin ka zo, “Ale rhün kehü Sunggigü ketsin le, nle aben njüzin zenkero kekhin hontse bin-e ale nkhitholao

²⁵pe nle nshvukehü, nboshvula nyü kebin dan tsü lati. Ale nkhipe Babilon raja Nebuchadnezzar lo ashüpahü tsü lati.

²⁶Ale tenge tse nle lo njvü nipe me kazü nyu shü lati. Hai nnyu kemvu kazü ki gü lati, lo hai mihvu nren tsünyu siti.

²⁷Hai le kazü higü nrini shü nyü hoti, ai hai le rani kemvui so.”

²⁸Ale zo, “Raja Jehoiachin le la keka pe shwen lao mele lonyü mvu kela hontse sele? Tsügenyu a-le lo a-nyenyu ju zen-o anyugun le shahü kemvu kazü ki gü lale?”

²⁹O kazü, kazü, kazü! Npugü le zokeshü tsü nyü shüta:

³⁰“Temi higü nmupe a-nyenyu kendi nyu thyüla, lo thame kae gwakenye mvu lati. A-tsipwen nme-e David sunthyüo Juda nyu kesen mi ndi lati. Ale Npugü, tsü zo laso.”