Read Southern Rengma Naga JEREMIAH 23 Bible Online

JEREMIAH 23 - Southern Rengma Naga bible

JEREMIAH 23

¹Kekvu kesen nyu lihigüe a-temi nke lo hükezen kehü nyu gen Npugü le dihontse tsüdan ketso ryü tiso yono!

²Hile Npugü, Israel Sunggigü le a-temi ketsen kehü nyu rüla zokeshü: “Hagun le atemi nucha lomvu laso; hagun le anyugun hükezen la hüpe shwen laso. Ale hagun tho gwakemvu genyu shaja pe ntsü titse bin laso.

³Ale atemi hüpe tsipwen kecha dan ki shükela dan tsü kequenloti, lo ale anyugun zen niryüo anyugun kazü nyu shü kati. Tsüdan le temi nyhunlo lo chvukenye loti.

⁴Ale sharhi kejü pe tsüdan nucha loti. Atemi dan le nshvu nmvue kekerü thyü sin mvuso, tson-o ale shaja pe anyugun tsü ni kemvui so. Ale Npugü, tsü zo laso.”

⁵Npugü le zo, “Ale David tsipwen kentsen nme kejü pe raja thyü nrün gwünkho le ryüjü. Raja tsügü le nyuyhünsa tse kekvu sen, lo kenjü lo joketsin nyu kazü gü ketsenti.

⁶A-le raja thyü kelo ka Juda temi le kenshvu ndi lo Israel nyu le yhunbwen loti. A-lo pe ‘Npugü Ngun kenikelo gü tse koti.’

⁷Npugü le zo, “Temi dan le alope Ijipt kazü nyu Israel temi zen chwikeryügü rhün kehü Sunggigü letse zo-o swe mvu kela gwünkho le ryüjü.

⁸Tsü sunka, a lope tesozin kazü lo ale anyugun hükezen kela kazü aphu nyu anyugun zen gunkeryü gü kerhün Sunggigü letse swe tin lati. Tsüsiki anyugun npvü anyugun kazü nyu yhun loti.”

⁹Anyun boshwen laso, lo ale ndün bin laso. Npugü genyu, a-jo kenshün dan genyu, ale zu tsü rüchelao kenzeü nyu hontse, zu tsüsa kela nyu hontse laso.

¹⁰Kazü gü le Npugü nyu joketsin sen kemvunyu le swü laso; anyugun le serimvu lo anyugun kekvue senkecha bin laso. Npugü shochün genyu kazü gü le chechü lo tehen le rügu binso.

¹¹Npugü le zo, “Sidyükesha nyu lo püshükedanyu le yhun nshün mvula; A nyugun le kershvuka nyu gwakemvu thyükebin ale tenlo laso.

¹²Tsügenyu anyugun tson no nshwü lo zün lati; Anyugun no pha nsüo ntoti. Ale kenke zenryüo anyugun gen shüti; anyugun shaja gwünkho le ryüjü. Ale Npugü, tsü zo laso.

¹³Ale Samaria sidyükeshanyu kemu hyu: anyugun le Baal zan ka zo lo atemi tson tsinzü laso.

¹⁴Ai Jerusalem nyu sidyükeshanyu we gwamvu kvu kethyü ale hyu: anyugun le keyüla nkula hünyo; tsüdan le temi keche pe thyü züla, meno gwakemvu kethyü khelalo mvu. Anyugun le amhundyü nyu Sodom lo Gomora gwakemvu hontse laso.

¹⁵“Tsügenyu, Npugü kekvutsin Ahigü le Jerusalem nyu sidyükeshanyu rüla kezo le hi: Ale tehen kekhü pe anyugun tsüo no tyü lo terün pe anyugun no tsüti, anyugun le Sunggigü shakemvu tho pe kazü a phu nyu shükela genyu.”

¹⁶Kekvutsin Npugü le Jerusalem temi dan kazo, “Sidyükeshanyu le zokehü tsü nyünya gwen; anyugun le sidyü kepho pe hagun ka zosa bin nyo. Anyugun le ajogü mvule anyugun npvü rüchün kelo pe hagun ka zohü nyo.

¹⁷Anyugun le ajo nyümvu kela nyu ka anyugun genyu gwa gun loti letse zo hünyo. Lo anyugun le nyun kerünyu ka kenke le a-gen ryü kemvui letse zo hünyo.”

¹⁸Ale zo, “Sidyükeshanyu hidan nme-e Npugü kerüchün sha shwi mvu. Tsüdan nme-e a-jo nyü, nmvue shamvu, lo a-le kezo jo rühvue shwimvu le.

¹⁹A-nyun kenta le tsangkenbu terhi gwakemvu hontse serikemvu nyu gen ryüti,

²⁰lo tsüle ryülo a-le thyüti tse kebin aphu thyüla kemvu then khe loho. Kenkhin ki a-temi dan le higü kon sha tsentsü lati.”

²¹Npugü le zo, “Ale sidyükesha hidan nishü mvu, tson-e tsüdan le güla. Ale jo nme-e pe anyugun tsümvu, ai anyugun le azan nyu zo.

²²Anyugun le akerüchün sha yatse kethyü we ajo pe atemi ka zo-o anyugun no yhun kecha kehü lo serikemvu thyü kehü dan khela lo zü.

²³“Ale bin aphu ka kehü Sunggigü, ale bin nme nti kahümvu.

²⁴Nme-e ale hyulo keho bin ki kebulo kemvui. Ale tsangge lo kazü nyue bin aphu nyu bin tsekethyü hagun le shamvu ole?

²⁵Sidyükesha tsüdan le a-nyugun minki ale jolo khipe anyugun tsü letse nkuo zo kehü dan tsü ale sha.

²⁶Sidyükesha tsüdan le anyugun npvü rhikelo tsü sen-o dithen ki atemi tsontsinzü bin mon?

²⁷Anyugun pvü bonnyu le anmhinlao Baal ki gükela hontse anyugun min pe zokeshü dan tsüno atemi dan thyü pe a nmhin loti ado tse rüchün hü.

²⁸Sidyükeshanyu a-minki shakelo nyu le tsüle nmin gwenzin letse zo mvu loshvu; ai ajo nyükelo sidyükeshanyu no ketsin thyüo zoshü mvu loshvu. Npenkon lope thoshye kendyülo gwa ole?

²⁹Ajo le mah hontse, lo kejonvü hontse tsonye-e jonshwen lahü.

³⁰Ale sidyükeshanyu le khinyu nyu jo lolo-o tsü lope ajo letse zokehünyu ntsun hü.

³¹Lo sidyü keshanyu segü le a-npvü zoshüo pe ajo letsela hüyo ale tsü nyu ntsun hünyo.

³²Ale Npugü, ajo nyülo! sidyükeshanyu kenku min nti zokehünyue ale ntsun hü. Anyugun le anyugun min zo lo kenku jodan lo kemakin-o atemi tsontsin kecha hü. Ale anyugun ni nmvue hukum pe tsüo no gü lotse mvu; lo anyugun le atemi keche khe-e lomvu le. Ale Npugü, tsü zo laso.”

³³Npugü le aka zo, “Jeremiah, keshanyu ka atemi, nmvue sidyükeshanyu nmvue püshükedanyu nmele nka, ‘Npugü jo nyu le binla,’ tson shün lo nle a-ka, ‘Nle Npugü khvu kensu nme laso, lo a-le nkhela tiso’ tse zo lalo.

³⁴Atemi, nmvue sidyükeshanyu nmvue püshükedanyu nmele ‘Npugü khvu kensu’ jo tsü zohülo ale shaja pe temi tsügü lo a-kami-e tsüti.

³⁵Tson mvule nmeme tse a-pvünyu lo a-shvunye ka, shün-o ‘Npugü le nyu zonishü yo’ ‘Npugü le nyu zoshüla’ tsonlo lo.

³⁶Tsügenyu anyugun le ‘Npugü khvu kensu’ tsekethyü jo tsü zoni nyala mvu loshvu, tson yatselo ale ajo lope a-khvu kensu ketsin thyü shüti. Temi dan le anyugun Sunggigü, kerhün Sunggigü, Kekvutsin Npugü jo zo kekhen laso.

³⁷Jeremiah, sidyükesha dan ka, ‘Npugü le nyu zope kenishüla? Npugü le nyu zola?’ tse shün shülo.

³⁸Lo anyugun le a johokeshü zen mvulao ‘Npugü khvu kensu’ tson yatselo anyugun ka zolo

³⁹ale ketsin thyü anyugun süshwila lo ale pe anyugun lo anyugun bonnyu ketsü nyida gü tse pe nithen ki shwen lati.

⁴⁰Ale kethonthen nmhinlo keho kejokepvü lo kemeni kethyü zenryüo anyugun gen shü lati.”