Read Southern Rengma Naga JEREMIAH 24 Bible Online

JEREMIAH 24 - Southern Rengma Naga bible

JEREMIAH 24

¹Npugü le kherosha rokhu shahvu pe kershvuka mhundyü nyu shükenjü pe ahishü. (Tsü le Babilon raja Nebuchadnezzar le Jerusalem nyu Juda nyu rajagü Jehoiakim, nyugü Jehoiachin lope Judanyu sharhi dan, tha zü keshanyu lo tha thyükeshanyu dan tün zen-o Babilon ki dothyü tinkela siki.)

²Rokhu kerigü le kherosha nyün kerikegwa dan; lo kechagü ka gwakemvu, tyülo keshvu nti le bin.

³Tsüselo Npugü le aka shün, “Jeremiah, nle nyu hyu binla?” Ale a-kazo, “Kherosha. Kegwa dan le gwasa, lo gwakemvu dan we gwamvu ritsin, tyülo shvu le.”

⁴Tsügenyu Npugü le aka zo,

⁵“Ale Npugü Israel Sunggigü, ale Babilon ki zentin keladan tsüle kherosha kegwa hidan hontse letse rüchün hülo, lo ale bwen-o tsüdan nuchati.

⁶Ale anyugun khwenlo lo zen niryüo kazü hinyu shüni lati, Ale anyugun penshe lo penso shüti. Ale anyugun senshüti, anyugun phüla loho.

⁷Anyugun no ale Npugü letse shalo kenyü nyun pe tsüti. Tson-o anyugun le atemi thyü lo ale anyugun Sunggigü thyüti, anyugun le anyugun kerüchün aphu ranio aki ryü kela genyu.

⁸“Juda raja Zedekiah, a-hun kebin sharhi dan, Jerusalem temi hinyu kebin dan lo Ijipt ki gü kela nyu metse Npugü ahigü le anyugun lope kherosha tyülo shvusa kethyü hidan hontseti.

⁹Ale kazü aphu no kerü kethyü kenke zenryüo anyugun gen shüti. Temi dan le anyugun shwinyü, anyugun zope kenrin thyü, anyugun kemeni, lo ale anyugun hükeshü bin aphu nyu mele anyugun zan zope shochün nme hontseti.

¹⁰Ale khipe anyugun lo anyugun bonnyu ketsü kazü nyu temi nme-e ndila kemvuthen ale teri, chenda lo kempün zenryüo shü binti.”