Read Southern Rengma Naga JEREMIAH 25 Bible Online

JEREMIAH 25 - Southern Rengma Naga bible

JEREMIAH 25

¹Josiah nyugü Jehoiakim le Juda raja thyükelo chen zi gü ka, ale Npugü ka Juda nyu aphu genyu jolo hyulo. (Tsüle Nebuchadnezzar le Babilon nyu raja thyükelo chen.)

²Ale Juda lo Jerusalem temi aphu ka zo,

³“Amon nyugü Josiah le Juda raja thyükelo chen tseryü kenshan gü ka ryüo nthu keti chen nki kenshen hi Npugü le aka zo, lo a-le aka nyu zoyo ale pe hagun ka zomvu lamvu. Ai hagun le tsü rüchün shümvu.

⁴Npugü le a-go sidyükeshanyu nipe hagun ki shüzin ryü, ai hagun le nyümvu lo rüchün-e mvu laso.

⁵Tsüdan le hagun no serikemvu nyu lo tha gwakemvu nyu ranilo-o Npugü le kazü pe hagun lo hagun bonnyu ketsü tsü lope kethonthen hagun hon thyüo yhun tinla lotse zo.

⁶Tsüdan le hagun no tero kecha rüshvu lo tsü dan lothyü nya nmvue hagun ben pe kethyü teromen kezü tsü rüshvuo Npugü no a-nyunta nyalo tse zo. Hagun le Npugü jo zen yatse kethyü we a-le shaja pe hagun tsü mvu nrün.

⁷Ai Npugü le a-npvü hagun le a-khwen nyü mvula letse zohü. A-khwen nyü kelo gü mvuo hagun teromen kezü rüshvuo a-nyungwün kekhenlao hagun npvü shaja gü zenryüo hagun gen shü laso.

⁸“Tsügenyu, hagun le a-khwennyü mvu kela hontse kekvutsin Npugü le zo,

⁹‘Ale tesoki temi aphu lo agogü Nebuchadnezzar, Babilon rajagü nishüti. Ale tsüdan zenryü Juda lo tsünyu keyhun nyu, lo a-tekehun tsipwen dan zen kegati. Ale tsipwen higü lo a-tekehun dan nke lo khepe kenrin lo kerükeshvu thyü lati. Ale Npugü, tsü zo laso.

¹⁰Ale anyugun le senhü kehonyu shekerhün khwen thyü lo a-nyugun kenyüo nra kebin tsü khin lati. Anyugun mah kenben khin nyu mah zü ndi lati, lo shye ndi lati.

¹¹Kazü higü apentha nkepe bin lati, tson-o nripe kerüshvu kethyü nme thyü shüti, lo a-tekehun tsipwen dan no chen hentsenyü Babilon raja go thyüti.

¹²Tsüsika ale Babilon lo a-raja kemu genyu shaja pe tsüti. Ale tsipwen tsü nke lo tsü no kethonthen nkepe bin lati.

¹³Ale tsipwen dan kedün-o zenryü titse kebin kenke dan Jeremiah ka zo-o lesü hinyu thu kenjü jodan tsü lope Babilon gen shüti.

¹⁴Ale Babilon le thyü keshü thodan pe a-tsü ni shüti, lo tsipwen kechon lo raja keda dan le anyugun lope gonyu thyüti.’ ”

¹⁵Npugü, Israel Sunggigü le akazo, “A nyukekhü pe sü kethyü zu honpen nme le hinyu bin. Higü sen-o ale nnikeshü tsipwen dan ka güo anyugun no tsü tsülo.

¹⁶Anyugun le tsügü tsükelo ka kezeü kego lo nnu lati, ale teri nipe anyugun ntsunti tse kebin gü genyu.”

¹⁷Tsügenyu ale Npugü ben nyu honpen gü khilo-o a-le anikeshü tsipwen aphu ka güo anyugun no tsü nyu tsülo.

¹⁸Jerusalem lo Juda rünyi aphu, tsünyu raja lo sharhi dan khelao meno yhun mvulao kenrin thyü lo kerükeshvu thyü lo meno ntsoka zokehü hontse anyugun zan jope shochün nme thyü kela genyu anyugun no honpen tsügü tsülo.

¹⁹Hinyu zan thu kethen kenjü dan hile honpen gü nyu tsüti: Ijipt rajagü a-hensin keda lo sharhi ju; Ijipt temi aphu lo tsünyu sin ryü nikebin aphu; Uz kazü nyu raja aphu; Filistine nyida Ashkelon, Gaza, Ekron, dan ka raja ju lo Ashdod nyu kebin dan; Edom, Moab lo Ammon temi aphu; Tur lo Sidon raja aphu; Mediterranean kazü nyu raja aphu; Dedan, Tema, lo Buz nyida dan; ape thu kezü thyükela dan aphu; Arabia raja aphu; kazü kesi ki kebin raja aphu; Zimri, Elam lo Midia raja aphu; tesokipon, nithenki lo a-khoka kebin nmeme tse keserio tsonti. Kazü nyu kebin tsipwen aphu tsünyu tsüti. Kenkhin tsingü Babilonia raja le tsü nyu tsüti.

²⁷Tsüselo Npugü le aka zo, “Kekvutsin Npugü, Israel Sunggigü, Ahigü le temi aphu no nzeüo nyugwen lo nto-o somvula kemvuthen tsülo tse johoshü binle tse temi dan ka zoshülo, tsüle ale teri nishü titse kebingü genyu.

²⁸Lo anyugun le nben nyu honpen gü khipe tsü mvula yatse ai, Kekvutsin Npugü le zo laryü anyugun no tsügü tsü kethyüi letse zoshülo.

²⁹Ale a npvü arünyi nyu kenke tho bin zenti. Anyugun kerüchün we kenjünkethyü teno mvutse binlo gwa letse hüle? Anyugun le kenjünkethyü teno ti, kechamvule ale teri nipe kazü temi aphu gen shüti tse bin. Kekvutsen Npugü, ale zo laso.

³⁰“Jeremiah, nle ale kezo aphu pe zomvu loshvu. Nle temi hidan ka zomvulo shvu, ‘Npugü le tsangge nho-o ryüti, lo tsang teso ki tsangsen shüti. A-le nrao a-temi ntsunti; a-le temi nmele sen-o vain sha kedü kethyü hontse ti. Kazü nyu temi aphu a-khwen nyüti,

³¹lo a-khwen tsüle kazü keni ki aphu nyü loti. Npugü le senyedan ntsun nrün kerajo nme bin. A-le temi a-phu zen ryüo kegwakeshvu nrio serikemvu dan no silati. Npugü le zo laso.’ ”

³²Npugü le zo, kenke le senye nmeme tse gen ryüti, lo tsangkenbu terhi le nithen ki kazü keni ki kegwen bin laso.

³³Tsü jon nyü Npugü le boshvukela simin dan le kazü qün nme zin gun gü kecha kipon keti bin lati. Nme-e tsüdan chechü loho, lo pe sun kemvui. Tsüdan le kazü gen methuvü hontse nthun binti.

³⁴Chülo, sharhidan, nra tetsolo, me kentsennyu dan! Kemphü nyu yhon-o chechü lo. Hagun boshvula nrün gwünkho le ryüla, lo hagun lope tanyü hontse dushvu lati.

³⁵Hagun le thame kae nrhi keloi tson ndi.

³⁶Hagun le shekese nyu hagun nyungwa kemvu khwen thyüo nra hü, Npugü le a-nyunkenta nyu hagun senye nkela lo hagun kebwen tsipwen gü nkeo khekela genyu.

³⁸Npugü le a-temi khepe shünyho le a-kü khekela hontse laso. Teri kenshvu lo Npugü nyunkenthün gwakemvu gü le kazü gü thyüpe kazü kesi nme thyü laso.