Read Southern Rengma Naga JEREMIAH 26 Bible Online

JEREMIAH 26 - Southern Rengma Naga bible

JEREMIAH 26

¹Josia nyugü Jehoiakim le Juda raja thyülo ntsin,

²Npugü le aka zo, “Kershvuka gü nyu solo-o ale nno zolo tse ahza hokeshü aphu pe Juda rünyi dan ki Npugü rüshvu titse ryü kebin dan ka zolo. Thame nsen nya.

³Temi dan le nyüo anyugun tha gwa kemvu khelo-e shalo keho genyu. Anyugun le tsonlo yatselo anyugun tha gwakemvu aphu genyu ale kenke zenryüo anyugun gen shü titse rhikebin gütsü kelu lati.”

⁴Npugü le ano temi dan ka hihontse zolo tse shü, “Npugü, Ahigü le zo, hagun ale senkethyü jo pe hagun ketsü then,

⁵lo agogü, sidyükeshagü, ale a-nipe hagun ka shüzin kehügü jodan kezen nyu akhwen nyülo. Hagun le anyugun le zokeshü nyü hü mvu.

⁶Hagun le zo zen kemvu nyu bintse yatselo, ale Shiloh ka thyükeshü gü tsü Kershvuka higü ka ko thyü shüti, lo kazü nyu senye aphu nyida higü zan zope shochün nme hontse tin lati.”

⁷Peshükedanyu, sidyükeshanyu, lo temi aphu ale Kershvuka nyu tsü zokebin nyü,

⁸lo Npugü le ano zolo tseo anikeshü jodan aphu zopenlo ntsin, anyugun le asülo lo nrasen-o, “Higü genyu nboshvula zü le!

⁹Nle nyuthyüo Npugü zan nyu zo-o Kershvuka higü le Shiloh hontsela lo nyida higü nkelao temi nme-e tsü nyu yhunkemvui letse hü nla?” Tsüselo temi danda le ahun lola.

¹⁰Juda nyu sharhidan le tha thyükela tsü nyükelo ka nyhun-o rajabin nyu tin sen-o Kershvuka nyu güo Khinrun keshüngü ka anyugun bin thyülo.

¹¹Tsüselo Peshükedanyu lo sidyükeshanyu dan le sharhi dan lo temi dan kazo, “Temi higü no sila lotse penla züle, kechamvule a-le ngun nyidagü kenkhin jozo. Hagun le hagun nyetin pe nyülo laso.”

¹²Tsüselo ale zo, “Npugü le anishüo ale jo zope Kershvuka higü lo nyida higü nkhinkeshü hagun le nyülo kela dan tsü ano zolo tse shüle.

¹³Hagun le hagun keyhun jvu lo hagun le thyükehü dan tsü kelula, tson-o Npugü hagun Sunggigü jozen mvuloshvu. Hagun le tsonlo yatselo a-le kenke zenryüo hagun gen shü titse kebin nyu tsü a-nyunkelu lati.

¹⁴Agenyu we ale hagun kekvu hensin nyuso! Akhipe hagun le njü lo gwale tse rüchün kelo gü tsü thyülo.

¹⁵Ai higü sha tsentsülo: hagun le aboshvula yatselo, hagun lo nyida hinyu temi dan le kemu kendinyu boshvu kela genyu muti, kechamvule Npugü le ano kenshvu jo higü pe hagun tsülo tse nishü.”

¹⁶Tsüsika sharhinyu lo temi dan le püshükeda lo sidyükesha nyu ka zo, “Temi higü hile Npugü ngun Sunggigü zan nyu ngun ka jo zole; tsügenyu a-boshvula zü mvule.”

¹⁷Tsüsika pelü peha le so-o temi kequen kebin dan kazo,

¹⁸“Hezekia le Juda raja thyüketse ka, Moresheth nyu sidyükeshagü Mika le temi aphu ka kekvutsin Npugü le zokeshü jo pe zo, ‘Zion lope low hontse pho la, Jerusalem le nke kenjü kanyü nme thyü lati, lo Kershvuka thun le chün thyü lati.’

¹⁹Raja Hezekia lo Juda temi dan le Mika boshvula mvu. Tson kethyü mvule Hezekia le Npugü nshvuo a-kenyügü thyü titse hü. Lo Npugü le kenke zenryüo tsüdan gen shü titse zokenjü nyu tsü a-kerüchün kelula. Ngun le kenke ketetsin zenryüo ngun gen shüti tse bin laso.”

²⁰(Temi kecha nme, Shemaiah nyugü Uriah, Kiriath Jearim temi ko Npugü zan nyu jozo-o nyida higü lo senye higü nkhin-o Jeremiah hontse shü.

²¹Raja Jehoiakim, a-shüpahü lo a-hensin keda ju le Uriah le kezo tsü nyükelo ka rajagü le a-boshvula ti tse ndo. Ai Uriah le tsü nyülo la; tsügenyu a-le nshvuo Ijipt ki tsüla.

²²Raja Jehoiakim le Akbor nyugü Elnathan lo temi peha no Ijipt ki Uriah zenlo lo tse nishü.

²³Anyugun le a-zen niryüo Raja Jehoiakim tsüshü, lo a-le tsügü boshvula, lo asimin shwen pe sika lanyu shüla.)

²⁴Ai awe Shaphan nyugü Ahikam le ano penkeshü genyu akhipe temi dan tsüo boshvukela thyü mvu.