Read Southern Rengma Naga JEREMIAH 27 Bible Online

JEREMIAH 27 - Southern Rengma Naga bible

JEREMIAH 27

¹Josia nyugü Zedekiah le Juda raja thyülo ntsin, Npugü le aka zoshü,

²ano tesen pe gundakekhen thyülo, lo thyügi phun thyülo-o pe agunda dyülo lotse zo.

³Tsüselo Npugü le aka zo-o ano jolo nipe Edom, Moab, Ammon, Tur lo Sidon dan ka rajadan ketsü pe anyugun sun thyüo Jerusalem ki raja Zedekiah shwi titse keryünyu dan tsüshü lotse shü,

⁴Kekvutsin Npugü, Israel Sunggigü, le ano anyugun ka Npugü le kezo jo pe raja dan ka zoshü lotse shü,

⁵“Akekvu keda lo kenko nyu ale kazü lo temi rhen shü, kazü so nyukhu nyhunshü; lo ale tsüdan tsüpe ale kejükelonyu lihigü tsü hünyo.

⁶Senye aphu lope agogü Nebuchadnezzar, Babilon rajagü kekvu hensin nyu shükela gü tsüle ale, lo ale tehenthyü dan-e no a-lothyüle.

⁷Senye aphu a-lothyü, lo anyugun le a-nyu lo a-nyugü nyu lothyü gun gü a-senye le chekela gwünkho le ryükemvuthen tsonti. Tsü siki a-senye le senye lo raja keda dan lothyüti.

⁸“Ai senye nmvue rajaphen lihigüe a-kekvu hensin bin mvula lo, ale Nebuchadnezzar no senye tsügü nkebula kemvuthen ale teri, kekhün lo kethyükenyü pe senye tsügü nthyüti.

⁹Hagun temi sidyükeshanyu nmvue lihigüe a-le ryü kejü rüla jolo gwa letse kehünyu, minki nmvue kesinyu kapu nthon nmvue jadu thyü kehü nyu khwenyü nya. Anyugun aphu hagun no Babilon hensin yünya lotse hü.

¹⁰Tsüdan le hagun sahü lo meno hagun zen-o nithen ki gü lati. Ale hagun hüshwi lati, lo hagun le nke lati.

¹¹Senye lihigüe Babilon raja hensin bin lo a-lothyü yatselo, ale tsügü no a-kazü nyu bin-o low tsüo yhun loti. Ale Npugü, tsü zo laso.”

¹²Ale tsühontse pe Juda raja gü Zedekiah kae zo, “Babilon raja gü hensin binlo. A-le lo a-temi lothyülo, tsonlo nle rhün loti.

¹³Nyuthyüo nle lo ntemi le teri, kekhün lo kethyü pfüo sila mon? Tsüle Npugü le zo-o senye lihigüe Babilon raja hensin bin kemvu gü gen thyüti tse zo njü.

¹⁴Babilon raja hensin yünya lotse kezogü sidyükeshagü khwen nyü nyalo. Tsü dan le hagun sahü nyo.

¹⁵Npugü le a-le tsüdan nishü mvu ai anyugun le a-zan nyu hagun sabin letse zo. Tsügenyu a-le hagun hüshwila lo hagun boshvu lati, hagun lo sidyükesha nyu hagun ka kenku kezodan kope sin.”

¹⁶Tsügenyu ale püshükedanyu lo temi dan ka Npugü le hihontse zohü letse shü: “Sidyükeshanyu hagun ka zo-o thonsa mvutse Kershvuka kenya dan tsü Babilon kipon sen niryüla titse zokehü tsü nyünya. Tsüdan le hagun ka nkuhü.

¹⁷Anyugun khwen nyünya! Babilon raja hensin binlo, tsonlo hagun le yhun loti! Nyuthyüo nyida higü no nke la mon?

¹⁸Anyugun le sidyükeshanyu ketsin lo ajolo le bin yatselo, anyugun no kekvutsin Npugü, aka hio, Kershvuka gü nyu lo raja bin nyu kenya kebin tsü no Babilon nyu sentin nyata...

¹⁹(Nebuchadnezzar, raja gü le Juda raja Jehoiakim nyugü Jehoiachin, lo Juda lo Jerusalem sharhi kentsen dan tenzen-o Babilon ki tinkethyü ka Kershvuka kachon, lazo pe kethyü zükhin, gari lo Kershvuka kanyü peha tse khela.)

²¹“Kekvutsin Npugü, Israel Sunggigü, Ahigü le kanyükegwa Kershvuka nyu lo Jerusalem nyu raja ka nyu khekela rüla zo kebin hi nyüshü.

²²Tsüdan sen-o Babilon nyu güla lo ale anyugun füryü kemvuthen tsünyu binti. Tsüsiki ale tsüdan sen niryüo bin hinyu kequen loti. Ale Npugü, tsü zo laso.”