Read Southern Rengma Naga JEREMIAH 28 Bible Online

JEREMIAH 28 - Southern Rengma Naga bible

JEREMIAH 28

¹Tsüchen, Zedekiah le raja thyükelo chenzi gü shye pvüngü ka, Azzur nyugü Hananiah, Gibeon rünyi nyu sidyükeshanyu nme le Kershvuka nyu aka zo, Peshükeda nyu lo temi dan le kebin ka a-le

²Kekvutsin Npugü, Israel Sunggigü le zo, “Ale Babilon raja gü kekvu khi laso.

³Chenhvu joka ale Kershvuka gü kanyü, raja Nebuchadnezzar le sen-o Babilon ki tin kela dan a phu sen niryüo bin hinyu shü lati.

⁴Ale Juda raja, Jehoiakim nyugü Jehoiachin lo Babilon ki do thyütin kela aphu tse zen niryüti. Ketsin, ale Babilon raja kekvu thyükenmhe lati. Ale Npugü, tsü zo laso.”

⁵Tsüselo püshükedanyu lo temi dan Kershvuka nyu kebinnyu aphu mhundyü nyu ale Hanania ka zo;

⁶“Ndunthyü! Npugü le higü thyüti tse ale nrinbin! Ale nrin kebin gü le a-le nsidyüjo gü tsü thyü pen-o Kershvuka kanyü aphu lo do thyü tin kelanyu aphu Babilon nyu zen niryü lati.

⁷Ai ale hagun lo temi dan ka kezo nyüshü.

⁸Kethon gükela ka sidyükeshanyu le agwünkho lo hagun gwünkho le ryükemvu ka zo-o teri, kekhün, lo kethyü le senye kechon lo rajaphen kekvu dan gen ryüti tseshü.

⁹Ai sidyükesha lihigüe kengükegwa rüla zo njü-o a-le zokenjü tsü hontse thyüpen kelo siki nyu a-le Npugü le ketsin thyü nikeshü sidyükeshanyu le tse sha loti.”

¹⁰tsüsika Hanania le agunda ka gundakekhen khitho pe boren la,

¹¹lo temi aphu mhundyü ka zo: “Npugü le zo-o a-le hihontseo raja Nebuchadnezzar le pe senye aphu gunda nyu shükenjü gundakekhen boren lati; lo a-le chenhvu joka tsü thyü lati.” Tson-o ale tinla.

¹²Gwenkho peha siki Npugü le aka

¹³gü Hanania ka zoshülo, “Npugü le zo, nle tesen gundakekhen boren logwa, ai tegi gunda kekhen pe tsüsun thyü lati.

¹⁴Kekvutsin Npugü, Israel Sunggigü le zo-o a-le tegi gundakekhen nme pe senye hidan aphu gen shü lo anyugun le Babilon raja gü, Nebuchadnezzar lothyü ti. Npugü le a-le tehenthyüe thyüpe no Nebuchadnezzar lothyü titse zo njü.”

¹⁵Tsüselo hi lope Hanania ka zo, lo zosin-o, “Nyülo, Hanania! Npugü le n nishümvu, lo nle temi hidan thyü pe kenku nme tenyen bin nyo.

¹⁶Tsügenyu Npugü le zo-o a-le nkhela titse bin laso. Chen higü le güla kemvu ka nle silati, kechamvule nle temi dan no Npugü ntsunlo tse zokethyü genyu.”

¹⁷Lo Hanania le chen tsügü shye tsenyü gü ka sila.