Read Southern Rengma Naga JEREMIAH 29 Bible Online

JEREMIAH 29 - Southern Rengma Naga bible

JEREMIAH 29

¹Ale lesü nme thupe püshükedanyu, sidyükeshanyu, temi sharhi ju lo Nebuchadnezzar le Jerusalem nyu tenzen-o Babilon ki dothyü tinkelanyu aphu tsüshü.

²Ale raja Jehoiachin lo a-jvü, raja hensin kedaju, Juda lo Jerusalem nyu sharhidan, tha zükeshanyu lo tha chakeshanyu aphu zen-o dothyü tinkela siki lesü higü thu.

³Ale lesü gü tsü pe Shaphan nyugü, Elasah lo Hilkiah nyugü, Gemariah, Zedekiah, Juda raja gü le nipe Babilon raja Nebuchadnezzar ki shükebin hvu ben ka shü. Tsüle hihontse:

⁴“Kekvutsin Npugü, Israel Sunggigü le Nebuchadnezzar no Jerusalem nyu zen-o Babilon ki tinkela nyu aphu ka zobin:

⁵‘Ka thyüo binlo. Chwi thyüo tsü nyu hyukelo tsü tyülo.

⁶Sunthyüo nyu nyhunlo. Lo hagun nyenyu no sunthyülo, tson-o tsü dan ko no nyu nyhunlo nrün genyu. Hagun le yhun chvu mvu loshvu lo rhola loshvu.

⁷Ale hagun no gü medo thyükebin nyida dan genyu kegwagü tha thyülo. Anyugun sunka aka hilo, kechamvule anyugun le gwakenye lo hagun ko gwakenye loti.

⁸Ale Npugü, Israel Sunggigü, hagun zen-o hagun danyu sidyükesha nyu nmvue lihigüe ryükejü rüla zolo gwa letse kehünyu no hagun salamvu nrün genyu petsülo. Anyugun min tenyennya.

⁹Anyugun le azan nyu kenku pe hagun ka zobin. Ale anyugun ni shü mvu. Ale Npugü, tsü zo laso.’

¹⁰“Npugü le zo, ‘Babilon genyu chen hentsenyü penlalo, ale hagun phinrüchün kehü pe hishü lo ale zokenjü then-o hagun zen niryüo kanyu shü lati.

¹¹A nti le hagun genyu rhikenjü dan sha, tsüle kenke mvuo gwakenye kethyü tharhi, siki genyu hagun le nrin kehü.

¹²Tsonlo hagun le ako soti. Hagun le ryüo aka hiti, lo ale hagun kehi kenishü ti.

¹³Hagun le afüo ahyu loti, hagun nyun aphu pe shüo afü nrün genyu.

¹⁴Ele, hagun le ahyu loti tse ale zo, lo ale hagun zen niryüo hagun kazü nyu shü lati. Ale hagun hüpe shükela tsipwen lo bin aphu nyu hagun kequen lo, lo hagun zen niryüo ale hagun hüpe dothyü tinkela kazü gü nyu tsü shü lati. Ale Npugü, tsü zo laso.’

¹⁵“Hagun le Babilon nyu Npugü le sidyükeshanyu pe hagun tsü letse zo.

¹⁶Npugü le rajaphen David le ketsen keryü so gon kebin raja gü lo hagun zen-o dothyü tinkemvu hagun shvü nye, nyida higü nyu kebin nyu rüla kezo nyüshü.

¹⁷Kekvutsin Npugü le zo, ‘Ale teri, kekhün lo kethyü zenryü anyugun gen shü, lo anyugun thyüpe kherosha tenpe tyülo shvu kela hontse lati.

¹⁸Ale teri, kekhün lo kethyü khipe anyugun thenti, lo kazünyu senye aphu anyugun kehyu gü tsü genyu kershvu lati. Lihikae ale anyugun khikezen la, lo temi dan le tsüdan gen thyükeshü tsü nrio nshvu lati. Temi dan le anyugun shwinyü lo anyugun zan zope shochün nme hontse ti.

¹⁹Hile anyugun gen thyüti, kechamvule anyugun le ale jolo khipe agonyu sidyükeshanyu gen shüo nipe anyugun tsüzin kehü zenmvu. Anyugun le nyü nyü mvula.

²⁰Hagun ale nipe Babilon ki do thyüshükela nyu aphu Npugü Ahigü le zokebin higü nyüshü.’

²¹“Kekvutsin Npugü, Israel Sunggigü le Kolaiah nyugü Ahab lo Maaseiah, nyugü Zedekiah hvu le a-zan nyu kenku hagun ka zokehü rüla zoshü. A-le au lope Nebuchadnezzar, Babilon raja gü ben nyu shüla, lo hagun yhühyu ka au boshvu lati.

²²Lo Jerusalem nyu zen-o Babilon nyu dothyü tin kela temi dan le shochün pe temi peha ketsü ka hihontse zoti, ‘Npugü no nkhi pe Zedekiah lo Ahab, Babilon raja gü le kerhün pe rokela hontse thyü shüta!’

²³Tsü lope au rüla thyüti, kechamvule au le ketetsin kemu thyüla-- au le keyülao Npugü zan nyu kenku zola. Tsüle Npugü kendo gü ntsunla; au le nyuthyü layo Npugü le sha, lo ale tsü shao au ntsun hünyo, Npugü le zo laso.”

²⁴Kekvutsin Npugü, Israel Sunggigü le Nehelam temi gü Shemaia genyu jolo nme pe atsü, temi tsügü le a-npvü a-zan nyu lesüthu pe Jerusalem temi aphu, lo püshükedagü Maaseiah nyügü Zephaniah lo püshükedanyu kecha aphu tsü. Lesü tsügü nyu Shemaiah le thu pe Zephaniah tsüo,

²⁶“Npugü le nlope Jehoiada sunka püshükeda thyü laso, lo nle ntsoka we Kershvuka nyu kedagü laso. Nle kenunyu lihigüe sidyükeshanyu letse kehü gü tegiron pe dyü lo tegi pe agunda senla kethyü tsüle ntho so.

²⁷Nyuthyüo tsühontse pe Anothoth temi gü Jeremiah ge thyü mvula? A-le sidyükeshanyu nme hontse temi dan ka jo zo hüle?

²⁸A-khinla mvulo shvu, a-le Babilon nyu kebin nyu ka anyugun le tsünyu dothyüthonti, tsügenyu ka thyüo tsünyu yhun, chwithyüo tsünyu tha hyukelo dan tyü lotse zohü.”

²⁹Zephaniah le lesü tsügü swüpe azen

³⁰lo Npugü le aka zo-o

³¹Babilon nyu donyu aphu ka Shemaiah jolo rüla pe nishülo: “Ale Npugü, ale Shemaiah lo a-tsipwen aphu shaja pe tsüti. Ale a-nishümvu, ai a-le sidyükeshanyu nme rothyüo hagun no kenku jo tenyen hü. A-le hagun dan nyu yhun loho. A-le yhun-o ale atemi dan genyu thakegwa thyü titse kebin gü hyu loho, kechamvule a-le anyugun no a ntsun lotse zokethyü genyu. Ale Npugü, tsü zo laso.”