Read Southern Rengma Naga JEREMIAH 3 Bible Online

JEREMIAH 3 - Southern Rengma Naga bible

JEREMIAH 3

¹Npugü le zo, “Keshanyu laka temi nmele anu khelao tsügi le pechenyu kecha nu thyü tinla yatselo, tsügi zen nilo kemvui. Tsühontse kethyü tsüle kazü nrhu ritsin kelai. Ai Israel, nle n sonyu kechon le binlae aki ni ryü titse bin-e la!

²Rinchothun dan nri shüta. Tsünyu nle keyüla tho thyükemvu bin le bin ole? Arab nyu le kazü kesi ki me nke titse khwenbin kehü hontse hagun le tsonte ka bin-o hagun sonyu khwen bin hü nyo. Hagun keyüla tho le kazü nrhu laso.

³Tsügenyu tsangri shü mvu laso, lo tsenbwe ki-e tsangri mvu laso. Hagun kenri-e keyüla hontse laso; ai hagun we kejo binmvu.

⁴“Tson-o ntsoka we nle aka, ‘Nle apvü, nle a nchekanyu asohü laso.

⁵Nle azintse nnyunta bin kemvui; nle kethonthen a nthyü bin loho.’ Israel nle tson zo hünyo, ai nle gwakemvu aphu thyü laso.”

⁶Josiah le raja thyü ketse ka, Npugü le aka zo, “Nle Israel, nyeginyu serikemvugi le nyu thyüla yo hyu semon? A-le a kipon rani tingü rinchothun gen lo senbin pha aphu nyu keyüla nyu tho hontse thyü laso.

⁷Akerüchün we a-le tsü aphu thyükela siki aki niryü tsentsü letse bin. Ai a-le ni ryümvu, lo a-sikezengi, joketsin senkemvu Juda le tsü aphu hyula.

⁸Israel le a kipon rani gü keyüla kela genyu ale a-khekela tsüe Juda le hyu. Ai Juda, joketsin senkemvu Israel sikezengi le nshvulo mvu. A-ko keyüla tinla,

⁹lo kejo mvu shüla. A-le kazü gü nrhula lo tso lo senbin dan rüshvuo keyüla tinla.

¹⁰Tsü aphu thyükela siki, joketsin senkemvu, Israel sikezengi Juda le aki ryü kerokon, a-nyunketsin thyü mvula. Ale Npugü, ale zo laso.”

¹¹Tson-o Npugü le aka zo, Israel le akipon rani tinlae a-we joketsin senkemvu Juda nye gwa letse zo.

¹²A-le ano Israel ka hihontse zolo tseshü, “Joketsin senkemvu Israel, aki rani ryüla lo. Ale meshwi njünsa hü, lo anyunta kemvui le; ale kethonthen ngen anyunta bin mvuso.

¹³Nle kemu thyüo n Npugü Sunggigü nren la sele tse lata. Nle ale ahza khikeshü zenmvula lo senbin pha aphu nyu sin rünyi kecha terodan zen-o kesola seletse zoshwilalo. Ale Npugü, tsü zo laso.

¹⁴“Joketsin senkemvuju, rani ryülo; hagun le ahon le. Ale hagun rünyi nme ka temi nme lo kami nmeka mihvu tse khilo-o zen niryüo Zion kazüthun gen shüti.

¹⁵Ale ajo zenkehünyu no hagun so gonti, lo anyugun le kensü lo shakekho kethyü sen-o hagun ketsenti.

¹⁶Tson-o hagun le kazü tsügü nyu chonsa kelo ka ale kejozenkelo khinpha rüla kenthon sin mvulati. Anyugun le tsü rüla rüchün mvula lo nmhinlati; anyugun le tsü senmvue gwa, lo kechae thyümvu lati.

¹⁷Tsü gwünkho le ryülo, Jerusalem lope ‘Npugü Kedakhün’ letse kolati,lo senye aphu tsünyu arüshvu titse ryüti. Tsüki we anyugun nyunkerü lo gwakemvu le thukeyhun chwikeryü thyükemvuiso.

¹⁸Israel le Juda zen-o kerhün lati, tson-o kazü tero kipon yhuntinkelanyu aphu kerhün-o ale khipe hagun bonnyu ketsü kazü gü nyu ryüo kethonthen gwen loti.”

¹⁹Npugü le zo, “Israel, ale n lope anyu thyü nyü lo nyunkenyü kazü pe ntsüti, kazü aphu nyu kazü kezegwatsin. Ale nno apvü,tse ako nyü lo akipon ranila nyü mvu.

²⁰Ai nle joketsin senkemvu me nunyu hontse aka joketsin senmvu laso. Ale Npugü, tsü zo laso.”

²¹Rincho thun ki tha khwen nyülo: tsüle Israel nyu kechü lo kehi khwen, kechamvule anyugun le kemu nyu yhun tinla lo anyugun Npugü Sunggigü nmhinla.

²²Ryülo, hagun Npugü kipon rani tinkela nyu aphu; a-le hagun thyü ngwa shüo hagun no joketsin kesennyu thyü loti. Hagun le hihontse zo, “Ele, agun le Npugü ki ryüjü nle, a-le agun Sunggigü genyu.

²³Agun le rinchothun dan ka tero kecha kershvu genyu agun keche lomvu shüle. Israel nyu ke keche le Npugü, agun Sunggigü kipon nti ryü hü nle.

²⁴Ai kejokepvü tero, Baal kershvu genyu, tsüle nduka agun bonnyu le thyükenjü, agun senru dan, lo agun nyenyu peche lo tenu lo tha aphu tse nke bula so.

²⁵Ngun kejo-o nkhün tsü gü kemeni no ngun jelo lalo. Ngun lo ngun bonnyu le azintse mu pe Npugü ngun Sunggigü nren; ngun le a-khwen nyümvula sele.”