Read Southern Rengma Naga JEREMIAH 30 Bible Online

JEREMIAH 30 - Southern Rengma Naga bible

JEREMIAH 30

¹Npugü, Israel Sunggigü le,

²aka zo, “Lesü nme nyu ale nka zokeshü aphu thulo,

³kechamvule ale a temi Israel lo Juda zen nilo nrün gwünkho le ryüjü laso. Ale anyugun zen niryüo ale khipe anyugun bonnyu ketsü kazü gü nyu shü lo anyugun le tsü lo niloti. Ale Npugü, tsü zo laso.”

⁴Npugü le Israel lo Juda temi dan ka zo:

⁵“Ale kechü khwen kenrin nme nyü, tsüle nyunkebwen mvuo kenshvu kechü khwen.

⁶Sun-o rüchün shü! pechenyu nme le nyu zenlo gwa le? Tsonlo nyuthyüo ale peche aphu a-ben pe a-ginda gen shüo tenunyu nme nyukezen genyu kenjünthyü kebin hontse hyu binla? Nyuthyüo temi aphu kesinyu mhun hontsela sela?

⁷Kershvu kethyü jon nmele ryüjü; jon kecha nme-e pe tsü kendyü loho-- atemi genyu kenjün thyüsa kethyü le ryüjü, ai anyugun le rhün loti.”

⁸Kekvutsin Npugü le zo, “Tsü jon le keryü ka ale anyugun gunda ka gunda kekhen boren la, lo anyugun kedyüron tsü khi la, tson-o anyugun no sin rünyi go thyüsin mvu lati.

⁹Tsü sunka anyugun no Npugü anyugun Sunggigü ahigü, lo David tsipwen nme, ale penso pe raja thyüshü nrün gü lothyüti.

¹⁰“A temi dan, nshvu nyalo; Israel temi dan, hagun kerü lanya. Ale kazü nithen ki hagun le dothyü kebin kazü nyu tsü hagun kenishwi shü lati. Hagun le ka ki niryüo yhun bwen loti; hagun le nyun le keho ndio bwen nye loti, nme-e no hagun thyüpe nshvu loho so.

¹¹Ale hagun ki ryüo hagun keni loti. Ale senye dan, ale hagun hüpe keshü bin dan aphu nke lati, ai ale hagun we nrho shüti. Ale hagun no shaja thyü mvutse khela loho ai ale shaja pe hagun gen keshü ka kenjü nyu thyüti. Ale Npugü, tsü zo laso.”

¹²Npugü le a-temi dan ka zohü, “Hagun tejünshvu dan tsüle ponlo ho, hagun tejün dan tsü le gwa loho.

¹³Hagun nuchalo kegwa nme-e ndi, hagun kethyüshvu dan thyü ngwalo kegwa ndi, hagun thyükesherhünlo kegwa kenrin ndi.

¹⁴Nzen keso kehünyu aphu n-nmhinla, anyugun le nsüsin mvu laso. Ale nlope kenrhinyu hontse nwhen; n shaja le gwamvu rila,, kechamvule nkemu chonri lo ngwakemvu le gonsa kela genyu.

¹⁵N tejün dan genyu kenyasin nya; Gwakeloi ngenyu ndiso. Ale hihontse shaja pe ntsü, kechamvule nkemu le kechon lo ngwakemvu le gonsa.

¹⁶Ai ntsoka we hagun nke kehünyu aphu no nkela, lo hagun kenrhinyu aphu dothyü tin lati. Hagun nshwen kehünyu aphu meno anyugun nshwen la, lo hagun nke kehünyu aphu no nkelati.

¹⁷Ale hagun thyü ngwa nilati, Ale hagun tejünshvu thyü ngwa shüti, hagun kenrhinyu le, ‘Zion le khe kela nme so; nme-e a-sümvu laso,’ tson yatse-e. Ale Npugü, tsü zo laso.”

¹⁸Npugü le zo, “Ale atemi dan zen niryüo anyu kazü nyu shüla lo anyu kami nmeme shwi njün shüti; Jerusalem thyü nila, lo a-rajabin sen niryü lati.

¹⁹Temi tsünyu kebin nyu le keshwen lü thyüti; a-nyugun le shekerhün genyu senti. Ajochü genyu anyugun le chonkenye lo; ajochü le kerhvu zen ryüo anyugun tsüti.

²⁰Ale nduka senye gü kekvu zen niryü lo tsü thyü nkosa nishü ti. Ale shaja pe anyugun nshwen kehü nyu aphu gen shüti.

²¹Anyugun kekvu kesengü le anyu npvü anyu senye nyu ryüti, anyugun raja gü le anyugun temi le ti. Ale a-ko shülo a-le akho n niti, kechamvule koshü kemvu segü le pecheo ryü mon? Anyu le atemi thyü, lo ale anyugun Sunggigü thyüti. Ale Npugü, tsü zo laso.”

²³Npugü nyunkenthün tsüle tsangkenbu terhi, tsang nbusa tse gwakemvu nyu gen güla titse kehü gütsü. Tsüle a-le thyüti tse kebin gü thyüla kemvuthen ndila kemvui. Jon kenkhin ki a-temi dan le tsü sha tsentsü loti.