Read Southern Rengma Naga JEREMIAH 31 Bible Online

JEREMIAH 31 - Southern Rengma Naga bible

JEREMIAH 31

¹Npugü le zo, “Gwenkho le ryüjü, tsüjon tsünyü ale Israel tsipwen aphu Sunggigü thyü, lo anyugun le atemi thyüti.

²Tehen nyu ale shwikenjün lope kesi nken kelonyu tesha shü. Israel temi le kerüyü nnyü keso ka,

³ale nithen ki bin-o anyugun yhühyu thyüshü. Israel temi dan, ale azin hagun sohü le, tsü genyu ale sozin kehü pe hagun hi gun ti.

⁴Gwengwa ale hagun penso nishü ti. Gwengwa hagun le tamburin khilo-o sherhünsa tse da thyü niti.

⁵Gwengwa hagun le Samaria rincho dan ki vain low sen niti, lo tsü low ketsünyu le tsü sha lü tyüti.

⁶Ele, gwünkho le ryüjü, tsünyü rikhun nyu le Efraim rincho ki sen-o zoti, ‘Ngun Zion ki Npugü Ngun Sunggigü ki gü tile.’ ” tseti.

⁷Npugü le zo, “Israel genyu sherhün-o lü thyülo, senye dan nyu kedatsingü tsü. Hagun le shwen kehü lü tsü thyülo, ‘Npugü le a-temi kenilo laso; a-le khekela nyu aphu kenishwi loso.’

⁸Ale teso kipon anyugun zenryü lo kazü keni ki anyugun kequen loti. Yhükepo lo phayhon nyu le anyugun kengü ryüti, nyuphu kepvünyu lo nyuzen gü kejü nyue ryüti. Anyugun le senye keda thyü niryü ti.

⁹Atemi dan le ale anyugun tsontsin zen rani keryü gwen chü lo kehi thyüo ryüti, Ale anyugun tsontsin zen-o rinyu zü ki tsonda kenshwü anyugun pha nsülo keho nyu tsüti.

¹⁰Npugü le zo, “Senye dan, akhwen nyülo, tson-o ajo pe nithen ki zü seki tephu shülo. Ale atemi dan hükezenla, ai ale anyugun kequen nilo la lo tanyü kekhwen nyu le a-tanyü rikhun kehü hontse anyugun rikhun loti.

¹¹Ale Israel temi hoshü la, lo senye kekvu nyu ben nyu anyugun keni lo laso.

¹²Anyugun le ryüo Zion kazüthun gen shekerhün genyu lü thyüti lo ajochü dan sen-o anyugun kenyü ti-- tsüle shyeni, vainzu lo oliv terzü jochü, tanyü lo methu jochü dan. A nyugun le zü le ntsen kegwa thyükelo chwi hontse ti; anyu sen mvulo keshvu aphu hyu loti.

¹³Tsüselo lünyu ju le da thyüo anyugun kenyü loti, lo pechenyu, selo lo kethen nyu le shekerhün thyüti. Ale anyugun nyun thyü nbwen shü lo anyugun nyungwakemvu kelu pe shekerhün thyü shü, lo anyugun nyunkenjün kethyü pe nyunkenyü thyü shüti.

¹⁴Ale chvü kegwatsin pe püshükedanyu kesü thyüshü lo atemi sen mvulo keshvu aphu pe kesükela thyü shüti. Ale Npugü, tsü zo laso.”

¹⁵Npugü le zo, “Rama nyu thakhwen nme nyülo, tsüle chüsa kethyü khwen. Rachel le a-nyenyu chechü bin; anyugun le ndi laso; lo a-le nyun bwen lomvu la.

¹⁶Chüsin nya gwen lo nyhüphu shonla. Nle nnyenyu genyu thyükeshü dan tsüle a-chün ndila loho; anyugun le kenrhinyu kazü nyu rani ryü lati.

¹⁷Siki n genyu kenrin nme bin; nnyenyu le kaki ni ryü lati. Ale Npugü, tsü zo laso.

¹⁸“Ale nyükelo Israel temi le nyun gwamvuo hon zobin, ‘Npugü, agun le senthyülo kemvu nyukhu hontse hü ai nle agun senthyü pe jo zenlo le, Agun zen nigü lalo; agun le rani nki ryüla titse binle, Npugü agun Sunggigü.

¹⁹Agun le nkipon rani tinla, ai agun le nmhe rani ryüla nyüle. Nle shaja pe agun tsu kela siki agun le nyunkenjün thyüo nkhün tsüla. Agun le kejopvü lo kemeni hü, kechamvule agun selo ka mukela genyu.’

²⁰“Israel, nle anyugun aso ketsin, anyu ale sotsin kehügü. Ale nzan zokeshü ka, ale keso nyu nrüchün hü. Anyun le nki güla hü; ale nshwi njün sati.

²¹Zensü penso pe tsonkesha thyülo; hagun le khekela tson gü tsü fü nilo. Tson-o niryü lo, Israel temi dan, hagun le bin hüo tinkela rünyi nyu ryülo.

²²Dithen ki kesedun bin mon, joketsin sen kemvu temi dan? Ale tha keshün lo kecha nyhun laso, tenunyu nme le pechenyu nokhin kebin hontse.”

²³Kekvutsin Npugü, Israel Sunggigü le zo, “Ale temi dan zen niryüo anyugun kazü nyu keshü ka, anyugun Juda kazü lo a-rünyi nyu gwengwa hihontse zo niti, ‘Npugü no jochüpe Jerusalem rincho kenshüngü tsülo, a-le kehü kenshün bin gü tsü.’

²⁴Temi dan le Juda nyu a-rünyi aphu ka yhun hüti, lo loketsü nyu lo tanyükhwenyu le anyugun tanyü dan zen-o binti.

²⁵Ale a-tson nzin kehünyu gwenkesherhün lo nnyon-o kvumvu kehünyu ketyüketsü pe kesüthyü shüti.

²⁶Tsügenyu temi dan le hihontse zoti: ‘Ale jütsüo sherhünsa tse soryü laso.’

²⁷“Npugü, Ahigü le zokethyü le, gwünkho nme le ryüjü, tsüka ale temi lo nyukhue pe Israel lo Juda kazü sü shüti.

²⁸Lo ale petsüo a-mephü, süshye, shwenla, lo nkekela lo rhokela hontse ale petsüo anyugun pe sen-o thyü nso shüti.

²⁹Tsü gwünkho le keryü ka temi dan le hihontse zosin mvu lati, ‘Pepvü nyu le vainsha keshon tyü, Ai anyenyu le a-hü ntsen.’

³⁰Tson kethyü gü mvule vainsha keshon ketyü nyule a-hü ntsenti; lo nmeme tse aphu a-kemu genyu silati.”

³¹Npugü le zo, “Gwenkho nmele ryüjü, tsü nyü ale Israel lo Juda temi dan zen-o kejozen keshün thyüti.

³²Tsüle kejozenkelo whengü ale Ijipt kazü nyu anyugun bonnyu ben süzen chwikeryü ka zen-o thyükelo hontse mvuso. Ale anyugun nyepvünyu nme hontse hü, ai anyugun le kejozen kelo tsü gü zenmvu kela genyu.

³³Kejozenkelo keshüngü ale Israel temi zen-o thyü nrüngü tsüle hihontse ti: Ale atejvu lope anyugun nyun ki shü lo pe anyugun nyun gen thuti. Ale anyugun Sunggigü lo anyugun le atemi thyü ti.

³⁴Nme-e a-pvünyu senthyü pe Npugü shalo titse mvu lati; kechamvule a-phu asha lati, keshentsin ka gü kedatsin keti. Ale anyugun kemu jüla, lo ale anyugun thyükezüdan rüchün sinmvu lati. Ale Npugü, tsü zo laso.”

³⁵Npugü le yhüko lope nhenyu keben thyü, Shye lo shyenyü pe kheje gwen ben lotse khishü. A-le zida kenyo shüo ts"le nho; a-zan le kekvutsin Npugü le.

³⁶A-le zoshwi keshü le n yhunkeshü dan hile kebin then, Israel le tsüthen senye nme thyüti.

³⁷Keshanyu ka khenyüme jon thyü tsang ndo logwa, lo kazü keni fübu logwa yatselo, tsüki nyu a-le Israel temi keni lati anyugun le thyükeshü aphu genyu. Npugü le zo laso.

³⁸Npugü le zo, “Gwenkho güle ryüjü, tsü ka Jerusalem aphu anyida hontse thyü ni lati, Hananel tsokhwen nkhünzin gü a-quen Khinrun gü keti.

³⁹Lo terhi tsongü le tsünyu zin nkhün ki gü Gareb rincho lo hunsen gü Goah ti.

⁴⁰Kazü ketejon gü aphu, kesi pe sun lo kerhu pe shwen kehübin, lo Kedron rinyu sokipon low dan aphu gungü Keru Khinrun ka gü npho keti, tsüle agenyu kenshün bin thyüti. Nyida gü le thame kae boren nmvue nke sin lo hoso.”