Read Southern Rengma Naga JEREMIAH 32 Bible Online

JEREMIAH 32 - Southern Rengma Naga bible

JEREMIAH 32

¹Npugü le Zedekiah le Juda raja thyükelo chen tseryü gü ka a nthon, tsüle Nebuchadnezzar le Babilon raja thyükelo tseryüo tetse chen.

²Tsü gwünkho ka Babilon raja rihü le Jerusalem whenbin, lo raja ka jokera bin nyu akhin pe bin njü.

³Raja Zedekiah le a nkhin lo a nmuo aten pe dothyü la, ale hihontse zo keshü genyu Npugü le zo, “Ale Babilon rajagü no nyida higü lo lati,

⁴lo raja Zedekiah le tinlo kemvui. A-lo pe Babilon nyu raja ben nyu shü lati; a-le mhuntsun a-hyuo a-ka jo zoti.

⁵Zedekiah zen-o Babilon ki güla, lo ale a-teno kemvuthen tsünyu binti. A-le Babilon nyu zen kegae, a-le kvuloho. Ale Npugü, tsü zo laso.”

⁶Npugü le aka kezole,

⁷anyo Shallum nyugü Hanamel le ano Benjamin kazü nyu Anathoth ka a-low heilo lotse aki ryüti kechamvule ale a-kho nnisa kethyü shvunye nme, lo a-low hei pe ahon thyülo kezü genyu.

⁸Tsüselo Npugü le kezo hontse Hanamel le jokerabin nyu aki ryüo ano a-low heilo tse zo, Tsügenyu Npugü le aka joketsin thyüla letse shalo.

⁹Ale Hanamel ka low gü tsü heilo-o pisa swüpe a-tsüshü; a-min le rakagi tseryüo tsenyü.

¹⁰Ale azen thu lo thatho nyu tsü mohor vüla, lo shahu thyülao pisa pe kesükü ka ndalo.

¹¹Tsüselo tha kehei lesü shahvu nren khilo-- tsüle mohor kevü lesü gü a-kon a-jvü thu kenjü, lo pe mehi nrün lesü gü--

¹²tson-o pe Baruk tsüshü, a-le Neriah nyu a-bon le Mahseaih. Ale tsü lope Hanamel lo low heikelo lesü nyu shahu thyüo zenthu keshü nyu lo jokerabin nyu dun kebin nyu dan yhühyu nyu pe a-tsüshü la.

¹³Anyugun aphu mhundyü nyu ale Baruk ka,

¹⁴“Kekvutsin Npugü, Israel Sunggigü le nno thathyükelo lesü dan hi khilo tse laso, tsüle low heikelo mohor kevu lesü lo mehi nrün lesü gü, tsü khipe nnyonla nyu shüla, tsü no chen kethon kie ntsenlo nrün genyu.

¹⁵Kekvutsin Npugü, Israel Sunggigü le kezo le kazü higü nyu ka, low lo vain low dan hei niti.”

¹⁶Ale low heikelo lesü tsüpe Baruk tsükela siki ale hio,

¹⁷“Aphuso kekvu Npugü, nle nkekvu kengin nyu tsang lo kazü rhenshü; thame ngenyu tsensa kethyü ndi.

¹⁸Nle sozin kehü pe temi yie yie teshahü, ai nle temi dan pepvünyu kemu genyu shaja pe anyugun tsüshü hü nle. Nle gon lo kvusa kethyü Sunggigü le; Nle Kekvutsin Npugü le.

¹⁹Nle petsüo tharhi lo tha kekvudan thyü hünyo, nle temi dan tha thyükehü aphu hyu, tson-o nle anyugun tho hontse techün pe tsühü.

²⁰Nduka nle Ijipt nyu ndun kethyü lo tha zansü thyü, lo nle nthu keti Israel nyu lo senye kecha dan nyu metse tsü thyü zin bin, Tsügenyu ntsoka we lihikae nsha loso.

²¹Nle nduntho kekvu dan lope agun kenrhinyu kedünla lo nle nkekvu kengin sen-o Ijipt nyu ntemi dan zen chwiryü.

²²Nle anyugun bonnyu ka zo kenjü hontse kazü keyhün kegwa lope anyugun tsü laso.

²³Ai anyugun le kazü hinyu ryükelo siki anyugun le njohokeshü zenmvu nmvue nle senkethyü then-o yhunmvu; anyugun le nle thyülo tse keshü nme-e thyümvu. Tsügenyu nle kenke hi aphu zen ryüo anyugun gen shü laso.

²⁴“Babilon temi dan le tsokhwen pe nyidagü hun-o tsü lotitse anyugun le tsü whenbin. Teri, kekhün lo kethyü kenyü genyu nyidagü no anyugun ben nyu yü lati. Hagun le zokenjü aphu ryükela hyulo gwa.

²⁵Ai kekvutsin Npugü, nle nyida higü hile Babilon nyu le lola mabin-e ano shahu dan mhundyü nyu low gü heilo lotse ahza khikeshü gü tsüle nle le.”

²⁶Tsüselo Npugü le aka zo,

²⁷“Ale Npugü, temi aphu Sunggigü. Thame agenyu tsensa kethyü ndile.

²⁸Ale nyida higü lope Nebuchadnezazr, Babilon raja gü lo a-rihüdan tsüla titse bin; anyugun le tsü lolao

²⁹mah pe ro lati. Lo anyugun le mah pe temi dan le ka soki tharünkenyü rope Baal rüshvu lo zu pe tero kecha dan kershvu thyüo ano nyunta kela ka dan tsü kesin-o ro lati.

³⁰Anyu rüla kerika nyu Israel lo Juda temi dan le anyugun tho nyu akenyükemvu thyüo ano nyunta hüle.

³¹Nyida hinyu temi dan le tsü thyülo nyeka nyu ano anyunta lo nthün hü. Ale tsü nkela titse rhilo,

³²Juda lo Jerusalem temi dan tho gwakemvu aphu genyu lo anyugun raja lo sharhidan, anyugun püshükeda lo sidyükeshanyue sin.

³³Anyugun le akipon rani tinla, lo ale anyugun senthyü so ryüe, anyugun le nyüo shalo nyü mvula.

³⁴Anyugun le kentsükenchen teromen kezüe pe a rüshvu titse thyükelo Kershvuka nyu shüo tsü bo nrhu.

³⁵Anyugun le Hinnom ketejon nyu kershvubin thyü pe Baal tsü, tsünyu anyugun nyenyu pe Molek tero rüshvu nrün genyu. Ale anyugun no tsü thyülo tse shümvu, lo anyun kie anyugun le tsühontse thyüo Juda temi thyüpe mula nrün rüchün-e mvule.”

³⁶Npugü, Israel Sunggigü le a ka zo, “Jeremiah, temi hidan le kezo le teri, chenda lo kethyükenyü le nyida higü thyü pe Babilon rajagü ben nyu yüla kethyüi letse bin. Tsügenyu ale nyu zotiyo tsüko nyüshü.

³⁷Ale anyunnta lo nthün-o atemi dan hükezen pe shükela tsipwen aphu nyu temi dan kequenla titse bin, lo ale anyugun zenryüo bin hinyu shü ni lo anyugun no kenshvu ndi-o hinyu yhun ti.

³⁸Tsüselo anyugun le atemi thyü, lo ale anyugun Sunggigü thyüti.

³⁹Ale kerüchün nme nti khipe anyugun keyhun nyu shü lati: tsüle anyugun no gwünkho aphu arühvu-o anyugun genyu kegwa lo anyugun tsipwen genyu kegwa thyüti.

⁴⁰Ale anyugun zen-o kethonthen kejozenkelo thyüti. Ale anyugun genyu thakegwa thyü mvula loho, lo ale anyugun no a-nyu nyun aphu pe a nshvuti, tson-o anyugun no akipon rani tinla mvu nrün genyu.

⁴¹Ale anyugun genyu thakegwa thyü nyü ti, lo ale kazü higü nyu anyugun genyu binzin lo ndo kegwa thyüshü lati.

⁴²“Ale kenke zenryüo temi hidan gen shükela hontse, ale thakegwa zope binkenjü dan aphu pe anyugun tsü lati.

⁴³Temi dan le kezo le kazü higü le kazü kesi temi lo nyukhue yhun mvu lati, tson-o tsü lope Babilon nyu tsü lati tse bin nyo. Ai gwengwa kazü hinyu low dan hei niti.

⁴⁴Temi dan le tsü heiti, lo jwen lo heikelo tho lesü nyu tsü zanthu, mohor vü, lo shahu thyüti. Tha hidan hile Benjamin lojvü nyu Jerusalem kehun rünyi dan nyu, Juda rünyi dan nyu, lo rincho rünyi dan nyu, rincho pha ki, lo Juda tesin kipon thyüti. Ale temi dan zenryüo anyugun kazü nyu shü ni lati. Ale Npugü, tsü zo laso.”