Read Southern Rengma Naga JEREMIAH 33 Bible Online

JEREMIAH 33 - Southern Rengma Naga bible

JEREMIAH 33

¹Ale jokerabin nyu dothyü kebin ka Npugü jo le aka ni ryü.

²Npugü, kazü rhenkeshügü, tsü thyü lo pe a-bin nyu shükeshü gü le aka zo. A-zan le Npugü tsü gü le zo,

³“Akoshü lo, tsonlo ale nkhin shüti; ale tha ndunkethyü lo kekvu dan, nle shahü kemvu pe nka zoshüti.

⁴Npugü, Israel Sunggigü le zo, hunlo-o when lo kela genyu Jerusalem nyu ka dan lo Juda nyu rajabin gü borhola tiso.

⁵Babilon nyu zen-o teri kethyü ka ale anyunkenthün nyu temi vüshe latitse kebin simin dan pe ka dan sükeloi nti. Ale nyida higü nyu temi dan le thatho gwakemvu thyükela dan genyu rani tin laso.

⁶Ai ale nyida higü lo a-temi dan thyü ngwa shüo anyugun no phu sherhün lo ti. Ale kengü gwasa lo nyun kenkhi kendi zenryüo anyugun tsü shüti.

⁷Ale Juda lo Israel no gwakenyesa lo, lo anyugun thyü nso nipe himhundyü hontse lati.

⁸Ale anyugun le mupe a ntsun kela nyu tsü anyugun thyükenshün shü, lo ale kemu lo kentsun thodan tsü jüpe tsü lati.

⁹Jerusalem le shekerhün, kerhvu, lo teshwen senryüo atsüti, kazü nyu senye aphu ale Jerusalem temi genyu tha kegwa thyükehü lo gwakenye kethyü zenryüo nyida gü tsükela nyükelo ka nshvu lo ndün ti.”

¹⁰Npugü le zo, “Temi dan le kezo le bin higü le kazü kesi ki temi lo nyukhue yhun hü kemvu bin hontsele, tse hü nyo. Lo anyugun le njü; Juda rünyi lo Jerusalem tsonda dan le nrun laso; temi nmvue nyukhu le tsünyu hü mvulaso. Ai hagun le nyü nilo tiso.

¹¹temi dan nyunkenyü lo shekerhün kenra khwen, lo senhü honyu shekerhün khwen nyü loti. Hagun le temi dan le chenkeno thahokeshü sen Kershvuka gü nyu ryüo lü kethyü nyü loti; anyugun le hihontse zoti: ‘Chekeno pe Kekvutsin Npugü tsülo, a-le gwa le a-keso le kethonthen kehü genyu.’ Ale kazü higü thyüpe hi mhundyü hontse gwakenyesa lati. Ale Npugü, tsü zo laso.”

¹²Kekvutsin Npugü le zo, “Kazü higü nyu kazü kesi ki hontse temi lo nyukhu le yhun hü mvule, ai gwengwa tsünyu tehen le yhun-o tanyü kekhwenyu no anyugun tanyü zen-o a-chvü loti.

¹³Rincho tsipwen rünyi dan nyu, rincho pha ki, lo Juda tesinki, Benjamin kazü ki, Jerusalem kehun rünyi dan nyu, Juda rünyi dan nyu tsü tanyü ke khwen nyu le anyugun tanyü dan swüti. Ale Npugü, tsü zo laso.”

¹⁴Npugü le zo, “Gwenkho gü le ryüjü, tsüka ale Israel lo Juda temi dan ka zo kenjü thyü penti.

¹⁵Tsü gwünkho ka ale David tsipwen ka kentsen raja nme kejü loti. Raja tsügü le kazü aphu nyu njü lo ketsin tho thyüti.

¹⁶Juda lo Jerusalem temi kenishwilo lati lo kenshvu ndio yhunti. Nyida gü thope, ‘Npugü Ngun Kenikelogü’ tsonti.

¹⁷Ale Npugü, ale zoshwishü bin nyo, David tsipwen no a-zintse Israel raja thyüti,

¹⁸lo Levi tsipwen no püshükeda thyüo a lothyü lo no rope kershvu, shyeni lo thape kershvu thodan thyüti.”

¹⁹Npugü le aka zo,

²⁰“Ale tsangkeben lo tsangkezün zen-o kejozen nme thyü laso, tson-o au no khenyütsen gwünkho toka ryüti, lo kejozenkelo tsü thame gwenrho loho.

²¹Tsü hontse ale agogü David zen-o kejozenkelo nme thyü kenjü le a-le a-zintse raja thyü nrün genyu a-tsipwen nme le bin, lo ale Levi tsipwen ka püshükedanyu zen-o kejozenkelo nme thyü kenjü yatselo anyugun no a-zintse alothyüti; lo kejozenkelo dan tsü thame gwenrho loho.

²²Ale agogü David tsipwen lo Levi tsipwen ka püshükedanyu tsipwen dan no yhun chvüsa loti, tson-o tsang ki shyenyü dan lo zida seka hachon swülobu keho hontse lati.”

²³Npugü le aka zo,

²⁴“Temi dan le ale Israel lo Juda, ale kejükelo kami shahvu tsü khela so letse kera kehü shalo semon? Tsügenyu anyugun le atemi nripe anyugun yhü sümvu, lo anyugun le senye nme letse rüchün simvu laso.

²⁵Ai ale Npugü, tsangkeben lo tsangkezün zen-o kejozenkelo gü, lo ale tejvüe thyü pe tsang lo kazü ketsen bin.

²⁶Lo ale ketsin nyu tsü thyü kela hontse ale Jakob tsipwen lo agogü David zen-o kejozen kenjü gü ntsenti. Ale David tsipwen nme kejü pe Abraham, Isak, lo Jakob tsipwen dan so keda thyüti. Ale atemi shwi njüsa shüo anyugun no gwakenye loti.”