Read Southern Rengma Naga JEREMIAH 34 Bible Online

JEREMIAH 34 - Southern Rengma Naga bible

JEREMIAH 34

¹Npugü le, Babilon rajagü Nebuchadnezzar, a-rihü dan, lo a-hensin kebin senye lo temi dan no kecheo Jerusalem lo a-kho ka rünyi dan when kebin ka a nthon.

²Npugü, Israel Sunggigü le ano güo Juda raja Zedekiah ka hihontse zolo tseshü, “Ale Npugü, nyida higü lope Babilon raja ben ka shüla, lo a-le tsü ro lati.

³Nle tinlo kemvui; ntenlola lo pe a-ben nyu shü lati. Nle mhuntsun a-hyu, lo a-zen kenthon-e ti, tson-o nle Babilon ki gü lati.

⁴Zedekiah, ale nrüla nyu zotiyo nyülo. Teri nyu n ga loho.

⁵Nle nnyun bwen-o siti. Lo temi dan le nbon nyu nmhundyü ki raja dan kesun ka tharünkenyü ro, tsü hontse anyugun le ngenyu tharünkenyü roti. Anyugun nchechüo hihontse zoti, ‘Agun raja gü le silaso!’ Ale Npugü, tsü zo laso.”

⁶Tsüselo ale jolo higü pe Raja Zedekiah ka zo

⁷tsü gwünkho ka Babilon raja gü rihüdan le nyida gü when bin. Rihüdan le Lakhish lo Azekah, Juda nyu chwida kenko nyida kebin hvu ko when bin.

⁸Raja Zedekiah lo Jerusalem temi dan le kejorhün kelo nme thyü penlo

⁹tsüle Ibrinyu megonyu peche lo tenue hoshüla, tson-o Israel nyu nme-e no a-pvü nyu pe a-do thyü mvu nrün genyu.

¹⁰Temi dan lo sharhi aphu kejorhün-o gonyu hoshülao tsüdan no donyu thyü ni mvuso tsela. A nyugun hokü shüla,

¹¹ai tsüsiki anyun kerüchün kelulao anyugun zen nilola, tson-o tenge tse anyugun no donyu thyü nila.

¹²Tsüselo Npugü,

¹³Israel Sunggigü le aka zo-o ano temi dan ka, “Ale Ijipt nyu hagun bonyu kenishwi shüo me do thyü kebin nyu anyugun hoshü kethyü ka anyugun zen-o kejozenkelo thyü. Ale anyugun ka zo-o

¹⁴chen tsenyü nyü ka anyugun le Ibrinyu donyu chentsero mego thyükela hoshülo tse zo njü. Ai hagun bon nyu le ajo rüchün shümvu, lo ale kezo-e nyümvula.

¹⁵Jon thonri kemvu ka hagun le nyun keluo akenyü thyüshü. Hagun aphu hagun Ibrin donyu hoshüla titse kejorhünlo, lo hagun le ale kebin ka kejozenkelo thyü, tsüle arüshvu kehü bin Kershvuka nyu.

¹⁶Ai hagun kerüchün kelu nio arühvu mvula. Hagun aphu hagun kenda thyü hoshü kela donyu dan zen nilo la, lo hagun le tenge tse tsüdan no donyu thyü nila.

¹⁷Tsügenyu, Ale Npugü, hagun le ajo zenmvula letse zo bin nyo: hagun le hagun Israel pvünyu hoshü mvu laso. Gwasa, tsonlo ale hoshü kela pe hagun tsüti: tsüle nkendo ka teri, kethyü kenyü lo kekhün nyu sila lo kegwa. Ale kazü nyu senye aphu no ale hagun gen thyükeshü nrio kershvu ti.

¹⁸Juda lo Jerusalem nyu kedanyu rajabin nyu kedanyu, püshükedanyu lo sharhi aphu kengüo methutse duthü shahvu thyüo tsühvu janyu tsonchüo azen kejozenkelo thyü njü. Ai anyugun le kejozenkelo gü gwen rho lo tsüjvü then mvu laso. Tsügenyu ale temi hidan gen anyugun le methutse gü gen thyükeshü hontse shüti.

²⁰Ale anyugun lope anyugun kenrhinyu, anyugun boshvula nyükehü nyu ben nyu shü lati, tson-o anyugun simin dan lope tegü lo tehen thyü dan no tyü lati.

²¹Ale Juda raja Zedekiah lo a-hensin keda dan ko pe anyugun boshvula nyü kebin nyu tsü lati. Ale anyugun lope Babilon rihü, hagun when mvukela dan tsü lati.

²²Ale ahza nme khishüti, lo anyugun le nyida hinyu niryüti. Anyugun le tsü when-o lolo, lo tsü ro lati. Ale Juda rünyi dan lope mele yhun hü kemvu bin hontse lati. Ale Npugü, tsü zo laso.”