Read Southern Rengma Naga JEREMIAH 35 Bible Online

JEREMIAH 35 - Southern Rengma Naga bible

JEREMIAH 35

¹Josiah nyugü Jehoiakim le Juda raja thyükelo ka Npugü le aka zo,

²“Rekhabit pvüphun ki gü, anyugun nthon shülo. Tson-o anyugun zen-o Kershvuka tsen nme ka yüryüo vain zu peha pe anyugun la shülo.”

³Tsügenyu ale Rekhabit pvüphun aphu zenlo-- tsü le Jaazaniah (Jeremiah kechagü nyugü Jaazaniah, Habazzaniah le Jeremiah a-pvü) lo a-tsasikezen nyu lo a-nyu nyu peche dan aphu--

⁴tson-o anyugun zen-o Kershvuka nyu yü ryü. Ale anyugun zen-o Igdaliah nyugü sidyükeshagü Hanan sikethen gü katsen nyu yüla. Katsen higü hile Shallum nyugü Maaseiah Kershvuka gü nyu, temi kentsen nme katsen soka, tsügü katsen khoka kedanyu kecha dan katsen le bin.

⁵Tsüselo ale honpen lo thakhin ka vain zu pe sü shüo pe Rekhabit dan mhundyü ka shüo anyugun ka, “Vain zu peha tsülo,” tse shü.

⁶Ai anyugun le kenio, “Agun le vain zu tsü hümvu. Agun bon gü Jonadab, Rekhab nyugü le agun ka zokeshü le agun lo agun nyenyu nme-e zu lihie tsükemvui letse zole.

⁷A-le agun no kae thyü nya, low-e tsünya, lo vain sen nya nmvue hei-e nya lotse zo. A-le agun no a-zin tse phika nyu yhunlo, tson-o agun no tesin hontse kazü higü nyu yhun bin lo tse zo.

⁸Jonadab le senthyükeshü jo khipe agun ketsü aphu agun le zen hü laso. Agun le vain zu tsü hümvu, lo agun nyenyu peche lo tenue tsü hümvu.

⁹Agun le bin nrün ka thyü hümvu, agun le phika nyu yhun hü-- lo agun le vain low, low dan, lo shye ni-e ndi. Agun le agun bon Jonadab le agun ka johokeshü zen shü-o.

¹¹Ai Raja Nebuchadnezazr le agun kazü hü keryü ka agun le Babilon lo Seria rihü nrhi sen-o Jerusalem ki ryüla. Tsügenyu agun le Jerusalem nyu yhun binle.”

¹²Tsüselo Kekvutsin Npugü, Israel Sunggigü le ano güo Juda lo Jerusalem temi dan ka hihontse zoshü lotse zo, “Ale Npugü, hagun le nyuthyüo akhwen nyü mvu lo ale senkethyüjo zen mvula yo shün bin.

¹⁴Jonadab tsipwen dan le a-johokeshü vain zu tsünya lotse keshü zenhü, tson-o nthu keti anyugun nme-e zu thame tsü hümvu. Ai ale hagun ka zozin bin nyo, ai hagun le ajo zen mvu.

¹⁵Ale agonyu sidyükeshanyu aphu nipe hagun ka shüzin ryü, lo anyugun le hagun jvü gwakemvu khelao kenjügü thyülo lotse zoshü. Anyugun le hagun no tero kecha rüshvu lo tsüdan lothyü nya tsonlo yatselo hagun le ale kazü pe hagun lo hagun bonnyu ketsü hinyu yhun loti tse zoshü. Ai hagun le akhwen nyü nmvue ajo rüchün mvushü laso.

¹⁶Jonadab tsipwen dan anyugun bon gü le johokeshü zen, ai hagun we akhwen nyümvu laso.

¹⁷Tsügenyu ale Kekvutsin Npugü, Israel Sunggigü ale kenke jope bin kenjü dan aphu zenryüo Juda lo Jerusalem gen shü lati. Ale tsonti, ale hagun ka zo kethyü ka nyümvu, lo ale hagun kokethyü ka khinshü mvu kela genyu.”

¹⁸Tsüselo ale Rakhab pvüphun ka Kekvutsin Npugü, Israel Sunggigü le zoshü bin le tse zo, “Hagun le hagun bongü Jonadab le johokeshü then lo hagun le a-le senthyükeshü jo aphu zenlo, tson-o hagun le a-le senthyükeshü jo aphu thyülo.

¹⁹Tsügenyu Kekvutsin Npugü, Israel Sunggigü le zoshwi shü kebin le a-zin tse Rekhab nyu pechenyu no bin-o a lothyüti.”