Read Southern Rengma Naga JEREMIAH 36 Bible Online

JEREMIAH 36 - Southern Rengma Naga bible

JEREMIAH 36

¹Josiah nyugü Jehoiakim le Juda raja thyükelo chen zi gü ka Npugü le aka zo,

²“Lesüswü nme khilo-e tsünyu ale Israel, Juda lo senye aphu rüla pe nka zokeshü aphu pe thulo. Josiah le raja thyüketseka ale keritsin ka nka zokeshü ryüo ntsoka keti ale nka kezo aphu thulo.

³Juda temi dan le ale kenke zenryüo anyugun gen shü titse kebin rüla aphu nyükelo ka anyugun tha gwakemvu nyu rani ryüe logwa. Tson yatselo ale anyugun gwakemvu lo kemu aphu jüshüti.”

⁴Tsügenyu ale Neria nyugü Baruk koshüo Npugü le aka zokeshü aphu zoshü. Lo Baruk le tsü dan aphu pe lesüswü gen thulo.

⁵Tsüselo ale senkethyü hidan pe Baruk tsü: “Ano Kershvuka gü nyu yüsin nya lotse laso.

⁶Ai ale nno hisi gü ka temi dan le nyen ketse ka tsünyu gü nyübin. Nle lesüswü gü swü tetsoshü, tson-o anyugun no Npugü le pe aka zokeshü nno thukelo aphu nyülo, Temi lihigüe lo Juda temi rünyi ki keryü nyue no nyülo kegwa bin nyu thyü shülo.

⁷Anyugun le Npugü ka hio anyugun tho gwakemvu nyu rani ryüe sha loho, Npugü le anyun kenthün ketetsin pe anyugun kedün shü kebin genyu.”

⁸Tsügenyu Baruk le ale a-ka zokeshü gwenzin tse Kershvuka nyu Npugü jo swüshü.

⁹Jehoiakim le Juda raja thyükelo chenpvü gü shye tekü gü ka temi dan le Npugü kenyü thyü nrün genyu nyen. Kenyen tsü gü tsüle Jerusalem nyu keyhun nyu aphu lo Juda rünyi kecha dan ki hüo keryü nyu aphu.

¹⁰Tsüselo temi aphu nyen kebin ka, Baruk le ale kezo hontse lesüsü gü nyu kebin aphu swüshü. A-le Kershvuka nyu Shafan nyugü Gemariah jokera rüla kethugü katsen ka bin-o tsü thyü. A-katsen le jokerabin tesogü ki Kershvuka nyu keyü khinrun keshün gü khoka.

¹¹Gemariah nyugü Mikaiah, lo a-bon le Shaphan gü le, Baruk le lesüsü gü nyu Npugü le zokeshü jo swükethyü nyülo.

¹²Tsüselo a-le raja bin ki, jokera kethugü katsen gü ka kedanyu aphu bin-o kenthon kebin nyu yüla. Elishama, Jokera kethugü, Shemaiah nyugü Delaiah, Akbor nyugü Elnathan, Shafan nyugü Gemariah, Hananiah nyugü Zedekiah lo keda kecha aphu tsünyu bin.

¹³Mikaiah le Baruk le swüpe temi dan zenkeshü nyükelo jo aphu pe anyugun ka zoshü.

¹⁴Tsüselo kedanyu dan le Jehudi (Nethaniah nyugü, lo a-bon le Shelemiah, lo a-bon a-pvü le Kushi) nishüo no Baruk ka zo-o a-zo swüpe temi dan zen kethyü lesüsü gü senryü lotse shü. Baruk le lesüsü gü senryü.

¹⁵Anyugun le a-ka, “Binlo, tson-o lesü sü gü swüpe agun hishülo.” Tsüselo Baruk le swü shü.

¹⁶A-le tsü swükeshü siki, anyugun le nshvuo khinyunyu nri, tson-o Baruk kazo, “Agun le hi lope raja gü ka zotesha mvuloshvu.”

¹⁷Tson-o anyugun le a-ka shün, “Agun ka zoshülo, nle dihontse hidan aphu thulo la? Jeremiah le zo-o nle thulo le?”

¹⁸Baruk le kenishü, “Jeremiah le zo nme me tse zo-o ale kethuzü pe lesü hi gen thulo le.”

¹⁹Tsüselo anyugun le a-ka zo, “Nle lo Jeremiah le gü kebu tinla mvuloshvu. Temi nme-e no hai bin sha nya.”

²⁰Kedanyu dan le lesüsü gü lope Elishama, jokera kethugü katsen nyu binlao raja jokerabin nyu yü, tson-o anyugun le tha aphu pe raja gü ka zotesha shü.

²¹Tsüselo raja gü le Jehudi no lesüsü gü senryü lotse nishü. Ale Elishama katsen gü nyu gü senryüo swüpe raja gü lo a-hunpvü kebin kedanyu dan aphu hishü.

²²Tsüle tsangsüki lo raja gü le tsangsü genyu mah khoka dunbin.

²³Jehudi le thukethü keshan-pezi swülo ntsin raja gü le jenshen lope tsü rüthü pe mah nyu shüla. Lesüsü gü aphu robula kemvuthen a-le tson bin.

²⁴Ai raja gü lo a-hensin keda dan nme-e nshvu nmvue nyunkenjünkethyü zansüe hyumvu.

²⁵Elnathan, Delaiah lo Gemariah dan le rajagü no lesüsü gü pe ro nya lotse hi, ai a-le anyugun khwen ketsü nyue nyümvu.

²⁶Tsüselo raja gü le raja nyugü Jerameel lope Azriel nyugü Seraiah, Abdeel nyugü Shelemiah hidan no ale lo ajo kethugü Baruk tünlo lotse ahza khishü. Ai Npugü le ai kebulo.

²⁷Raja Jehoiakim le ale zope Baruk no thukelo lesüsü gü rokela siki Npugü le aka zo-o

²⁸ano lesüsü kecha khilo-o kerigü gen kebin hontse aphu pe tsü gen thulo tseshü.

²⁹Npugü le ano raja gü ka hihontse zolo tseshü: “Nle lesüsü gü tsü ro laso, lo nle Jeremiah le nyuthyüo Babilon raja gü le ryüo kazü higü lo a-temi lo a-senru aphu nkela titse thuyo tse ketso.

³⁰Tsügenyu ale Npugü, nka zo bin nyo, Raja Jehoiakim, ntsipwen nme-e no David kedaphen gü so kekvu senlo kemvui. Nsimin lope shwen-o nhenyu tsang kethyü pho lo kheje gwen khütso no gwen ti.

³¹Ale shaja pe nle, lo ntsipwen lo nhensin keda dan aphu tsüti, hagun le thyükela kemudan genyu. Nle, Jerusalem lo Juda temi nme-e ajo ketsünyue nyümvu kela genyu, hagun aphu gen ale kenke pe kedün keshü tsü aphu zen ryüti.”

³²Tsüselo ale lesüsü kecha nme khilo-o ajo kethugü Baruk tsüshü, lo ale pe zokeshü jo aphu a-le thulo. A-le lesüsü kerigü ka kebin jo aphu lo tsühontse kethyü jo ale pe a-ka zokeshü aphu thulo.