Read Southern Rengma Naga JEREMIAH 37 Bible Online

JEREMIAH 37 - Southern Rengma Naga bible

JEREMIAH 37

¹Babilon raja gü Nebuchadnezzar le Josiah nyugü Zedekiah lope Jehoiakim nyugü Jehoiachin sunka Juda raja thyüla.

²Ai Zedekiah lo a-hensin kedanyu lo temi nme-e Npugü jo pe atsü keshü zen mvula.

³Raja Zedekiah le Shelemiah nyugü Jehukal lo püshükedagü Zephaniah nyugü Maaseiah nishüo ano Npugü Sunggigü ka agun senye genyu hishü lotse shü.

⁴Tsüle akhipe doka nyu shümvuo temi dan nyu hüzun.

⁵Babilon nyu rihü le Jerusalem hun bin la, ai anyugun le Ijipt nyu rihü le Ijipt rhi nkenla sele tse nyükelo ka ranila.

⁶Tsüselo Npugü, Israel Sunggigü le aka zo-o

⁷ano Zedekiah ka,, “Ijipt rihü le nche titse ryü jü nyo, ai tsüle ka ki rani lati.

⁸Tsü sika Babilon nyu le ryüo nyida gü whenti, lo tsü lolo-o rolati.

⁹Ale Npugü, nka zo hünyo, nle Babilon nyu le niryü kemvui letse rüchün-o n npvü nsanya, kechamvule anyugun le niryüti.

¹⁰Nle Babilon rihü apentha so kvulo lao jünkela nyu nti khipe kensenthen nyu binlae tsüdan le nisoryüo nyida higü roshye pe kazü nyu shü lati.”

¹¹Babilon rihü le Jerusalem nyu ranila, kechamvule Ijipt nyu rihü le ryüjü kela genyu.

¹²Tsügenyu ale Jerusalem khelao gungü Benjamin lojvü nyu akami hon ajün khilo titse bin.

¹³Ai ale Benjamin Khinrun tikelo ka, tsünyu shüpahü so kedagü, a-zan le Shelemiah nyugü Irijah, a-bon le Hananiah, a-le agwenkhin-o aka zo, “Nle agun khe-o Babilon ki tin jü laso!”

¹⁴Ale Kenio, “Tson mvule! Ale hagun khe-o tin jü mvu.” Ai Irijah le akhwen nyümvu. A-le aphinlo-o azen ryüo kedanyu tsüla.

¹⁵Anyugun le agen nthün sao akhipe vülao pe Jonathan jokera kethugü, a-ka lope doka thyükela gü ka nyu khinla lotse ahza hoshüla.

¹⁶Akhipe kazü hensin nyu shülao tsünyu gwen kho kethon bin.

¹⁷Kenkhin ki Raja Zedekiah le me nipe aki shüo, kedabin nyu a npvü azen kenthon-o, “Npugü kanyu jolo peha le binle?” tse shün. Ale a-ka, “Binle, lo nkhipe Babilon raja ben nyu shü lati.”

¹⁸Tsüselo ale shün-o, “Ale ngen, nhensin kedanyu lo temi hidan mhundyü ka nyu kemu thyüla letseo atenpe doka nyu shü ola?

¹⁹Hagun sidyükeshanyu Babilon raja gü le ryüo hagun lo kazü when kemvui letse kezo nyu we dihontsela?

²⁰Lo rühvulo kekü rajagü, ale nka hikebin güle nno akhwen nyüo akezo thyü shü lotse binle. Ncheno-e ani nipe Jonathan ka doka nyu tsü shü sin nya gwenlo. Nle tsonshü yatselo ale tsünyu sikelai le.”

²¹Tsügenyu Raja Zedekiah le ano pe raja ka jokerabin nyu khin la lotse ahza hoshü. Ale tsünyu bin, lo nyida nyu tensü nme-e ndila kemvuthen khenyütsen tensü ketsenbin nyu tensü thün nmeme pe atsü.