Read Southern Rengma Naga JEREMIAH 38 Bible Online

JEREMIAH 38 - Southern Rengma Naga bible

JEREMIAH 38

¹Mattan nyugü Shefatiah, Pashhur nyugü Gedaliah, Shelamiah nyugü Jehukal lo Malkhiah nyugü Pashhur dan le ale temi dan ka

²Npugü le hihontse zole tsekethyü nyülo, “Lihigüe nyida higü nyu yhunbin yatselo teri, kekhün, lo kethyükenyü genyu siti. Ai chwigü Babilon nyu ben nyu yükela nyu boshvu kemvui; a-le a-keyhun keni loti.”

³Ale anyugun ka hihontse kethyü ko zobin, “Ale nyidagü lope Babilon rihü dan tsüla lo anyugun le tsü lo lati.”

⁴Tsüselo kedanyu dan le rajagü ki güo zo, “Temi higü no sila mvuloshvu. Hihontse zo-o a-le nyidagü nyu shüpahü dan thyü keshese bin, lo tsü hontse pe nyida hinyu kebin nyu gen thyüshü bin. A-le temi dan che nyü bin mvu; a-le anyugun nthyü nnyü kebin gwenzin.”

⁵Raja Zedekiah le zoni, “Gwasa, tsonlo hagun le a-zen-o nyu thyü nyü bin yo thyü lochi; ale hagun khin loho.”

⁶Tsü genyu anyugun le azenlo-o ano ron süsen-o raja Malkhiah zülvu nyu yü la, tsüle raja kamhun ka. Zülvu nyu zü le ndi, kenta nti kethyü genyu ale tsü nyu ki thuphün tsüla.

⁷Tson ai Sudan nyu Ebedmelek, rajabin nyu thathyü kehünyu kedanyu nmele, anyugun le akhipe zülvu nyu shüla sele tse nyülo. Tsü gwünkho ka rajagü le Benjamin khinrun ka jokerabin.

⁸Tsügenyu Ebedmelek le tsünyu yüo raja gü ka zo,

⁹“Rühvulo kekü rajagü, hidan le thyü kenjü tsüle thyüzümvu le. Anyugun le Jeremiah lope zülvu nyu shü laso, lo a-le tsünyu khün-o sila tsentsü, kechamvule nyida higü nyu chvü ndi.”

¹⁰Tsüselo rajagü le Ebedmelek no mishan zenlo-o ale tsünyu sikemvu ka a-süshwila lotse ahza hoshü.

¹¹Tsügenyu Ebedmelek le tsüdan zen-o kanyü keshübin nyu yüo phiren peha khilo-o ron no dyü pe atsüshü.

¹²A-le ano phiren dan tsüpe anyasin ki shülo, tsonlo ron no arhe nthyü mvule tse zo. Ale tsonlo,

¹³tson-o anyugun le zülvu nyu asüshwishü. Tsüsika akhipe kamhun ki shüla.

¹⁴Gwenkho kecha nme ka Raja Zedekiah le ako pe a-ki Kershvuka keyü tson kenshen gü ka shü, tson-o a-le zo, “Ale nka tha nme shün shüti, lo ale nno ketsin apentha pe aka zonyü bin nyo.”

¹⁵Ale zoni, “Keshanyu laka ale ketsingü pe nka zolo, nle ano sila ti, lo ale ntsonketsin pe nka zoshüe nle nyüe kethyüi mvule.”

¹⁶Tsügenyu Raja Zedekiah le kebuo johoshü, “Ale rhünkehü Sunggigü, kerhün khipe ngun ketsügü zen nyu swen-o zobin, ale nno sila loho, nmvue nkhipe nboshvula nyükehü nyu tsü loho.”

¹⁷Tsüselo ale Zedekiah ka Kekvutsin Npugü le hihontse zobin letse zoshü, “Nle Babilon kedanyu dan ben nyu yü lalo, nkeyhun nrhoshüti, tson-o nyida higüe rola kemvui. Nle lo nkami ko nrhoshüti.

¹⁸Ai nle a-hensin yüla mvu yatselo nyida higü lope Babilon nyu ben nyu shü lati, a-le tsü rolati, lo nle anyugun nrhio tinlo kemvui.”

¹⁹Ai rajagü le zoni, “Ai ale ngun temi ngun kheo Babilon nyu ki gükela nyu nshvule. Alope anyugun ben ka shüo a nthyü nnyüe logwale.”

²⁰Ale zo, “Nkhipe anyugun ben ka shü kemvui. Ale nno Npugü jo zenlo tse hünyo; tsonlo tha aphu ngenyu gwa, lo nkeyhun-e nrholoti.

²¹Ai Npugü le tsemin ki nle a-hensin nyu yüla mvu yatselo nyuthyüla tiyo pe atesha bin nyo.

²²Tsünyu ale kehyu le Nyeginyu Juda rajabin nyu khe kenjü dan tsü lope Babilon raja hensin kedanyu dan ben ka shü lati tse bin nyo. Anyugun le gü kejü ka zokebin hi nyüshü: ‘Raja pvünyu kegwatsin dan le a-sala, anyugun le a-sokvu laso. Lo ntsoka a-pha le kentanyu yüla, a-pvünyu ju le a-khelaso.’ ”

²³Tsüselo ale zosin shü, “Ntemi nyeginyu lo ntsenyu aphu zenchwi gü Babilon nyu tsülati, lo n ai anyugun mhundyü tin lo kemvui. Babilon raja le nzen gü dothyüla, lo nyida higü ro lati.”

²⁴Zedekiah le zoni, “Temi nme-e no kekenthon higü sha nya, tsonlo nkeyhun le kenshvu nyu bin loho.

²⁵Kedanyu dan le ale nzen kenthon kethyü nyü yatselo anyugun le ryüo nka nnyi le nyu kenthon yo shün soti. Nle anyugun ka tha aphu zo shü yatselo nno sikemvui letse zoti.

²⁶Nle aka hio, nkhi pe doka nyu shüo nno tsünyu sila nyalo tse aka hikeshü gwen zin letse anyugun ka zo lalo.”

²⁷Tsüselo kedanyu aphu ryüo aketso, lo ale rajagü le ano anyugun ka zo lotse kethyü gwen zin zoshü. Anyugun le thame thyükeloi ndila, kechamvule nme-e kekenthon jo tsü nyü kemvu genyu.

²⁸Tson-o Jerusalem lola kemvuthen akhipe raja ka kamhuntsen nyu shüla.