Read Southern Rengma Naga JEREMIAH 39 Bible Online

JEREMIAH 39 - Southern Rengma Naga bible

JEREMIAH 39

¹Zedekiah le Juda raja thyü kelo chen tekügü shye tseryügü ka, Babilon raja gü Nebuchadnezzar le a-rihü apentha zen ryüo Jerusalem when lola.

²Zedekiah le raja thyükelo chen tseryü nme gü shyezigü jon tekü nyü nyidagü chwida borhola.

³(Jerusalem lolo kela ka Babilon raja gü hensin keda aphu lo Nergal Sarezer, Samgar Nebo, Sarsekim, lo Nergal Sarezer kecha gü hidan sin-o Khinrun lvugü nyu anyugun bin thyü lola.)

⁴Raja Zedekiah lo a-shüpahü dan le tha tsüdan hyukeshü ka kheje gwen nyida gü nken tinla titse nyü so. Anyugun le raja chwi tsonki chwio chwida shahvu kensü kebin Khinrun gü nyu gü Jordan ketejon kentsun zin tinla.

⁵Ai Babilon rihüdan le anyugun hü güo Jeriko khoka ketejon nyu Zedekiah tenlola. Tson-o anyugun le a-zen-o Raja Nebuchadnezzar le Hamath lojvu nyu Ribla nyida ka kebin kiryü, tsünyu Nebuchadnezzar le a-gen johoshü.

⁶Ribla ka a-le Zedekiah yhühyu nyu a-nyudan boshvula, lo a-le Zedekiah hensin kedaju ko hüla.

⁷Tsüsika a-le Zedekiah yhütyü shahvu nren tserü thola lo a-dyü pe Babilon ki nishüla.

⁸Tsü ntsin Babilon nyu le raja bin lo temi dan ka rola lo Jerusalem chwida borhola.

⁹Kenkhintsin ka Nebuzaradan, shüpahü so keda thyü ryü kebin güle nyidagü nyu temi dan lo tin-o a-ka keryü nyu aphu tenzen-o Babilon ki dothyü tsüla.

¹⁰A-le temi rhokedyütsin nyu, thame kendinyu peha khe pe Juda kazü nyu shüla, vain low lo low dan pe anyugun tsüshü.

¹¹Ai raja Nebuchadnezzar le ahza pe shüpahü so kedagü Nebuzaradan tsüo a-no ahza hidan pe khishü lotse shü,

¹²“Gü Jeremiah fü lo-o a-ntsen kegwa thyülo. A-nthyü nyünya, ai a-kenyü thyü shülo.”

¹³Tsü genyu Nebuzaradan lo kedanyu Nebushazban lo Nergal Sarezer lo Babilon raja hensin keda aphu kengüo

¹⁴raja kamhun gü nyu azenlo. Anyugun le Ahikam nyu Gedaliah no antsen lo lotse tenyen shü, tsügü a-bon le Shaphan lo a-le ano gwa gun gü ka tilo titse ndo nrün gü. Tsügenyu ale temi dan nyu bin.

¹⁵Ano rajabin kamhun nyu khin bin ketsen ka, Npugü le aka zo-o

¹⁶Sudan temi gü Ebedmelek ka Kekvutsin Npugü, Israel Sunggigü le zoshü letse zolo tse shü, “Ale thyü titse zokela hontse ale gwakenye kethyü gü mvule kenke zenryüo nyida higen shüti. Lo tsü thyükeshü ka nle tsünyu bin-o hyuti.

¹⁷Ai ale Npugü n ntsen loti, tson-o nkhipe nle nshvukehü nyu ben nyu shüla loho.

¹⁸Ale n ntsen kegwa thyülo-o nno sila kemvui. Nle atenyen kethyü genyu nle tinloti. Ale Npugü, tsü zo laso.”