Read Southern Rengma Naga JEREMIAH 4 Bible Online

JEREMIAH 4 - Southern Rengma Naga bible

JEREMIAH 4

¹Npugü le zo, “Israel temi dan, hagun le ranila nyü yatselo rani aki ryüta. Hagun le ale ntsükehü teromen khela lo aka joketsin zoti yatselo,

²hagun le azen sen-o swen lokü. Tsonlo senye aphu ano jochü pe anyugun tsülo tse hi, lo anyugun le ashwenti.”

³Npugü le Juda temi lo Jerusalem ka zo, “Hagun low tsokemvu dan tsü tsoshülo; ntsi pe tsehü lanyu gwennya.

⁴Ale hagun Npugü, hagun le azen-o kejozenkelo zenlo, lo hagun thyü kenshün pe atsülo, hagun Juda lo Jerusalem temi dan. Hagun le tson mvu yatse kethyü we hagun tho gwakemvu genyu anyunkenthün le mah hontse nnyüti. Tsüle nnyüti, lo nme-e tsü bokemhüla loho.”

⁵Kazü tsügü aphu nyu shu khun shülo! Khun tetso lo nshün shülo! Juda lo Jerusalem temi no chwida kenko nyida dan nyu yülalo tse zo shülo.

⁶Zion tson gü tsin shülo! Kenilo nrün genyu tinlo! Ntsünyalo! Npugü le kenke senryü jü, tero kipon kenke keda.

⁷Shünyho le a-kekebu bin nyu chwiryü kejü hontse, Senye dan nke nrün güle ryü laso. A-le Juda nke lati tse ryüjü. Juda nyida dan nke lao, nme-e tsünyu yhunmvu lati.

⁸Tsügenyu ronphi benlo-o, chü lo che chülo kechamvule Npugü nyunkekhü keda le Juda nrhilo mvu laso.

⁹Npugü le zo, “Tsünyü raja nyu lo kedanyu dan le kepeche ndi lati; Peshükedanyu le anyugun kerüla lo sidyükeshanyu le anyugun dunthyüti.”

¹⁰Tsüselo ale zo, “Aphuso kekvu Npugü, nle Jerusalem temi sa ketsin thyü laso! Nle kezo le gwaketho le binti tsezo, ai jenthon le anyugun rohon ka bin laso.”

¹¹Kazü kesi kipon tsangkenbu kenyen le Jerusalem temi dan ka ryüjü letse zoshü nrün gwünkho ryüjü nyo. Tsüle shyeben nti when sentinla nrün tsangkenhi nti mvu.

¹²Npugü le ahza hoshüo gunryü nrün tsangkenbu gü we tsü nyeki kvusati! Npugü le a npvü a-temi dan gen ketso nrün zoshwi shü bin nyo.

¹³Nrishülo, kenrhinyu le nmhu hontse ryüjü. A-teri gari dan le tsangkenbu züro hontse, lo a-keru dan le logi nyeki nmhe. Ngun le nmhen laso! Ngun we thyülo tiso!

¹⁴Jerusalem, nkenilo nrün genyu nnyun ki gwakemvu süla lo. Dithen laki nle kemu tho rüchün bin tila?

¹⁵Dan nyida lo Efraim rincho kipon lilonyu le jolo kenshvu zoshü.

¹⁶Anyugun le ryüo kazü nithen ki kenrhünyu le ryü kejü pe senye dan lo Jerusalem ka zo-o no petsü binlo tseshü. Kenrhünyu hidan le nra nhuo Juda nyida dan ntsun ryüti.

¹⁷Tson-o temi le low rikhun kebin hontse Jerusalem hun loti, a-temidan le Npugü nren kethyü genyu. Npugü le zo laso.

¹⁸Juda, nkeyhun lo nthodan genyu n-npvü tha hidan senryüo ngen shüla sele. Nkemu gü le kenjünkethyü higü khishüla; tsüle nnyun jen laso.

¹⁹Kethyü! Ale kethyü gü nyhen loho sele! Anyun! Anyun le nthun ketetsin thyü bin le! Ale matse bin loho le! Ale shukekhun khwen lo teri nyu sen kethyü nyü bin laso.

²⁰kenjünkethyü le kebin bin laso; kazü tsügü apentha nke laso. Agun phika dan nke whütse laso; a-kesun serhen kü bin laso.

²¹Ano dithen teri gwakemvu hyu lo shukekhun nyü bin mon?

²²Npugü le zo, “Atemi le pin; anyugun le ashalo hümvu. Anyugun le ntsenyu kepho hontse; thame shakekholo hümvu. Anyugun le gwakemvu we thyüshasa, ai kegwagü thyülo hümvu.”

²³Ale kazü nyu nrishü--tsünyu thame ndi; tsang nrishü, ai keben ndi.

²⁴Kazüthun dan nrishü, tsüle n nubin, lo rincho dan le nnu nsin nshebin.

²⁵Ale tsünyu temi hyumvu; tegü dan-e nyetinla.

²⁶Kazü kebwen le sila; nyida dan le nkela Npugü nyunkenthün gü genyu.

²⁷(Npugü le zokethyü le kazü apentha tehen yhun mvu bin bu lati, ai a-le tsü nkeshüla kemvui.)

²⁸Kazü gü le chüti; tsang le zün lati. Npugü le zoshü laso, lo a-le nyunkeluni kemvui. A-le rhilo laso, lo rani loho.

²⁹Keru kezen nyu lo tholevü kepennyu khwen nyükelo ka temi aphu tin lati. Peha le chün ki tin yü, kechanyu le tsokhin pala gü lati Rünyi aphu nrun la, lo nme-e tsünyu yhun nimvu lati.

³⁰Jerusalem, nwe thyülo tiso! Nle nyugenyu phi kenhon ben hü nla? Nyuthyüo kontyü sen lo nyhütyü nyen pvü hü nla? Nle thakon kendi ka n nthyü kezegwa hünyo! Nso nyu le nkelila lo ndushvula nyü binso.

³¹Ale nyeginyu kenjünkethyü khwen hontse lo a-nyurinyu zenlo gükejü kenra khwen hontse nyülo le. Tsüle Jerusalem le a-ben keto-o henfüfü tse nrao, “Awele thyü loso! Anyugun le a dushvu titse ryüjü laso,” tse kebin khwenle.