Read Southern Rengma Naga JEREMIAH 40 Bible Online

JEREMIAH 40 - Southern Rengma Naga bible

JEREMIAH 40

¹Nebuzaradan, shüpahü so kedagü le Ramath nyu ahoshü kela sika Npugü le aka zo. Ron lo pe adyüzen, lo kecha Jerusalem lo Juda kipon temi tenzen-o Babilon ki dothyü tsükela dan kesin-o tsünyu gü.

²Kedagü le azen ketu güo zo, “Npugü n Sunggigü le kenke pe kazü higü kedün laso,

³lo ntsoka we a-le nyuthyü titse zoyo tsü penlaso, kechamvule hagun temi le mupe Npugü ntsun la lo a-jo zen mvu laso.

⁴Ale ntsoka nsen ka ron shwü shüo nhoshü bin nyo. Nle athen-o Babilon ki gü nyü yatselo tsonlo gwa, lo ale n nucha loti. Ai nle gü nyümvu yatselo gümvula gwa. Nle tsipwen higü apentha nyu nle diki gü nyüyo kejülo gwa.”

⁵Ale a-jo keni mvukela ka Nebuzaradan le zo, “Ahikam nyu Gedaliah, a-bon le Shaphan, Babilon raja gü le a-khipe Juda rünyi dan so Ahng thyü kebin gü ki nigü lalo. Nle a-zen-o temi dan nyu binlo, nmvue nle diki güla mvulo shvuyo gülo gwa.” Tsüselo a-le jwe nme lo ketyüketsü peha pe atsüo ano güla.

⁶Ale gü Mizpah nyu Gedaliah zen-o kazü tsügü nyu khepe bin kela nyu dan nyu yhun.

⁷Juda kedanyu lo shüpahü peha le me ben nyu yümvula. Anyugun le Babilon rajagü le Gedaliah lope kazü tsügü nyu Ahng thyüla lo Babilon ki zentin kemvu kazü tsügü nyu rhokedyütsin nyu so kekvu kesengü thyüla sele tse nyülo.

⁸Tsügenyu Nathaniah nyugü Ishmael, lo Kareah nyugü Johanan, Tanhumeth nyugü Seraiah, Netophah nyu Ephai nyudan, lo Maakah temi gü Jezeniah hidan le a-temi dan zen-o Mizpah nyu Gedaliah ki gü.

⁹Gedaliah le anyugun kazo, “Ale hagun ka zokebin gü yatselo Babilon nyu ben nyu yü nshvu kethyü thame ndi. Kazü hinyu yhunlo, Babilon raja lothyülo, tson yatselo tha aphu hagun genyu gwati.

¹⁰Ale Mizpah nyu bin-o Babilon nyu le hinyu keryü ka hagun sun thyüti. Ai hagun le vain zu, terasha, lo oliv terzü dan kequen lo, tson-o hagun le binlo kela rünyi nyu yhunlo.”

¹¹Tsü gwen kho ka, Moab, Ammon, Edom, lo tsipwen kecha ki yhun kebin Israel nyu a phu Babilon nyu le Israel nyu peha no Juda kazü nyu yhun nio Gedaliah lope anyugun Ahng thyü la seletse kethyü nyü lola.

¹²Tsügenyu anyugun le kezen-o bin kehü bin dan khela-o Juda ki niryüla. Anyugun le Mizpah ka Gedaliah ki ryü, lo anyugun le tsünyu vainzu lo terasha kechon ki kequenlo.

¹³Tsüsika, Johanan lo Shüpahü so keda dan me ben nyu yü kemvu dan le Mizpah ka Gedaliah ki ryü.

¹⁴a-ka zo, “Nle Ammon Raja Baalis le Ishmael nishüo nboshvula lotse kebin tsü sha mvu ole?” Ai Gedaliah le tsü tenyen mvu.

¹⁵Tsüselo Johanan le kebuo a-ka zo, “Ano güo Ishmael boshvu lata, lo nme-e segü le tsonla yo sha loho le. Nyuthyüo a-no n boshvu la mon? Tsonla yatselo Judanyu nhunpvü kebin dan le kezenla, lo tsüle kenke zenryüo Juda nyu khe kelanyu aphu gen ryü lati.”

¹⁶Ai Gedaliah le kenishü, “Tson nya! Nle Ishmael rüla zo kebin tsüle ketsin mvu!”