Read Southern Rengma Naga JEREMIAH 41 Bible Online

JEREMIAH 41 - Southern Rengma Naga bible

JEREMIAH 41

¹Tsü chen shye tsenyü gü ka Ishmael, Nethaniah nyugü lo a-bon le Elishama, raja kaminyu, lo raja hensin kedatsin nyu nme le, mi tseryü zen-o Mizpah ki Gedaliah teno titse gü. Anyugun aphu kengü chvütyü kebin ka,

²Ishmael lo mi tseryü dan le jenthon khitho pe Gedaliah dushvula,

³Ishmael le Israel nyu Mizpah ka Gedaliah zen kebin aphu lo Babilon Shüpahü tsünyu ryükebin aphu dushvula.

⁴Tsüsinyü, nme-e Gedaliah dushvu kela rüla shalo kemvu ka,

⁵mi hentetse le Shekhem, Shiloh, lo Samaria kipon ryü. Anyugun le anyugun münhü thula, anyugun phi rürhen lo anyugun hüketa. Anyugun le shyeni lo tharünkenyü pe Kershvuka nyu Kershvu thyü titse sen hü.

⁶Tsügenyu Ishmael le chüo anyugun teno titse Mizpah nken chwi. A-le tsüdan ki keryü ka a-le zo, “Hagun cheno-e ryüo Gedaliah nrishülo.”

⁷Anyugun le nyidagü nyu yüryülo ntsin Ishmael lo a-temi dan le tsüdan dushvulao a-nyugun simin lope zülvu nme nyu shwen shüla.

⁸Ai temi dan nyu mitseryü le Ishmael ka zo, “Ncheno-e agun we dushvu nyalo! Agun le thoshye, barle oliv terzü, lo khuzü dan pe low ki kebu njünyo.” Tsügenyu a-le tsüdan nrho shü.

⁹Ishmael le dushvukela simin pe shwen shükela zülvu tsü le nmhunsa, tsüle raja Asa le Israel raja Baasha le a-when keryü ka tsokethyü. Ishmael le simin pe tsü süla.

¹⁰A-le raja nyenyu tenunyuju lo Mizpah ki kebin a-sendan Nebuzaradan shüpahü so kedagü le anyugun lope Gedaliah no nuchalo tse pe tenyenkeshü aphu pe do thyüla. Ishmael le tsüdan lope donyu thyüo zen sen tse Ammon lojvü kepen ki güla.

¹¹Johanan lo rihü sharhidan aphu Ishmael le thyü mukela tsü nyülo.

¹²Tsügenyu anyugun le anyugun temi zen-o a-hü gü Gibeon ka zi keda nme khoka a-tsonkhinlo.

¹³Ishmael le zenkehü donyu dan le Johanan lo shüpahü kedadan hyukeshü ka, anyugun kenyüla.

¹⁴Tson-o ranio tin anyugun ki gü.

¹⁵Ai Ishmael lo a-temi mitetse dan le Johanan ben nyu tin-o Ammon kazü ki güla.

¹⁶Tsüselo Johanan lo shüpahü sokeda dan le Ishmael le Mizpah ka Gedaliah dushvukela siki donyu zenkelo, shüpahü dan, tenunyu, ntsenyu, lo kedanyu dan ntsen-o zenlo.

¹⁷Anyugun le Babilon nyu nshvu, kechamvule Ishmael le Babilon raja gü le pe kazü so Ahng thyükeshü Gedaliah dushvula. Tsügenyu anyugun le Ijipt ki Babilon nyu nrhi tinla nrün genyu tsonchü shü. Tson nenyu anyugun le Bethlehem khoka Chimham ka sun.