Read Southern Rengma Naga JEREMIAH 42 Bible Online

JEREMIAH 42 - Southern Rengma Naga bible

JEREMIAH 42

¹Tsüselo rihü keda dan, lo Karea nyugü Johanan lo Heshaiah nyugü Azariah le temi keda keshen aphu zenryüo

²aka zo, “Ncheno-e agun le nka kehi gü thyü shülo! Npugü ngun Sunggigü ka agun genyu hishüta. Ngun rhünkelo nyu aphu genyu hishülo. Gwengwa ka we ngun kechon hüle; ai ntsoka nle hyukebin hontse temi kerho nti sele.

³Npugü ngun Sunggigü no ngun no gü nrün lo nyuthyü nrün yo zo shüta,” tse zo.

⁴Ale zoni, “Gwasa, tsonlo. Hagun le zokethyü hontse ale Npugü ngun Sunggigü ka hiti, tson-o a-le lihi zolo ale hagun ka zoti. Ale thame pe hagun kebu loho.”

⁵Tsüselo anyugun le akazo, “Npugü, no ketsin lo joketsin nyu agun genyu shahu thyüo agun ntsunta,, agun le Npugü ngun Sunggigü le agun no thyülo tsekethyü nka zo-o agun le zenmvu la yatselo.

⁶Tsüle ngun kenyüe nmvue, ngun le nno ngun genyu hilo tse kebin Npugü, ngun Sunggigü jo zenti. Tha aphu ngun genyu gwati, ngun le a-jo zen yatselo.”

⁷Jon tseryü sika Npugü le aka zo;

⁸Tsügenyu ale Johanan, lo rihü keda a-zenkehü nyu aphu lo temi kecha aphu koshü.

⁹Ale anyugun ka, “Npugü, Israel Sunggigü, hagun le ano a-ka hilo tse nikeshü gü le zo,

¹⁰‘Hagun le kazü higü nyu yhun bin nyü yatselo ale hagun thyü nso shüti, hagun süshe loho; ale hagun pe senshüti, phüla loho. Ale kenke zen ryüo hagun gen keshü tsü genyu anyunkenjün thyüsa laso.

¹¹Babilon raja nshvu nyagwen. Ale hagun zen hünyo, lo ale a-kekvu nyu hagun kenishwi loti.

¹²Ale shwinjün sa kehü genyu, ale a-no hagun shwi njüo hagun no kaki rani lati. Ale Npugü, tsü zo laso.’

¹³“Ai hagun Juda nyu khekeladan we Npugü hagun Sunggigü jo zenmvu nmvue kazü higü nyu yhun mvu letse nya. Hagun le hihontse zonya, ‘Nmvu, ngun gungü Ijipt ki yhunti, tsü nyu teri teno sin mvuso, nmvue teri nyu ko kethyü khwenyü loho, nmvue nnyon loho.’ Hagun le tson zolo, Kekvutsin Npugü, Israel Sunggigü le hihontse zobin, ‘Hagun le Ijipt ki yhuntin kela rüchünlo yatselo.

¹⁶Tsüselo hagun le nshvu kehü teri gü tsü le hagun so kvulo lati, lo hagun le nshvu kehü kennyon gü tsü le hagun then-o hagun le Ijipt nyu silati.

¹⁷Ijipt nyu güo tsü nyu yhun titse rüchün kehü nyu aphu teri, nmvue kekhün nmvue kethyükenyü nyu siti. Tsüdan nme-e yhunloho nme-e ale kenke nipe anyugun gen shü titse kebin gü nrhilo ho.’

¹⁸“Npugü, Israel Sunggigü le zo, ‘A nyunkekhü kenthün pe Jerusalem temi so jakeshü hontse, hagun le Ijipt nyu gü yatselo anyunkenthün pe hagun gen jashüti. Me yhühyu nyu kenrin thyü, lo temi dan le hagun shwinyüo hagun zan lope shochün hontse zoti. Hagun le bin higü hyunimvu lati.’ ”

¹⁹Tsüselo ale zoni, “Npugü le hagun khepe Juda nyu bin kebin dan ka Ijipt ki nshye nya lotse zo laso. Tsügenyu hagun le

²⁰thyüzüsa bin letse zoshü bin nyo. Hagun le ano hagun sunka Npugü ngun Sunggigü ka hi lotseshü, lo a-le nyu thyü lotse zoyo thyü titse zoshwi njünyo.

²¹Lo ale hagun ka zola, ai hagun le Npugü ngun Sunggigü le ano hagun ka zo lotse nikeshü jo aphu zen mvu bin laso.

²²Tsügenyu hi rüchünlo: Hagun le güo yhun titse kebin kazü nyu tsü teri, kekhün lo kethyükenyü nyu silati.”