Read Southern Rengma Naga JEREMIAH 46 Bible Online

JEREMIAH 46 - Southern Rengma Naga bible

JEREMIAH 46

¹Npugü le senye dan rüla pe aka zo,

²Ijipt ka binzenlo. Higü hile a-le Ijipt raja Neko rihü rüla pe aka kezo, tsügü le Babilon raja gü Nebuchadnezzar le Jehoiakim le Juda raja thyükelo chenzi gü ka Eufrates züri khoka Karkhemish ka a-so kvu lola:

³“Ijipt kedanyu dan sen lo, ‘Hagun gida ndalo lo tsonchü teri nyu gülo!

⁴Hagun kerudan ketsenlo-o a-gen külo! Kethenlo-o hagun perün pvülo! Hagun mih yi thyülo! Hagun teri ronye pvülo!’

⁵Npugü le ketso, ‘Ai ale nyu hyula?’ “Anyugun le nshvuo rani bin laso. Anyugun shüpahü dan vü laso; anyugun le nshvuri lao, yhenthyüo tin bin lo ranio siki nri mvu.

⁶N mhesa kehünyue tinlo kemvui; shüpahü nyu le nrhilo kemvui. Teso kipon Eufrates ka, anyugun pha nsüo che lati.

⁷Nile hontse soryü, zürizhe ki-e da tsü kebin tsüle segü la?

⁸Tsüle Ijipt, Nile hontse soryü, züri a-zhe ki-e da tsü bin. Ijipt le zo, ‘Ale so-o kazü kesü thyü shüti; Ale nyida dan lo tsünyu yhun kebin dan-e nke lati.

⁹Kerudan no gülo lo terigari dan no hülo! Shüpahü dan nishwi shü: Sudan lo Libia kipon gida kepvünyu lo Ludia ki tholevü pen keshanyu.’ ”

¹⁰Hile Kekvutsin Npugü jon: a-le nthu a-khün loti; nthu a-le shaja pe a-kenrhinyu tsüti. A-zhethon güle a-gin nyülo kemvuthen anyugun tyü, lo anyugun zi tsüo ryünyun lo kemvuthen tsüti. Nthu Kekvutsingü le a-jon penlo mvu kelanyu pe kershvu thyü bin; tesoki Eufrates züri ka.

¹¹Ijipt temi dan, Gilead ki gülo tson-o dawa fülo! Hagun dawa aphu senmvue kegwai thyü laso; thame pe nthyü ngwa lohoso.

¹²Senyedan le nkejokepvü nyülo; temi aphu nkechü khwen nyü laso. Shüpahü nmele kechanyu nrhülo tson-o mihvu nren kazü nyu che.

¹³Babilon raja Nebuchadnezzar le Ijipt when ryü kethyü ka Npugü le aka zo. A-le zo,

¹⁴“Ijipt rünyi, Migdol, Memfis lo Tahpanhes dan ka hilo pe tephu shülo: ‘Hagun npvü hagun ketsenlo nrün ndalo; hagun hon aphu teri nyu nke lati!

¹⁵Nyuthyüo hagun tero kekvugü Apis le chela la? Npugü le a-vüshe laso!’

¹⁶Hagun shüpahü le pha nsüo nto laso; nme le nme ka zo-o, ‘Nmhenlo! Kaki ngun temi ki gun lao kenrhinyu zhethon nrhila tile!’

¹⁷“Zen keshün nme pe Ijipt rajagü tsülo-- ‘Nra nrio gwünkho gwenzüla kehügü.’

¹⁸Kekvutsin Npugü, ahigü le raja. Ale rhünkehü Sunggigü. Tabor thun le kazüthun dan nye tetso lo Karmel kazüthun le zida nyeki tetse kvu kethyü hontse, hagun whenkehü kekvu le tsonti.

¹⁹Meno hagun tenzen-o dothyü tinla nrün ndolo, Ijipt temi dan! Memfis lope yhunkemvu bin, nkelao mele hükemvu bin thyü lati.

²⁰Ijipt le methulü kezegwa hontse, ai tesozin khu le when tsüryü jünyo.

²¹A-le jonshye zenkehü shüpahü dan-e kekvu ndi pe methu nyu hontse laso. Anyugun le so-o nren mvula; aphu ranio tinlaso. Anyugun dyükezün jon, lo anyugun kenke gwünkho le ryü laso.

²²Kenrhinyu rihü le kho nni keryü ka, Ijipt nyu ketin khwen le peri khwen hontse. Anyugun le nri lope a-when, temi le senbin phen kebin hontse

²³lo chün kentsun nke kethyü hontse. Anyugun temi le chonrio swülo mvu; anyugun shüpahü le tsekhvu nye chon.

²⁴Ijipt temi dan le kejo pvüla; teso kipon temi no anyugun so kvula. Ale Npugü, tsü zo laso.”

²⁵Kekvutsin Npugü, Israel Sunggigü le zo, “Ale Amon, Thebes terogü lope Ijipt lo a-tero lo raja dan gen shaja pe tsüti. Ale Ijipt raja lo a-tenyen kehü nyu aphu tenlo,

²⁶tson-o tsüdan lope anyugun boshvula nyü kebin nyu Babilon raja Nebuchadnezzar lo a-rihüdan tsü lati. Ai kenkhin ki himhundyü hontseo temi le Ijipt nyu yhun niti. Ale Npugü, tsü zo laso.”

²⁷“Atemi dan, nshvunya, Israel temi, hagun kerü la nyalo. Ale kazü nithen ki tsü hagun keni shwi shüti, hagun le je tse bin-o nme-e hagun thyü nshvu loho.

²⁸Ale hagun ki ryüo hagun keni shüti. Ale hagun hüpe keshübin senyedan aphu nke lati, ai hagun we nrho shüti. Ale hagun no shaja thyü mvutse tin loho; ai ale shaja pe hagun ketsü ka, joketsin nyu thyüti. Ale Npugü, tsü zo laso.”