Read Southern Rengma Naga JEREMIAH 48 Bible Online

JEREMIAH 48 - Southern Rengma Naga bible

JEREMIAH 48

¹Higü hile Kekvutsin Npugü le Moab rüla kezo: “Njün keho Nebo temi dan-- anyugun rünyi nke laso! Kiriathaim lo a-chwida kenko dan boren la, lo a-temi dan le kejo pvü laso;

²Moab teshwen gü tsü le ndi laso. Kenrhigü le Heshbon lo lola lo tedo rhio Moab senye nkela titse bin nyo. Madmen rünyi le ma tse lati, rihüdan le tsü ntsunti.

³Horonaim temi le nrao, ‘Ketetsin! Kenke!’ tse bin.

⁴“Moab nke laso; ntsenyu ju le chükebin nyüshülo.

⁵Luhith ki kensin tson anyugun le chüo nso kethyü khwen, lo Horonaim kenshe tson ki nyungwa kemvu kechü khwen nyü bin.

⁶A nyugun le zo, ‘Nmhenlo, hagun keyhun genyu tinlo!’ ‘Tehen gada hontse tinlo!’

⁷“Moab, nle nkekvu lo nkenya tenyen hü, ai nso-e kvulo la tiso; n tero Khemosh le a-raja lo püshükeda dan sin-o dothyü tin lati.

⁸Rünyi nme-e kenke gü nrhi loho; kazü kenkun kazü ketejon aphu nke lati. Ale Npugü, tsü zo laso.

⁹Moab genyu pensolo sika tso nme; tsüle whütse nkela tiso le. A-rünyi dan le nkelao khela, tson-o nme-e tsünyu yhun nimvu lati.”

¹⁰(Temi a-nyun a-phu pe Npugü lothyü kemvugü swetsü lalo! Temi me dushvu lo boshvu kemvugü swetsü lo!)

¹¹Npugü le zoshü, “Moab le a-zintse kenshvu ndio yhun lo zen-o dothyüe hümvu. Moab le zu pe a-khinnyu shükenjü lo ja kelakenyon hükemvu hontse. A-rün kegwae nkela hümvu, lo tsü kegwa le a-zintse kenme.

¹²“Tsügenyu, gwünkho nme le ryüjü, tsünyü ale Moab temi dan pe zu hontseo ja lati. Tsüdan le a-nyugun zukhin gü nrunlao boren lati.

¹³Tsüselo Moab le a-tero Khemosh genyu kejo lati, Israel le Bethel tero tenyen hüo kejo pvükela hontse.

¹⁴“Moab temi dan, nyuthyüo hagun le kekvunyu, terithyü shwi kela shüpahü kepeche nyu letse hü nla?

¹⁵Moab lo a-nyida dan nke laso; a-dan nyu selo kegwatsin dan dushvu laso. Ale rajagü, Kekvutsin Npugü, lo ale zo laso.

¹⁶Moab dyükezün le ryüjü; a-kenke le whütse ryüjü laso.

¹⁷“Senye tsügü chechülo, a-khoka yhun kehüdan, hagun a-zankechwi shakehü ju. Hihontse zolo, ‘A-le kvusa tse meso gonkehü kekvugü borenla; a-zankechwi lo kekvu binsin mvu laso.’

¹⁸Hagun Dibon nyu yhunkehü nyu, kerühvu bin nyu tsenryüla lo kazü gen nnyon kemphü nyu dunlo; Moab nkela nrün gü le hiki hü lo nchwida kenko dan kecha lati.

¹⁹Hagun Aroer nyu keyhun nyu tson ki so-o khwenlo, tinkejünyu ka shün-o nyu thyüla seyo shalolo.

²⁰Anyugun le hagun jo kenio zoti, ‘Moab le che laso; ’ ‘Tsügü genyu chülo; tsüle kejo pvü laso. Arnon züri nyu Moab nkela sele tse zoshülo!’

²¹“Kenjün kethyü khvu le thunra ketejon nyida, Holon, Jahzah, Mefath

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth lo Bozra hidan gen ryü laso. Kenjün kethyü khvu le Moab nyida nithen lo khokeni aphu gen ryü laso.

²⁵Moab kekvu boshwen la, lo a-kedakethyü le nke laso. Ale Npugü, tsü zo laso.”

²⁶Npugü le zoshü, “Moab thyü nzeüla, kechamvu a-le a ntsun lo nren laso. Moab le a-npvü a-nyu kegwen ka yhonti, lo temi dan le shwinyüti.

²⁷Moab, nle dihontse Israel temi shwinyü hüyo rüchün bin mon? Anyugun lope mehon seü ketyünyu tenkelo hontse nle a-nthon kethyü ka npe pfükengü hü.

²⁸“Hagun Moab nyu keyhun nyu, hagun rünyi khela! Güo tsokhin ki yhunlo! Tegvü khoka a-seü thyükehü nsu hontselo.

²⁹Moab le ketekhori! Temi dan le ditsü lakhi ketekho, kemakin lo anyugun rüchün ngon lo anyugun rüchün ngwa hüyo ale nyülo laso.

³⁰Ale Npugü, anyugun kemakin shalaso. Anyugun le lihi kemvu genyu ketekho bin, lo anyugun le thyükehüdan tsüle bin thon loho.

³¹Tsügenyu ale Moab nyu aphu lo Kir Heres temi genyu chüti.

³²Ale Jazer temi nyeki Sebma genyu chü chonti Sibna nyida gü, nle vainro le Kesi Zida nken-o Jazer keti kethün gü kebin hontse. Ai ntso ka tsang nyün rasha lo n-vain sha le nke laso.

³³Moab kazü kebwen gü nyu shekerhün lo nyun kenyü sentin laso. Ale vain kethün bin nyu vain zu no tsun sinmvu lati; nme-e vainzu thyü lo shekerhün genyu sen kehü min ndiso.

³⁴“Heshbon lo Elealeh temi dan le nra, lo anyugun kenra khwen le Jahaz keti ki nyü logwa; tsüle Zoar ki temi dan nyü logwa, lo tsü le Horonaim lo Eglath Sheleshiyah keti-e nyülo gwa. Nimrim rinyue sin laso.

³⁵Ale Moab temi dan no tha rope kershvu lo rora thyü pe anyugun tero ketsü khinlati. Ale Npugü, tsü zo laso.

³⁶“Tsügenyu anyun nyu Moab lo Kir Heres temi dan genyu chekechü le temi peha le kheli khun-o simin kesun lü thyükebin hontse binla, kechamvule anyugun hon aphu ndikela genyu,

³⁷Anyugun aphu anyugun pe lo mün hü thu laso. Anyugun aphu anyugun ben jün pvüo ronphi ben bin nyo.

³⁸Anyugun kapesun aphu ka lo süda bin aphu nyu chekechü khwen a-me thame ndi, kechamvule nnyonla jonkho-o nme-e lonyü mvukela hontse ale Moab gen tson laso.

³⁹Moab le boshwen laso! Nra chwiryü! Moab le kejo pvü laso. Tsüle kechala, lo a-kho hunpvükebin senye aphu a-shwinyü bin. Ale Npugü, tsü zo laso.”

⁴⁰Npugü le zokeshü le senye nme le Moab gen logi le a-sekin sükhun pvü kehü hontse Moab gen tsüryüti,

⁴¹lo rünyi dan lo tsüdan chwida kekhwen dan lo lati. Tsünyü we Moab shüpahü le anyugun kershvu pe nyeginyu le nyuzen gü kejü hontse ti.

⁴²Moab nkelao senye nme thyü sin mvu lati, kechamvule a-le a ntsun kethyü genyu.

⁴³Kenshvu, chwekü lo chwa thyü pe Moab temi dan khwen bin nyo. Npugü le zo laso.

⁴⁴Kenshvu nrhi titse kehügü le chwekü nyu chela, thakü pela chwikenyü nyu le chwa nyu min lati, kechamvule Npugü le Moab kenke gwünkho thakela genyu.

⁴⁵Nrhikelo keche kendinyu le Heshbon nyu a-no kepen fü, nduka Sihon raja le gon kethyü nyu tsü, ai tsü le mah nyu nnyüla. Mah le Moab nyu teri thyünyü kehü temi dan senpvü lo anyugun kazüthun ra dan rolaso.

⁴⁶Njün keho Moab! Khemosh tero rüshvu kehünyu nkela, lo anyugun nyenyu peche tenu dan tenzen-o dothyü tinlaso.

⁴⁷Ai ryükejü jondan ka Npugü le Moab no gwakenye niloti. Npugü le thyü titse zokenjü dan hi aphu Moab gen thyüti.