Read Southern Rengma Naga JEREMIAH 5 Bible Online

JEREMIAH 5 - Southern Rengma Naga bible

JEREMIAH 5

¹Jerusalem temi ju, hagun tsonda nyu tin gwenlo! Nri ketishü! N npvü nrishülo! Hada bin nyu fügü shwita! Temi nme nti-e kenjü tho thyü kehü Sunggigü ka joketsin sen titse kehü hyulo gwa ole? Hagun le hyulo yatse kethyü we, Npugü le Jerusalem kemu jüpe tsüti.

²Hagun le Npugü rüshvu titse zohü, ai ketsin nyu zohü mvu.

³Ketsin Npugü le joketsin kesen fühü nyo. A-le hagun vüshü, ai hagun le tsü rüchün mvu; a-le hagun boren shü, ai hagun le tsü shalo mvula. Hagun nyun rülao hagun kemu nyu rani ryü mvula.

⁴Tsüselo ale rüchün, “Temi hidan hile njünkeho, thame shakemvu nyu sele. Anyugun le a-kemvu nti thyü; anyugun le Sunggigü le anyugun no thyü nyü kebin, lo Npugü tson shalo mvu laso.

⁵Ale kekvu nyu temi dan ka gü, anyugun zen kenthonti. Ketsin anyugun le Sunggigü le anyugun no thyükebin lo Npugü tson sha.” Ai anyugun aphu Npugü kekvu kenila lo a-khwen nyümvu laso.

⁶Tsügenyu shünyho le chün nyu chwiryüo anyugun tün lati; kazü kesi ki teken le ryüo anyugun shüthüsürü lati, lo Menren le anyugun rünyi nyu ho temi tsüdan le chwiryülo süthü lati, kechamvu anyugun kemu le chonrila lo gwenkechon anyugun Sunggigü kipon rani tinla.

⁷Npugü le shün, “Nyu genyu ale atemi kemu jülo tila? Anyugun le akhela lo tero ketsin kemvu rüshvu tinkela le. Atemi dan le anyugun gin nyülo kemvu then ale anyugun lüyi, ai anyugun le keyüla la lo anyugun gwünkho aphu pe keyüla nyu zen kengü tinla.

⁸Anyugun le kerutse a-thyü kegwa le chonyüsa kebin hontse, khinyu nyu kazon nyu nunyu nnyü hü.

⁹Ale tha hidan genyu shaja pe anyugun tsümvu lo senye hihontse kethyü ge khün lo mvuti ole?

¹⁰Ale shwikerüchün nyu nishüo anyugun no atemi dan vain low nke lati, ai anyugun no nke shüla loho. Ale anyugun no a-ro dan rhonla lotse zo lati, a-ro tsüdan le ahon kemvu genyu.

¹¹Israel lo Juda nyu le a nshwen sa laso. Ale Npugü, tsü zo laso.”

¹²Npugü temi dan le a-kenilao zo, “A-le ketsin thame thyü kemvui. Ngunle terithyü, nmvue chenda thyüla loho.”

¹³Anyugun le kezo le sidyüjokeshanyu le lihie kemvu, ai tsangkenbu khin lo Npugü kipon jolo thame ndi. Kekvutsin Npugü Sunggigü le aka zo, “Jeremiah, temi hidan le tson zo kethyü genyu, ale ajo no nmün nyu mah hontse shüti. Temi dan no tesen hontselao mah no anyugun robu lati.”

¹⁵Israel temidan, Npugü le nithen ki senye nme zenryüo nwhen titse bin nyo. Tsü le nduka nyu hükela senye kenko nme, hagun le anyugun khwen shakemvu nyu.

¹⁶Anyugun tholevü kepen nyu lo shüpahü kenko, me njün mvuo dushvula kehüju.

¹⁷Anyugun le hagun shyeni lo ketyüketsü nkela, lo hagun nyenyu peche-tenu dushvuti. Tsüdan le hagun senru dushvula, hagun vain lo kherobin dan nke lati. Hagun le rüchün pe hagun dyü nyenkehü nyida dan tsüle rihü nyu le nkela ti.

¹⁸Npugü le zo, “Tsü jon ki-e ale atemi nkeshüla loho.

¹⁹Jeremiah, anyugun le nyuthyüo ale tha hidan thyülayo tse shün yatselo, nle anyugun ka, anyugun le akipon ranio anyugun npvü anyugun kazü nyu sin rünyi kecha tero lothyü tinkela genyu anyugun no shakemvu nyu kazü nyu tsüdan go thyü tile, tse zola nye.”

²⁰Npugü le zo, “Jakob tsipwen, lo Juda temi ka zoshülo:

²¹Nyü kegwa thyülo, hagun kepin kerügünyu,a-yhütyü le bin-e hyuhü kemvu, lo a-nyetin le bin-o nyülo hü kemvu dan.

²²Ale Npugü le, nyugenyu a-nshvu hümvu la? Nle nyugenyu a mhundyü nyu ndün mvula? ale hachon pe züda rhi thyü, a-no tsü nken mvu nrün genyu no tson bin tin laso. Züda le nnun yatse-e tsü nkenlo kemvui,” zükentyü le nho ryüe tsü kenyoshyelo hoso.

²³Ai hagun temi juwe! Hagun we nyunrü lo me ntsun hü; hagun le ranio akhe laso.

²⁴Ale serü lo tsenbwen gwünkho khishü hüe hagun we arühvu kethyü rüchün-e hümvu.

²⁵Tson kethyü gü mvuo hagun kemu le hagun gen tha kegwa hidan khinla hünyo.

²⁶“Temi gwakemvuju le atemi dan nyu yhun hü; tsüdan le tegü kensen nyu hontse joh pe süren hü, ai anyugun le temi minlo titse anyugun chwa pe nsen hünyo.

²⁷Tegü kethyü nyu le tegü pe a-thakhvu süpvü kehü hontse, tsüdan le mehon seü pe anyugun ka sülo laso. Tsügenyu anyugun le kvu lo nnya,

²⁸leyi kegwa thyü lo da laso. Anyugun tho gwakemvu le a-keni ndi. Tsüdan le tegonyu kenjü pe tsümvu nmvue kemeni kehü nyu genyu joketsin jo hümvu.

²⁹“Ai ale, Npugü, ale tha hidan genyu shaja pe anyugun tsü ti; ale senye higü ge khün loti.

³⁰Kazü higü gen kenrin lo nkerü kethyü thyü laso:

³¹Sidyükejonyu le kenku nti zo; püshükedanyu le sidyükezo nyule zokeshü then-o keda thyü, lo atemi le thame kenyo mvu laso. Ai tha tsüdan aphu kenigü le keryü ka anyugun le nyuthyü mon?”