Read Southern Rengma Naga JEREMIAH 50 Bible Online

JEREMIAH 50 - Southern Rengma Naga bible

JEREMIAH 50

¹Higü hile Npugü le Babilon nyida lo a-temi dan rüla pe aketsü:

²“Jolo pe senye dan ka zolo! Tsü tephu shülo! Tha zansü khishü lo zolo tsü zolo! Tsü pe kebula nya! Babilon le che laso! A-tero Marduk boren laso! Babilon teromen dan le kejo pvüla, a-thamen kentsükenchen dan le boshwen laso!

³“Teso kipon senye nmele Babilon when titse ryüla lo tsü lope kazü kesi thyü lati. Temi lo senrudan le tinla, lo nme tsünyu yhun mvu lati.”

⁴Npugü le zo, “Tsü gwünkho ka Israel lo Juda temi kenyhun nren chüo anyugun Sunggigü ahigü fü ryüti.

⁵Anyugun le Zion ki kegü tson ketso-o tsü denzin güti. Anyugun le azen-o kethonthen genyu kejozenlo tson-o tsü gwenrho mvu lati.

⁶“Atemi dan le tanyü kekhwenyu le a-tanyü no kazüthun ki nmhon kela hontse le. A nyugun le tanyü hontse nmhon-o kazüthun nme gen kela sen-o kecha ki gü, lo anyugun ka le dikipon yo nmhin laso.

⁷Anyugun kehyu nyu aphu anyugun when. Anyugun kenrhinyu le zo, “Anyugun le mupe Npugü ntsunla, tsügenyu ngun le thyükeshü tsüle thyüzü lamvu. Anyugun bonnyu le Npugü tenyen hü, lo anyugun-e a-ka joketsin senbin hü züle.’

⁸“Israel temi dan, Babilon nyu mhundyü tinla! Kazü gü nken lalo! Tin keritsin gü thyülo!

⁹Ale teso kipon senye kenko dan me thukeyhun pe no Babilon nyu whenti. Anyugun le terinyu kesithen-o kazü tsügü when-o lola. Tsüdan le thyü hükeshanyu tholevü tsi kvu shüe jonzüla hükemvudan le.

¹⁰Mele Babilon nyu hon seü lo lati, lo tsü seükelo nyu le anyugun kenyü aphu khiloti. Ale Npugü, tsü zo laso.”

¹¹Npugü le zo, “Babilon temi dan, hagun le asenye nkela. Hagun le hagun kenyü lo sherhün-o methu le shye nyu nmvue keru le khun kebin hontse binnyo,

¹²ai hagun nyida kedagü tsüle kemeni lo kejo pvü lati. Babilon le senye dan nyu keshentsin thyü lati; tsü le zü kendi kazü kesi thyü lati.

¹³Anyunkenta genyu temi nme-e Babilon nyu yhun mvu lati; tsüle khe lati, tsü nken kegü nyu tsü hyuo a-kerü lo dunthyüti.

¹⁴“Tho levükepennyu, Babilon zen teri thyü nrün genyu kesithen lo, lo tsü hunlo. Hagun tho tsi aphu kvupe Babilon jonlo, a-le mupe Npugü, ahigü ntsunkela genyu.

¹⁵Teri khwen thyüo nyidagü aphu hunlo! Babilon le me ben nyu yü laso. A-chwida le chela lo nren laso. Ale Babilon nyu ge a khün lobin nyo. Tsügenyu anyugun gen hagun khün lolo, lo anyugun le me gen thyü keshü hontse anyugun gen thyüshülo.

¹⁶Thatsi pe kazü tsünyu shü nya nmvue low-e gvü nya. Rünyi kecha tsünyu kebin nyu le rihü le when kebin tsü nshvuo ka ki rani lati.”

¹⁷Npugü le zo, “Israel temi dan le shünyho le tanyü when-o hükezen kela hontse. Kerigü le Assiria raja gü le anyugun when, tsü sika Babilon raja Nebuchadnezzar le anyugun ru boshwenla.

¹⁸Tson kethyü genyu Kekvutsin Npugü, Israel Sunggigü, ahigü le Assiria rajagü gen shaja pe keshü hontse raja Nebuchadnezzar lo a-kazü gen shaja pe tsüti.

¹⁹Ale Israel temi dan zen ni ryüo anyugun kazü nyu shü lati. Anyugun le Karmel kazüthun lo Bashan lojvü ki nshakelo dan tyü, lo anyugun le nnyükehü rasha dan Ephraim lo Gilead lojvü nyu nshakelo aphu tyüti.

²⁰Tsü gwünkho le keryü ka Israel ki kemu nmvue Juda nyu gwa kemvu nme-e hyu mvulati, kechamvule ale nsen keshü keyhun ronzin dan kemu jüpe tsüla nrün genyu. Ale Npugü, tsü zo laso.”

²¹Npugü le zo, “Merathaim lo Pekod temi dan whenlo. Anyugun dushvu lo nkelalo. Ale hagun ka zokeshü aphu thyülo. Ale Npugü, tsü zo laso.

²²Kazü tsügü nyu teri khwen tsebin, lo tsünyu tha nkesa bin.

²³Babilon nyu le kazü apentha vüshwenla, lo ntsoka kejongi gü tsü bokho laso! Senye aphu kazü tsügü gen thyükela tho genyu kerü laso.

²⁴Babilon nyu, hagun le azen kega, tson-o ale hagun nsenkenjü chwa nyu tsü hagun le shamvuo minlo la.

²⁵Ale terironye ka khinshe shü, tson-o anyunkenta nyu tsüdan sen chwiryü, kechamvule Aphu sokekvu Npugü, Ahigü le Babilon nyu tha thyü mvulo keshvu le bin.

²⁶Lizin hizin aphu hunlo-o sürhen yülo! Kanyü seükelo dan lope shye hontse nthunlo. Kazü gü nkela! Thame nsen nya!

²⁷Anyugun shüpahü aphu boshvula! Anyugun dushvula! Babilon nyu temi le thyü lo so! Anyugun no shaja hyu mvulo keshvu gwünkho le ryü laso.”

²⁸(Babilon kazü nyu tinkelo temi dan le Jerusalem ki ryü, tson-o Npugü ngun Sunggigü le Babilon temi le a-Kershvuka gen thyükeshü genyu dihontse a-khünlo lo yo pe zoshü.)

²⁹“Tho levükepennyu ka zo-o no Babilon whenlo. Tho levü lo a-tsi senkesha nyu aphu nishwi shülo. Nyida gü hunlo-o nme-e no tin nya. A-le thyükeshü tho aphu pe tsü nilo, lo a-le kechanyu gen thyükeshü hontse a-gen thyülo, a-le ketekho-o Israel Kenshüngü, ahigü ntsun kethyü genyu.

³⁰Tsügenyu nyida gü tsonda nyu selodan dushvuti, tson-o tsünyü a-shüpahü dan nke lati. Ale Npugü, tsü zo laso.”

³¹“Babilon nyu, ketekho le nsü laso, tsügenyu Aphu sokekvu Npugü, ahigü le n ntsun bin nyo. Ale shaja thyü pe ntsü nrün gwünkho le ryüla so.

³²N senye ketekho kehü güle pha nsüo ntoti, lo nme-e nkeche-o nsü soshü loho. Ale mah pe n nyida dan ro-o tsüdan tekehun aphu nke lati.”

³³Kekvutsin Npugü le zo, “Israel lo Juda temi dan le mele anyugun nshwen la. Au lokelo nyule au kho nnisao rikhun bin, lo anyugun no tin kemvui.

³⁴Ai anyugun kenishwishü nrün gü le kvu-- a-zan le Kekvutsin Npugü. A-le anyugun nopen-o kebwen zenryüo kazü gü nyu shü lati, ai kenjün kethyü zenryüo Babilon gen shüti.”

³⁵Npugü le zo, “Kesi no Babilon gen gülo! Kesi no a-temi gen, kekvu kesennyu, lo kensü nyu gen gülo.

³⁶Kesi no tsünyu kenku sidyü kezo nyu gen gü-- anyugun le ditsüki pinla! Kesi no a-shüpahü gen gü-- anyugun le ditsü laki nshvula!

³⁷A-keru lo terigari dan nkelalo! Kesi no jonshye zenkehü shüpahü gen gü-- tsüdan le kvumvu pe dihontse la! A-kenya dan nkelalo; tsü seü lo khilo lalo.

³⁸Tsangken zenryüo a-kazü gen shülo lo a-züri dan thyü nsinla. Babilon le teromen ketetsin le bin, lo temi thyü npin kela kazü le.

³⁹“Tsügenyu terodan lo gwakemvu kapudan, lo tegü nshün kemvu no Babilon nyu hüti. Kethonthen temi no tsü nyu yhun nimvu lati.

⁴⁰Ale Sodom lo Gomora hvu lo au tekehun rünyi dan nke kethyü ka au gen thyükeshü hontse Babilon gen thyü shüti. Temi nme-e tsünyu yhun nimvu lati. Ale Npugü, tsü zo laso.

⁴¹“Tesokipon kazü nme ka temi le ryüjü, nithen ki senye kekvu nme; rajanyu kechon le teri genyu ndobin.

⁴²Tsüdan le tho levü lo zhethon khilo laso; anyugun le rigwamvu lo shwinjün hükemvu dan. A nyugun le keru dan gen kekü khwen le zida kentyü hontse. Anyugun le Babilon zen-o teri thyü nrün genyu ndobin.

⁴³Babilon raja le jolo nyülo, lo a ben pensolo mvula. A-kenjün kethyü le tenunyu nyu kezen kenjün kethyü hontse lola.

⁴⁴“Jordan züri kerhon chün kentsun nyu shünyho le shai kenjvü gü ka chwi ryü kejü hontse Npugü ahigü le ryüo Babilon temi no whütse anyugun nyida nyu tin lati. Tsüsika ale kejükelo sharhigü le senye tsügü ketsenti. Segü pe a ndyü lomon? Segü le pecheo akhenlo tila? Keda dihontse kethyü le a ntsunlo mon?

⁴⁵Tsügenyu ale Babilon nyida gü lo a-temi dan genthyü titse rhikelo gü nyü shü. Anyugun nyenyue süshwi lati, tson-o aphu no kerüshvu lati.

⁴⁶Babilon le che kethyü ka a-khwen le kazü apenthae pvükeni lati, lo kenshvu kenra khwen le senye kecha ki-e nyü loti.”