Read Southern Rengma Naga JEREMIAH 52 Bible Online

JEREMIAH 52 - Southern Rengma Naga bible

JEREMIAH 52

¹Zedekiah le chen nki nme ka Juda raja thyülo, lo a-le chen tseryü nme Jerusalem nyu kekvu sen. A-jvü zan le Hamutal, Libnah nyida nyu yhun kehü Jeremiah nyugi.

²Raja Jehoiakim le kethyü tho hontse raja Zedekiah le mupe Npugü ntsun.

³Npugü le Jerusalem lo Juda temidan gen a-nyunta salao a-mhundyü nyu anyugun hüla. Zedekiah le Babilon Raja gü Nebuchadnezzar ntsun sola,

⁴tsü genyu Nebuchadnezzar le a-rihü aphu zenryüo Jerusalem when, tsüle Zedekiah le raja thyükelo chen tekü ka shye tseryü gü jon tseryü nyü. Anyugun le nyida n gwen ki kensenbin thyü, lo chwida khwen pe tsü hunlo,

⁵lo tsü hontse khin bin-o Zedekiah keda chen tseryü nme ti.

⁶Tsü chen shye zigü jon tekü nyü chenda ketetsin, thyüsolao temidan le thame tyü nrün ndilao,

⁷nyida gü chwida dan runphe chwila. Babilon nyu le nyida gü hunbin-e shüpahü aphu kheje gwen tin küla. Anyugun le raja chwi tson nyu sen-o chwida hiehvu thyükensü kebin Khinrun gü nyu chwio Jordan ketejon kipon tinla.

⁸Ai Babilon rihü le raja Zedekiah hü gü Jeriko khoka kazü ketejon nyu a-tenlola, lo a-shüpahü aphu a-khela.

⁹Zedekiah zen gü Raja Nebuchadnezzar le Hamath lojvü nyu Riblah nyida nyu kebin a-tsüla, lo tsünyu Nebuchadnezzar le a-jünkera.

¹⁰Riblah ka Zedekiah yhühyu ka a-nyu dan boshvula lo Juda kedanyu dan ko pe hüla.

¹¹Tsüsika a-le Zedekiah yhütyü tseritho lao ron pe a-dyüzen-o Babilon ki güla. Zedekiah le Babilon dokanyu bin-o a-kesi ti.

¹²Babilon raja Nebuchadnezzar le raja thyükelo chen tseryüo tekü ka shye pvün gü jon ryü nyü, Nebuzaradan, raja tharhinyu lo a-rihü so kedagü le Jerusalem nyu yüla.

¹³A-le Kershvuka, raja ka, lo Jerusalem nyu temi kentsen nyu ka aphu rola;

¹⁴lo a-shüpahü le nyidagü chwida dan borhola.

¹⁵Tsüselo Nebuzaradan le nyida gü nyu kebin thathyü keshanyu lo Babilon kipon gü kela dan tenzen-o Babilon ki güla.

¹⁶Ai a-le rhokedyü tsin nyu, tha kendinyu peha khepe Juda nyu binla, tson-o a-le anyugun no vain chwi lo low nyu thathyü lotsela.

¹⁷Babilon nyu le Kershvu kanyu lazo kachon dan, lo lazo zükhun lo a-ketunbin dan lo lazo aphu pvüo Babilon ki güla.

¹⁸Anyugun le Kershvuka sho kenshün kethyü kanyü kekinkhun, lo kequenkehü la dan, mah kemben kanyüdan, senru dushvu pe kershvu zi shükehü khin, tharün kenyi rope kershvukhun, lo Kershvuka nyu senkehü lazo kenyü dan aphu pvü tinla.

¹⁹Anyugun le suna lo rükagi pe kethyü khun keshendan, mahgi kenhon kepen khindan, senru dushvu pe kerüshvu zi shü kehü khin, jonbü keshü khun, mah kenben bindan, tharünkenyü rope kershvukhun, lo zu pe kerüshvu ka senkehü khun aphu pvütinla.

²⁰Raja Solomon le Kershvuka genyu kethyü lazo kanyüdan--tsüle kachon kenyhun, zükhin ketunbin, zükhin kedagü lo tsü rhunpvükebin methutse tseryü kenyhun dan--tsüle nsu rio sülomvu.

²¹Kachon kenyhun gü we shabin: kenyhun nren ketetso le meter 8 lo keda le meter 5:3. Tsühvu le a-küpvü lo tegi kesü le melimeter 75, kachon shahvu pe kesen lazo pe kethyü ketetso le meter 2:2, lo a-kehun aphu khüratyü sha thyü pe nthyü bin, lo aphu lazo pe kethyü.

²³Kachon nmeme raki aphu kesin-o khüratyü tsinme le bin, lo henteküo tsero le kazü nyu bin-o hyuhü.

²⁴Yie so kedagü Nebuzaradan le püshükedagü Seraiah, a-hensin kebin gü Zefaniah, lo Kershvuka nyu keda kentsen mishen tenzen-o tinla.

²⁵A-le nyida tsügü nyu shüpahü so keda thyü kebin gü, raja tharhinyu mitsenyü tin mvuo nyida gü nyu kebin, lo keda thyü kebin gü kechegü, rihüdan tho kethu kipon kedagü, lo temi kentsen kecha mi hentsero dan tenzen-o tinla.

²⁶Nebuzaradan le tsüdan zen gü Riblah nyida nyu Babilon rajagü kigü,

²⁷tsüle Hamath lojvü nyu. Tsünyu rajagü le anyugun vüo boshvula. Tson-o Juda temi dan anyugun kazü nyu anyu tenzen-o dothyü tinla.

²⁸Higü hile Nebuchadnezzar le zen-o dothyü tinkela temi dan rüla thu kelo: A-le raja thyükelo chen tsenyü gü ka temi 3,023 zen tin;

²⁹Chen tseryüo tetse güka Jerusalem nyu min 832;

³⁰lo nki kenshen chen 745 zen tinla. Temi aphu kesin-o 4,600 zentinla.

³¹Evilmerodak le Babilon raja thyükelo chen Judanyu raja Jehoiachin shwi njün-o dokanyu a-khishwi shü. Tsüle Jehoiachin tenzen-o dothyü kegü chen shenryüo tsenyü gü shye tseryü kenyhun gü jon nkipvün nyü.

³²Evilmerodak le a-shwi njün-o Babilon nyu dothyü kebin rajanyu kecha nyeki a-rühvu kvushü.

³³Tsügenyu a-no donyu phinya senmvuo a-rhünthen raja gü miz nyu tyütsü tinla.

³⁴A-le yhunkebin then a-no senmvulo keshvu pe a-tsüzin tinla.