Read Southern Rengma Naga JEREMIAH 6 Bible Online

JEREMIAH 6 - Southern Rengma Naga bible

JEREMIAH 6

¹Benjamin temi dan, hagun kenilo nrün genyu tinlo gwen che! Jerusalem nkenla gwen! Tekoa nyu shu khunshü lo Beth Hakherem nyu mah thyü pe zansü thyüshü lo. Kenkekemhü le tesozin ryüjü laso.

²Zion nyida le zegwasa, ai tsüle nkela tiso;

³raja ju le anyugun rihüdan zen-o tsünyu nsenti. Tsü dan le nyidagü hun-o phika thyüti,nmeme tse a-le dika bin nyüyo binti.

⁴Anyugun le zoti, “Jerusalem when nrün genyu nda lo! Gwen ndalo! Ngun le nhennyu whenti le!” Ai anyugun le zoniti, “Ntsüri laso, tsangkeben le ndi güjü tsin laso, lo ngwen shye le thon bin laso.

⁵Ngun khejeki whenti; ngun le nyidagü chwida borhola tile.”

⁶Kekvutsin Npugü le raja hidan no Jerusalem lola nrün genyu senbin phün pe rikhunbin jwen lotse zoshü laso. A-le zo, “Nyida higü le me kenshwen chonri kela genyu ale shaja pe tsü tiso.

⁷Zülvu nyu zü le chwiryü kehü hontse Jerusalem nyu gwakemvu le chwiryü bin nyo. Nyida hinyu me kenyükemvu tho kethyü lo kenke khwen nyülo bin nyo; kehokenyü lo kejünkeja a phu ale hyu bin.

⁸Jerusalem nyu temi dan, kenjünkethyü higü gen tha shalo, nmvu yatse kethyü we ale keli shüla tiso; ale nnyida no mele yhunhü kemvu bin kazü kesi thyü lati.”

⁹Kekvutsin Npugü le aka zo, “Israel nkeshü pe no vain low nyu a-sha lübu kela hontse lati. Tsügenyu nle gwünkho le bin ketseka nmeme tse kenishwilo kegwathen thyü mvuloshvu.”

¹⁰Ale keni-o, “Ale anyugun ka zo-o petsülo lotse ai següe akhwen nyüshü mvu ado? Anyugun le nyunrü lao nkhwen nyümvu letsela sele; tsüdan le nle ano zolo tse kethyü tsü shwinyü kehü le.

¹¹Npugü, anyugun gen nnyunkenta le aro binnyo, lo ale tsü nyhenthon loho sele.” Tsüselo Npugü le aka zo, “A nyunkekhü jape tsonda nyu ntsenyu dan, lo selo kequen kebin bin gen shülo. A-nyepvü a-nu zen tin lati, lo kethen ketsin nyue nrhoshü loho.

¹²Anyugun ka low, lo a-nunyue pe me tsü lati. Ale kazü hinyu temi dan gen shaja pe tsüti.

¹³Kedakeshen aphu joketsin sen mvuo pisa hyulo titse; tsü ntimvule sidyükezonyu lo püshükedanyue me sa hünyo.

¹⁴Anyugun le a-temidan tejün shvu tsü lope lihi kemvu hontsela hünyo. Lo aphu le gwa bin mvue ‘Aphu gwa bin le,’ tse hü nyo.

¹⁵Tsüdan le kentsükenchen tha hidan kethyü genyu kejola le? Nmvu, anyugun le kejo mvushü; anyugun le kejo kethyü jvue shamvu. Tsügenyu anyugun ko kechanyu le chekela hontse che lati; ale shaja pe anyugun tsü yatselo, tsü le anyugun keni thyü lati. Ale Npugü, tsü zo laso.”

¹⁶Npugü le a-temi dan ka zo, “Tsoncho nyu so-o nrilo. Nduka tson lo tson kegwatsin le dikiyo shünlo. Tsünyu tson chülo, tsonlo hagun le bwennye tse yhun loti.” Ai anyugun le zo, “Nmvu, agun le tson mvule!”

¹⁷Tsüselo Npugü le rikhunnyu no petsü lo lotse shu khun keshü khwen nyü nrün kejüshü. Ai anyugun le, “Agun le nyü loho,” tse zola.

¹⁸Tsügenyu Npugü le zo, “Nyülo, hagun senye dan, atemi gen nyu thyüla tiyo shalo.

¹⁹Nyülo, kazü gü! Temi hidan le a senkethyü jo kenila lo ajo zenkemvu genyu ale shaja pe anyugun gwakemvu gen shüti tse binle.

²⁰Anyugun le Sheba ki tharün kenyü senryü nmvue nithen ki rünkegwa senryü bin-e ale tsü sümvu. Anyugun le kershvu kethyü lo loho, nmvue rope kerüshvu nyu akenyü mvule.

²¹Tsügenyu ale temi hidan no pha nsüo che lati. Me pvünyu lo anyenyu, a-pvünyu lo a-kazon nyue silati.”

²²Npugü le zo, “Tesozin tsipwen dan le ryüjü; nithenki senye kenko nme le teri genyu ndobin.

²³Anyugun le tholevü lo jenthon penlo laso; tsüdan le rigwamvu lo shwikenjün ndi. Anyugun le keru gen kükelo khwen le züda kenho khwen hontse. Anyugun le Jerusalem zen-o teri thyü nrün genyu gwen ndo lo so.”

²⁴Jerusalem temi ju le zo, “Ngun le jolo nyülo binso, ngun ben le kvumvu laso; nyeginyu le nyu zengükejü ka kenjünkethyü hontse nyun kenjünkethyü le ngun phinlo laso.

²⁵Ngun le tegwenki chwi nmvue tson nyu holo shvuso, kechamvule kenrhinyu le ronye pvüo ngun hunpe kenshvu thyü laso.”

²⁶Npugü le a-temidan kazo, “Ronphi ben lo-o jonbü nyu yhonlo. a-nyu pechenyu nme nti kesi chekechü hontse chü sa lolo, kechamvule nke titse kehünyu le nmhensa ryüo hagun when tiso.

²⁷Jeremiah, tegi kegwakeshvu keshwi hontse atemi shwilo, tson-o anyugun le dihontse yo shalo.

²⁸Anyugun aphu nyun rüo me nren kehünyu, lazogi nmvue tegi hontsele. Anyugun aphu me selü thyüo gwalo mvu laso.

²⁹Mahmin kero le n nyü sala hünyo, ai tegi gwakemvu dan we nyuo tinla hümvu. Atemi dan thyü kenshün bin-e kechwi ndiso, kechamvule temi gwakemvu dan khila kemvu genyu.

³⁰Anyugun lope tegivü le tse lati, kechamvule Npugü, ahigü le anyugun kelikela genyu.”