Read Southern Rengma Naga JEREMIAH 7 Bible Online

JEREMIAH 7 - Southern Rengma Naga bible

JEREMIAH 7

¹Npugü le anipe Judanyu le güo rüshvu kethyü bin Kershvuka khenpvü nyu shü. A-le ano tsünyu so-o kekvutsin Npugü Israel nyu Sunggigü le zokeshü jo pe teshashü lotse shü: “Hagun keyhun lo hagun thodan kelulo, tson yatselo ale hagun no hinyu yhun binti.

⁴‘Agun le kenshvu ndi! Hile Npugü Kershvuka, hile Npugü Kershvuka, hile Npugü Kershvuka le!’ tse kethyü kenku jo tsü tenyen sin nya gwenlo.

⁵“Hagun keyhun jvü kelula lo hagun thodan thyüsin nya gwenlo. Hagun khinyunyu gen kenjü tho thyü hülo.

⁶Hagun le tesin, tegonyu lo maginyu kenshwen khelalo. Kazü higünyu kemu kendi nyu dushvu sin nya. Tero kechadan rüshvu sin nyagwen, kechamvule tsüle hagun nke lati.

⁷Keshanyu laka hagun le kelulo lo hagun no ale kazü khipe kethonthen hagun hon thyü lotse pe hagun bonnyu ketsü higünyu yhun hüti.

⁸“Hire, hagun le kenku jo tenyen hünyo.

⁹Hagun le rühu, me dushvu, keyüla, nkuo swen,lo himhundyü ki hagun le shahü kemvu tero rüshvuo thape Baal tsü.

¹⁰Hagun le ale ntsükehü tho dan hi thyü lo ryü a Kershvuka nyu amhundyü ka so-o aka hihontse zohünyo, ‘Agun le kenshvu ndi!’

¹¹Hagun we a Kershvuka tsü le mehon seüketyünyu kekebu bin letse hüle? Hagun le thyükehütho ale hyu laso.

¹²Ale kerigü ka tsünyu rüshvulo tse kejükelo bin Shiloh nyu gü, tson-o atemi Israel kemu genyu ale nyu thyü layo nrishüta.

¹³Hagun le kemu hidan aphu thyüla, tson-o ale hagun ka zonini kethyü siki-e nyü mvula. Ale hagun keko kae khin mvula.

¹⁴Tsügenyu ale Shiloh ka nyu thyüla yo tsühontse kethyü pe hagun le tenyen kehü a Kershvuka hinyu ko thyü shüti. Ale khipe hagun bonnyu ketsü bin hinyu ko ale Shiloh ka thyükeshü hontse shüti.

¹⁵Ale Israel nyu, hagun shvunye hüshwikela hontse amhundyü nyu hagun hüshwi lati. Ale Npugü, tsüzo laso.”

¹⁶Npugü le zo, “Jeremiah, temi hidan genyu hinya gwen. Anyugun sunka hi nmvue chü nya; aka hinya, ale nkhwen nyülo hoso.

¹⁷Anyugun le Juda nyida dan lo Jerusalem tsonda dan ka nyu thyü bin yo nle hyu mvu ole?

¹⁸Ntsenyu ju le tesen lü, pelünyu le mah thyü lo nyeginyu le tho nyen pe Tsangge Rajagi letse kokehü tero genyu kek ro. Lo anyugun le a nshwen titseo zue khipe tero kecha rüshvu hünyo.

¹⁹Ai anyugun le nshwen kebin gü tsüle ale ole? Nmvu, tsüle anyugun npvü anyugun nshwen-o kejo kepvü sen ryüo shü bin nyo.

²⁰Tsügenyu Aphuso kekvutsin Npugü, ale a nyunkekhü jape kershvuka higü gen shü lati. Ale tsü jape temi lo senru gen metse shüti, lo pe tehen lo shyeni gen-e shüti. Anyunkenta le bo kemhülo hükemvu mah hontse ti.

²¹“Atemi dan, hagun kershvu peha we pe kershvubin gen roküla, lo peha pe tyülo tse shü. Ai ale Npugü, ale zokebin gü le hagun le tsü aphue tyülo gwale.

²²Ale hagun bonnyu zen-o Ijipt nken chwikeryü ka rope kerüshvu nmvue thape kershvu rüla kecha zomvu.

²³Ai ale anyugun no ajozenlo lo ale anyugun Sunggigü thyü lo anyugun no atemi thyü titse zo. Lo anyugun no gwa gunlo nrün genyu ale anyugun ka kezo hontse yhun lotse zoshü le.

²⁴Ai anyugun le zenmvu nmvue rüchün-e mvula. Tson kethyü gü mvule anyugun nyunkerü lo gwakemvu gü then-o tinla, tson-o gwakelogü mvule gwamvu kvula.

²⁵Hagun bonnyu le Ijipt nyu chwikeryü jon nyü ryüo ntsoka keti ale agonyu, sidyükezonyu nipe shü ryü bin.

²⁶Ai nme-e tsü nyümvu nmvue rüchün mvula. Tson kethyü gü mvuo hagun le hagun bonnyu nyeki nyun rü lo a nren kvu bin laso.

²⁷“Tsügenyu, Jeremiah, nle jo hidan aphu pe atemi ka zo ti, ai tsüdan le nkhwen nyüloho; nle anyugun koti, ai anyugun le khin loho.

²⁸Anyugun senye le Npugü, anyugun Sunggigü khwen nyümvu, nmvue shaja pe anyugun ketsü ka thame shalo mvu laso letse nle anyugun ka zoti. Joketsin kesen le kesi laso. Tsü rüla kenthon-e mvu laso.

²⁹“Jerusalem temi dan, chülo; hagun pehü tselao pe shwen lalo. Rinchothun gen kesi pe keshü lü thyülo, kechamvule, ale Npugü, ale anyunta, lo atemi keli laso.

³⁰“Juda temi dan le gwakemvu nme thyü laso. Anyugun le ale ntsü kehü teromen gü pe a Kershvuka nyu shüo nrhu laso.

³¹Hinnom Kazüketejon nyu anyugun le kershvubin nme Tofet tse ko kehü thyü njü, tsünyu anyugun nyenyu peche lo tenue pe mah nyu rüshvu nrün genyu. Ale anyugun no tsonlo tsemvu, nmvue tsüle anyun kie ndi.

³²Tsügenyu tsü lope Tofet nmvue Hinnom Kazüketejon letse komvulao Dukeshvu Kazüketejon le tse kotinla nrün gwünkho le ryüti. Simin pe kesun bin ndi kelai genyu anyugun le simin pe tsünyu sun ti.

³³Kesimin dan tsüle tegü lo tehenthyü dan chvü thyüti, lo nme-e tsü hü mvu lati.

³⁴Kazü gü le kazü kesi thyü lati. Juda nyida dan lo Jerusalem tsonda nyu shekerhün lo kenyükethyü khwen lo senhü ho shekerhün khwen dan tsüno a-keni thyü lati.