Read Southern Rengma Naga JEREMIAH 8 Bible Online

JEREMIAH 8 - Southern Rengma Naga bible

JEREMIAH 8

¹“Tsügwünkho ka Judanyu rajanyu lo kedanyu dan ru, lo püshükedanyu lo sidyükezonyu lo Jerusalem nyu temi dan sikanyu anyugun ru kehenshwi lati.

²Anyugun ru lope kequen nmvue sunla kethyü gü mvule nnyon hontse kazü gen binti. Tsüdan kezen pe anyugun le so, lo lothyü, rüshvuo nthonkehü yhüko, shye lo shyenyü dan mhundyü nyu shü lati.

³Lo senye gwakemvu temi dan, ale anyugun hükezen keshü bin ki yhun kebin dan le sikela gü le rhünkebin nyeki gwakvu lati. Kekvutsin Npugü, ale zo laso.”

⁴Npugü le ano a-temi dan ka zolo tse shü, “Peha le ntola lo sola hümvu ole? Lo mele tson gwenzü lalo ranila hü mvu ole?

⁵Tsonlo atemi dan, hagun we nyuthyüo akipon tinlao niryü mvula ola? Hagun le teromen nsüzin tinlao aki rani ryünyü mvula.

⁶Ale nyü petsüsa shwi, ai hagun le ketsin zomvu. Hagun nme-e a-gwakemvu genyu ryünyu mvu lamvu; nmvue ‘ale nyu thyüzüla ola?’ tse shün-e mvu. Aphu tse keru le terinyu tin gükejü hontse a-npvü a-tson nyu hü gwenzin.

⁷Zügüe a-le rani nrün gwünkho sha; lo nsu, sentyu lo zügüe kela la mvulo keshvu shahü. Ai atemi dan, hagun we ale hagun ketsenkehü jvu shamvu.

⁸Tsonyatselo hagun le dihontseo hagun le ntsenseri lo ajvu shahü letse zolo mon? Hire, joketsin senkemvu lesü keshanyu le tejvu kelu laso.

⁹Hagun dan nyu keseri nyu le keja laso; anyugun le kevülao minlo laso. Anyugun le ajo kenila; ntsoka we anyugun le nyu kesha hyulo la?

¹⁰Tsügenyu ale anyugun low dan pe gwen nrün nyu tsüla, lo a-nunyu pe temi kecha tsü lati. Temi keda keshen aphu nkuo pisa lotitse gwen zin. Sidyükezonyu lo püshükedanyue temi sa hünyo.

¹¹Anyugun le atemi dan gen kejün keja tsü lope lihi kemvu thyühü nyo. Anyugun le, ‘Aphu gwakü binle,’ tson zo hünyo, ai aphu gwamvu.

¹²A temi dan, hagunwe kentsükenchen tha hidan thyükela genyu kejamvu ole? Hagun le keja mvushü. Hagun le kejo khe-e mvu! Tsügenyu ale shaja pe hagun ketsünyü hagun ko kechanyu hontse che lati, tsüle hagun keyhun keni thyü lati. Ale Npugü, tsü zo laso.

¹³“Mele low gvü kegwen kehü hontse ale atemi khokegwen lonyü, ai anyugun le vain le a-sha kendi hontse lo tehen khero le a-sha nshakemvu hontse la; anyugun nyüe rügu laso. Tsügenyu ale tegwenki nyu no kazü higü lola titse laso.”

¹⁴Sunggigü temi dan le ketso, “Nyu genyu ngun le dun bin zun la?” “Ryülo, chwikenko nyida nyu yüo tsünyu sila tile. Npugü ngun Sunggigü le ngun no sila lotse laso; ngun le muo a-ntsun kela genyu terün pe ngun tsülo tse khishü laso.

¹⁵Ngun le nyunkebwen lo thyü ngwa kelo nrinhü, ai thaja laso; tsü sunka kenshvu le ryülao.

¹⁶Ngun kenrhinyu le Dan nyida nyu bin; ngun le anyugun keru dan ketin khwen nyübin laso. Anyugun keru le khun keshüka kazügü aphu ndün bin.Ngun kenrhinyu le ngun ka zü lo tsünyu kebin aphu, ngun nyida lo tsünyu temi aphu nkela titse ryüla sele.”

¹⁷Npugü le zo, “Petsülo! Ale peri nipe hagun dan nyu shü bin, tsüle jvulo keho peri tseyi kerhu, tsügenyu tsüdan le hagun nduti.”

¹⁸Anyunkenjün kethyü le ponlo hoso; Ale anyunki hobin laso.

¹⁹Nyülo! Kazü aphunyu atemi dan le kechü khwen nyülo bin, “Npugü le Zion nyu ndila so ole? Zion raja le tsünyu bin mvula ole?” Npugü anyugun raja gü le kenishü, “Hagun le nyuthyüo teromen rüshvu lo sin rünyi tero letse kehü kanyu khosen-o ano anyunta hü nla?”

²⁰Temi dan le nrao, “Ntsükerin le güla, logvü gwünkhoe gü laso, ai agun kenilo mvu laso.”

²¹Anyugun boshwen laso, kechamvule atemi ju boshwenla; Ale anyun gwamvule, ashese ritsin la sele.

²²Gilead nyu dawa ndila ole? Tsünyu doctor ndi ole? Tsonlo nyuthyüo atemi le gwalo mvula ola?