Read Southern Rengma Naga JEREMIAH 9 Bible Online

JEREMIAH 9 - Southern Rengma Naga bible

JEREMIAH 9

¹A pe no zülvu thyü, lo ayhütyü no yhüphu zü kepenbin thyüla, tson-o ano khenyü kheje tsen atemi me no dushvukela nyu genyu chü binlo akenyü tile.

²A temi zen-o kekho tinla nrün genyu kazü kesi ki kensenbin hyulo lo akenyü tile. Anyugun aphu joketsin sen mvu, lo me jwe ketyünyu dan me thyü laso.

³Anyugun le kenku zo titse ndobin hünyo; ketsin gü mvule ketsin kemvu le kazü ketsen bin laso. Npugü le zo, “A temi dan le gwakemvu kethyü sie thyüni hünyo, lo alope anyugun Sunggigü letse sha hümvu.”

⁴Temi lihigüe a-pvügü genyu petsülo, a-tsasizen tenyen keloi mvu, kechamvule tsasizen aphu Jakob hontse kekhen kekho, lo lihigüe apvünyu sa hünyo.

⁵Anyugun aphu a-pvünyu tson tsin zü, lo nme-e ketsin zohü mvu; anyugun yi senthyü pe no nku lo kemu tsü khelalo kemvui. Anyugun le tha gwakemvu kethyü si-e thyüni, lo me kesa tho thyüe thyüni hünyo. Npugü le atemi dan le akhela letse zo.

⁷Tsügenyu Kekvutsin Npugü le zo, “Ale a temi dan lope tegi rokenshü kethyü hontse lo anyugun kegwakeshvu shwiti. A temi dan le gwakemvu thyükela le-- ale anyugun zen-o nyu thyüsin logwa la?

⁸Anyugun yile me jenshvula kehü tho hontse, anyugun le a-zintse kenku zo hünyo. Lihigüe a-kazongü nthonkegwa thyühü, ai ketsin yatselo a-nsen bin nyo.

⁹Hidan genyu ale shaja pe anyugun tsümvu ti ole? Senye hihontse kethyü ge khün lo mvu lati ole? Ale Npugü, tsü zo laso.”

¹⁰Ale zo, “Ale kazüthun dan genyu nyungwamvu lo tehen genyu chü, kechamvule tsüdan aphu rügula, lo nme-e tsünyu njwen gümvu laso. Senru dan khwen nyü sin mvula; tegü lo nyukhu dan le tin laso.”

¹¹Npugü le zo, “Ale Jerusalem no nke pe ketebin shüti, mesükerun keyhunbin thyüla; Juda nyida dan no khekela bin thyülao nme-e tsünyu yhun mvu lati.”

¹²Ale shün, “Npugü, nyugenyu kazü higü le nke pe kazü kesi hontsela ola? nme-e no tsünyu njwen mvula ola? Segü le thashao tsükon shalo gwala? Nle segü no meka zo nrün genyu a-kon zope zenla sela?”

¹³Npugü le zoni, “Atemi dan le ale senkethyü jo pe anyugun ketsü khekela genyu tsonla sele. Anyugun le akhwen nyümvu nmvue ale zokeshüe thyümvu.

¹⁴Tsü sunka anyugun nyunrüo anyugun bonnyu le senthyü keshü hontse Baal teromen rüshvu tin laso.

¹⁵Tsügenyu nyülo, kekvutsin Npugü, Israel Sunggigü ahigü le nyu thyü titse bin yo: Ale jonyü kekhü pe atemi no tyü lo terün pe anyugun no tsüti.

¹⁶Ale anyugun hü kezen pe anyugun bonnyu lo anyugun-e a-rüla nyühü kemvu kazü ki shüla lo rihüdan nipe anyugun nke shüla kemvuthen anyugun nrenti.”

¹⁷Kekvutsin Npugü le zo, “Tha thyükebin kon rüchün shülo! Kesi chechü kehünyu no ryülo tse koshülo, kesi gen keron lüthyü kehünyu nyeginyu dan.”

¹⁸Temi dan le zo, “Anyugun ka zo-o no whütse ryü agun genyu kesi gen keron lüthyü shülo, yhüphu züle agun yhütyü sü, lo chüo agun yhüphu che kemvu then.”

¹⁹Zion nyu kechükhwen nyüshü, “Agun nke laso! Agun le kemenisa laso! Agun le agun kazü khela mvulo shü; agun ka le nren bulaso.”

²⁰Ale zo, “Nyeginyu ju, Npugü khwen nyülo, lo a-jo nyü petsüsa shü, Chyekechü do pe hagun nyugidan senthyü, lo kesi gen keronlü pe hagun pvünyu senthyü shülo.

²¹Kesi le agun kafüphe nyu, lo agun kedabin nyu yüryü laso; tsüle tsonda nyu ntsenyu dan lo hada bin nyu selo dan dushvu laso.

²²Simin le bin aphu nyu kezen bin, nnyon khüpe low nyu keshü hontse, logvu nyu le logvü pe khelao nme-e kequen mvu kela hontse. Hile Npugü le ano zolo tse keshü.”

²³Npugü le zo, “Thakeshanyu le anyugun kesha genyu, nmvue kenko nyue a-kekvu genyu lo kenyanyue a-kenya genyu ketekho loshvu.

²⁴Temi lihigüe ketekho nyülo, a-le asha lo arüla shakehü genyu ketekho mvulo shvu, kechamvule akeso le binzin hü, lo ale njü lo jo ketsin gü thyü hü, Tha hidan hile akenyü hüle. Ale Npugü, tsü zo laso.”

²⁵Npugü le zo, “Ale shaja pa a-pe thupe kezü thyükela temi dan--Ijipt, Juda, Edom, Ammon, Moab, lo kazü kesi ki yhun kehü dan tsü nrün gwünkho le ryüjü laso. Temi hidan aphu gikerünyu, ai gikerünyu kejozenkelo jvü zen hümvu. Temi hidan lo Israel nyudan nme-e azen-o kejozenkelo then hümvu laso.”