Read Southern Rengma Naga CHEKECHÜ 1 Bible Online

CHEKECHÜ 1 - Southern Rengma Naga bible

CHEKECHÜ 1

¹Gwengwa temi yhun sü kehü Jerusalem, tsü le dihontse rin layo! Gwengwa kazü le a-rühvu hü, ntsoka we a-le magi nyu hontse laso; Nyida aphu nyeki kegwa gü le gonyu hontse laso.

²A-le khensin chüo yhüphu le a-jon ki tsun tsü. A-pvünyu when dan nme-e bin-o a-nyunthyü nbwe nrün ndi so. A-zen-o kerhün kehü nyu le a-kekhün lao aphu a-ntsun tin laso.

³Kanyu Juda temi dan hüshwi lao njün keho donyu thyü laso. Anyugun le kazü kecha ki yhun-o, anyugun hon letseo kokelo bin thame ndi- Shwikerüchün nyu no hunlo lao thame chwikelo tson ndi so.

⁴Temi nme-e kenshün jon nyü Kershvuka nyuryüo rüshvu titse mvula. Lünyu tsünyu lüthyü kehü dan le ho, lo püshükedanyu le kenjünthyü nrakelo nti. Nyida khinrun dan le nrun lao Zion le kenjün kethyü nyu bin laso.

⁵A-shwikerüchün nyu le gwalo la, lo a-khipe anyugun kekvu nyu shüla. A-le kemu kechon thyükela dan aphu genyu Npugü le a-no kenjün thyüla; A-nyenyu dan tenlo-o zentin laso.

⁶Jerusalem gingvü kethyü tsü le gü kela hon laso. A-sharhidan le thyüzhe le nnyon-o kvumvu kela hontse, Anyugun kehünyu mhundyü tin kethyü le kekvu ndi shüla.

⁷Nke pe rinryü kela gü, Jerusalem le nduka gingvü kethyü rüchünlo. A-le shwikerüchün nyu ben nyu yü kethyü ka nme-e a-keche min ndila; A-sokvu kelo nyu le a-le chekela shwi nyü.

⁸A-kerühvu le ndi so; a-le a-kenben lao kejo pvü laso. A-le nho lo kejo-o a-mhun kebu. Jerusalem le kemu ketetsin thyü pe a-npvü a-nrhu.

⁹A-nshünkemvu le hyu nnesa, ai a-le a-tho genyu a-nyun kenkhi shamvu. A-le chekela tsüle ketetsin; a-nyun thyü nbwen keloi nme-e ndi. A-shwikerüchün nyu le kvulo la, lo a-le Npugü ka shwikenjün hi.

¹⁰A-shwikerüchün nyu le a-kenya aphu selo la. Tsüdan le Npugü le Juda kemvu nyu no gü nya lotse kehü Kershvuka nyu yü kethyü ale hyu.

¹¹A-temi dan le tha tyü titse fü bin nsen kenjün kethyü khwen thyü; Anyugun le yhunlo nrün genyu kenya lope ketyüketsü kelu. Nyida gü le nrao, “Npugü, a nri shülo, ale rhokedyü thyükebin hi che shüta.”

¹²A-le tsü nken kegü nyu aphu ka nrao, “A nrishü lo!” “Nme-e ahontse kenjün thyü mvule, kethyü higü le Npugü le a-nyun kenta gwünkho ka senryüo agen keshü.

¹³“A-le tesoge mah nishü, lo tsüle anyun ki aro hü. A-le chwa nme pe a nsen lo-o asüsen tsü ryü kazü nyu shüla. Tsüselo a-le akhelao ano kenjün thyü zin tinla.

¹⁴“A-le akemu aphu shalo-o tsüdan aphu phin kesü la; A-le tsüdan pe agunda ka hüshü, lo ale kensu tsügü hensin kvumvu ketsin sola. Npugü le akhipe shwikerüchün nyu tsüla, lo ale anyugun ntsunlo nrün ndi.

¹⁵“Npugü le ashüpahü kenkotsin dan shwinyü la; A-le atemi selo dan nkela nrün genyu rihü dan me nishü. A-le atemi lope zu kethünbin nyu vainsha hontse boshwela.

¹⁶“Tsügenyu ayhüphu tsun sa. Nme-e anyun thyü nbwen lomvu so; nme-e kepeche pe atsülo kemvui so. Ashwikerüchün nyu le asokvulo laso; atemi dan le thame ndi laso.

¹⁷“Aben keta shüe nme-e ache kemvui. Npugü le lihizin shwikerüchün nyu lope a ntsunlo laso; Anyugun le alope tha kerhu nme hontse bin.

¹⁸“Ai Npugü we njü, ale a-jo zenmvu kela genyu. Akhwe nyülo, lihiki temi aphu; akenjün kethyü nyu a nrishü lo. Atemi selo, peche tenunyue zen-o dothyü tin laso.

¹⁹“Ale apvünyu dan ko, ai anyugun le achemvu letse la. Püshükeda lo sharhinyu le rhünlo nrün genyu ketyüketsü fü hüo nyida gü tsonda nyu sila.

²⁰“Npugü, akenjün kethyü, lo akapu kenjün kethyü nrishülo! Akemu genyu anyun gwamvuo anyun boren laso. Tsonda nyu me dukeshvu le bin; kanyuki-e kesi le bin laso.

²¹“Akenjün kethyü khwe nyü shülo; nme-e anyun thyü nbwenlo kegwa ndi. Nle kenke senryüo age keshü genyu ashwikerüchün nyu le kenyü bin. Nle zo kenjü jon gü senryü lo; akenrhinyu no ahontse kenjün thyüla.

²²“Anyugun gwakemvu aphu genyu a-nyu nmula ta; Nle akemu genyu shaja pe aketsü hontse pe anyugun tsü ta. Ale agwün kendi thyüo nra, lo ale kenjün thyü a tesü kendi thyü bin nyo.”