Read Southern Rengma Naga CHEKECHÜ 2 Bible Online

CHEKECHÜ 2 - Southern Rengma Naga bible

CHEKECHÜ 2

¹Npugü le a-nyunkenta nyu kezün pe Zion henla. A-le tsangge gingvü kethyü tsü lope kenke thyüla. A-nyunkenta jon nyü a-Kershvukae khela

²Npugü le shwikenjün ndi tse Judanyu rünyi aphu nkela. Lo kazü gü no kehü chwida-e borenla. A-le kejokepvü senryüo rajaphen lo tsü nyu kekvunyu dan ge shüla.

³A-kenthün nyu Israel kekvu boshe la; Shwikerüchün nyu le keryü ka a-le ngun chemvu letse la. Anyun kenthün le mah hontseo tha aphu kecha.

⁴A-le shwikerüchün nyu hontse a-levü pe ngun ntsen; A-le ngun le zen-o sherhün lo kenyü kehü aphu dushvula. Jerusalem hinyu ngun le anyun nthün sa kebin shalo.

⁵Npugü le shwikerüchün nyu nme hontse Israel nkela; A-le a-chwida lo rajabin nke-o khela. A-le nyun kenjün kethyü kenikendi senryüo Juda temi ge shü.

⁶Ngun le a-rüshvu kehü Kershvuka gü a-le borenla.; A-le jon kenshün lo Sabbath dan-e no keni thyüla. Raja lo Püshükeda-e anyunkenta akekvu sha

⁷Npugü le a-kerüshvu kenila lo a-Kershvuka kenshün gü-e khela; A-le shwikerüchün nyu no a-chwida borenla. Anyugun le kvulo-o gwüngwa nme ngun le sherhün-o rüshvu kehü bin nyu nra sen.

⁸Npugü le Zion chwida no chela titse rhilo la. A-le tsüdan no nke shüla titse ndo lola. Ntsoka tsokhwen lo chwida dan le nke kesin laso

⁹Khinrun dan le kope kazü nyu sunla, khincha dan-e borenla. Raja gü lo kedanyu dan le me kazü nyu tin laso. Tejvü gü pe senthyü sin mvula, lo sidyü kejonyu le Npugü kipon tsemin hyumvu laso.

¹⁰Jerusalem kethen nyu jule ma tse kazü nyu dun-o, kemphü pe anyugun ge shü lo ronphi ben. Lübwe nyu le kazü nyu nkhün tsü.

¹¹Chü pe ayhütyü le kvumvu la; akapu le kenjün thyü laso. Atemi dan kenke genyu anyun kenjün thyü loho la sele. Ntsenyu lo nyuhonyu le nyida gü tsonda dan nyu pesi bin nyo.

¹²Nnyon, teri lo chüo anyugun jvü nyu ko; Anyugun le jünkela hontse tsonda gü nyu che tsü, Tson-o nyajü tse anyugun jvü nyu ben nyu sila.

¹³O Jerusalem, keso Jerusalem, ale nyu zolo mon? Ale dihontseo nnyun thyü nbwenlo tila? Temi nme-e hihontse kenjün thyümvu zun. Nkenke le züda hontse laso; thame thyülo kegwa kenrin ndi so.

¹⁴Nsidyü kezonyu le kenku nti a-me thame zomvu; Anyugun senkethyü le hagun kemu tsin mvuo hagun sala. Anyugun le hagun thyü pe nyun kelu mvue gwa le tse rüchün la.

¹⁵Temi dan le nyida gü pvüthü kegü ka shwinyüo hagun nri. Anyugun le anyugun pe pvü kengüo Jerusalem kenke shwinyüo zo, “Hile nyida kezegwa gü tsü le? Hile kazü le a-genyu sü thyü kehü gü tsü le?”

¹⁶N shwikerüchün nyu aphu n shwinyü mvu, anyugun nyunta lo nshwi nyüo n nrhi ti. Anyugun le anyugun müntse nkao shwinyü, “Agun le tsü nkeshü le! Agun le jon higü khwe kehü le!”

¹⁷Npugü le a-le kedün-o thyü titse kebin gü kenkhin ki thyü laso; A-le shwinjün mvuo ngun nke laso, a-le nduka ngun ka zo kenjü gü tsü. A-le kvukelo pe ngun shwikerüchün nyu tsü, anyugun no ngun le chekela genyu sherhünlo.

¹⁸O Jerusalem, nchwida no chüo Npugü ka hilo! N yhüphu no kheje khennyütsen züri hontse tsun ta; Chü lo nyun kenjün thyüo kvumvu lalo!

¹⁹Khensin so-o Npugü ka hilo hini lo; Nkerüchün aphu pe a-no nnyenyu shwinjün shülo tse hilo- Tsonda aphu teki ntsenyu le pesi sigü jü nyo!

²⁰Nrishülo, O Npugü! Nle nchün ndyü keshü dan nrishü lo! Nyeginyu le anyugun le so kehü ntsenyu min tyü bin laso! Mele Kershvuka nyuki püshükedanyu lo sidyü kezonyu boshvu bin!

²¹Selo lo peshünyu le tsonda nyu sibin; Shwikerüchün nyu zhethon lope pelü bwen lo nyegibwen nyu dushvu bin. Nle nnyunkenta jon nyü shwinjün mvuo tsüdan dushvu la.

²²Nle ashwikerüchün nyu kope ate hun-o ketetsin keho thyü, Lo nnyunkenta jon nyü tsü nme-e tinlo mvula Anyugun le ale so lo leyi sokeryü anyenyu dan dushvula.