Read Southern Rengma Naga CHEKECHÜ 3 Bible Online

CHEKECHÜ 3 - Southern Rengma Naga bible

CHEKECHÜ 3

¹Sunggigü le shaja pe tsükela tsü le nyu yo tsekethyü kehyu gü tsü le ale sha.

²A-le ahü pe kezün nyu shü ntsun ketsin la.

³Lo shwikenjün ndi shütse avü nini shü.

⁴A-le athyü amin khe pe kedukeru thyü, lo aru dan bosela.

⁵A-le alope kenjün kethyü lo gwün keshvu do nyu khinla.

⁶A-le tenge tse ano kentsü kenche kesi kezün nyu yhun.

⁷A-le tegi ron pe aphinla; ale tinlo nrün nrinlo keho donyu nme le.

⁸Ale nra tetso-o keche hi, ai Sunggigü le nyümvu letse la;

⁹Ale kezekego-o tsonchü; tsokhwe le ale lihiki gü-e atson khin.

¹⁰A-le thyügwen hontse atson khwen; a-le shünyho hontse a gwün ryü.

¹¹A-le ajon pe tson teki shü, asüthü sürü lao akhela.

¹²A-le a-tho levü khilo-o a-thotsi lope a ntsen

¹³A-le a-thotsi kvu pe amin shwen ntsun sala.

¹⁴Temi dan le jon gwün ashwinyü; ale anyugun aphu mhundyü ka shwikenyü nme.

¹⁵A-le kenjün kethyü kekhü pe atsü ala.

¹⁶A-le amhun sü pe kazü gen shon lo tso ketepen dan ge ahü vürü la.

¹⁷Ale phu kesherhün, nyun kebwen lo shekerhün le nyuyo nmhinla.

¹⁸Ale yhunthon sari kemvui so; Npugü nyu akenrin le ndi laso.

¹⁹Akenjün kethyü lo aka kendi kerüchün le terün kekhü le.

²⁰Ale tsü rüchün zin kethyü ka ashese la.

²¹Ai ale tha nme hi rüchün kelo ka akenrin hyuni lo:

²²Npugü sozin kehü lo shwikenjün le ntsokhin bin zun,

²³Tsü le lonyü kegwa lo yhüko chwiryü tsentsü kehü hontse.

²⁴Npugü le ahon, tsügenyu a-ge akenrin le bin hü.

²⁵Npugü le a-tenyen kehü nyu aphu genyu gwa,

²⁶Tsügenyu nhenhio a-khwen kelo le ngun genyu gwatsin- tsü le ngun kenishü lotse a-khwen kethyü.

²⁷Lo ngun selo ka nhenhi kethyü higü shalo kela le gwatsin.

²⁸Ngun le kenjün thyükelo ka, n npvü ma tse nhenhio dun tinla mvu loshvu;

²⁹Ngun le tsenyo tsüla mvu loshvu, nsidyü le bin zun logwa kethyü genyu.

³⁰A-le nvü lo n nshwen la-e tsü aphu tsonzü le tsela mvu loshvu.

³¹Npugü le shwinjün sa, tsügenyu kethonthen ngun khela loho.

³²A-le nyun kenjün kethyü senryü ngun tsüe logwa, ai a-le ngun keso le tsentsü lo nko.

³³A-le ngun no nyungwamvu lo kenjün thyü kethyü le a-kenda mvu.

³⁴Doka nyu ngun kapu boshwen kela ka Npugü le sha;

³⁵A-le kenjü pe ngun ketsü gü tsü mele kenilae a-le shabin;

³⁶Jokerabin nyu kenjü jo kekhün lae a-le shabin.

³⁷Npugü kendo gü tsü le a-zin thyülo hü nyo.

³⁸Kegwa lo keshvue a-jo nyu penla hü.

³⁹Nyuthyüo nkemu genyu shaja hyukelo ka a-zin tse kenyo mon?

⁴⁰Ngun tson dan rüchün shwio Npugü ki rani gü tinu.

⁴¹Ngun nyun khinshe pe tsangge Sunggigü tsüo hi tile,

⁴²“Agun le mula, lo n nrenla, lo nle agun kemu jüshü mvula le, O Npugü.

⁴³“Nle agun hü lo agun boshvula; nnyunkenta nyu nshwikenjün kebula,

⁴⁴Nnyunkenthün khelukesü le süri kela genyu agun kehi le pvüphelo mvula.

⁴⁵Nle agun thyü pe kazü no khekela nyu thyüla.

⁴⁶“Agun kenrhinyu aphu agun nshwen lo shwinyü.

⁴⁷Agun le kenke lo kenjün kethyü nyu hü; agun le kenshvu lo nyun nkhi kethyü nyu yhunryü.

⁴⁸Atemi kenke genyu ayhüphu le züri ketsun thyü.

⁴⁹“A yhüphu le rinyu zü tsun thükemvu hontse bin ti.

⁵⁰Npugü le tsangge bin-o nrishüo ngun hyu kemvuthen.

⁵¹Ale nyida gü nyu tenunyu dan ge thyü keshü kehyu ka anyunkenjün thyüla.

⁵²“A nrhilo kegwa kon kendi nyu ashwikerüchün nyu chwa nyu ano tegü kemin hontse la.

⁵³Anyugun le akerhün shwen pe tekhün nyu shwenshüo tso pe khinla.

⁵⁴Zü le aso tsun tsüryü, lo ale kesi le khonni la sele tse rüchün la.

⁵⁵“O Npugü, tekhün kentsun ki bin-o ale nka hi,

⁵⁶Lo ale nno akehi khwen nyü shü lo tse nka hikeshü ka, nle nyüshü.

⁵⁷Nle akehi kenishü lo ano nshvu nya lo tse aka zo.

⁵⁸“Npugü, nle akenishwi titse ryüo akeyhun kenishü.

⁵⁹Npugü, ajün zo shüta, njü kemvu pe a ntsun kela tsü le nle shabin.

⁶⁰Nle ashwikerüchün nyu le dihontse a nrhio tedo rhipe a ntsun hü yo sha.

⁶¹“O Npugü, anyugun le akenshwen nle nyülo; lo nle anyugun do aphu sha le.

⁶²Jon gwün anyugun le arüla kenthon-o tedo rhibin hü.

⁶³Lonyü gun gü kheje keti anyugun le azo pe keyü thyü.

⁶⁴“O Npugü, anyugun tho genyu shaja pe anyugun tsü ta;

⁶⁵Shochün pe anyugun tsüo shekese pe sü shüta!

⁶⁶Anyugun hüo kazü nyu anyugun nke shü lata!”