Read Southern Rengma Naga CHEKECHÜ 4 Bible Online

CHEKECHÜ 4 - Southern Rengma Naga bible

CHEKECHÜ 4

¹Agun suna kenshwen le zünla; Kershvuka gü nyu tso dan le tsonda nyu kezen laso.

²Zion selo dan le agun mhundyü ka suna minketsen hontse hü le, Ai ntsoka we tsü dan lope nnyonla kedukeru hontse laso.

³Teken-e a-nyu no a-hontsü hü, ai atemi dan we Ostrich gü hontse a-nyu ge a-jvü gwamvu laso.

⁴Anyugun le anyu nyu dan no nnyon lo terio sila hü; ntsenyu dan le chvü hie nme-e pe anyugun tsü hümvu.

⁵Gwüngwa chvü kegwatsin tyü kehü tsonda nyu khün sibin; Yhun ketegvü kehü nyu le kerhubin nyu chvü fü hü laso.

⁶Atemi dan shaja le Sodom nyu keyhun nyu nyeki tsenkvu laso. tsü dan le whütse Sunggigü ben nyu chela.

⁷Agun raja dan le rhumvu lo nshün pe khetso hontse, mero lo nko lo anyugun thyüe ben.

⁸Ntsoka we si pe anyugun mhun metsen, anyugun gi le nko pe tesen kesi hontse; anyugun ru jepvüo shakemvu nyu hontse tsonda nyu keto bin.

⁹Teri nyu sikela nyu le kenkhin ki chvü ndio khünsi kela nyu nyeki gwakvu.

¹⁰Kenke atemi ge keryü tsü le kerü keshvu senryü; tsü le anyenyu so kehü mejvü nyu le anyenyu bü tyü.

¹¹Npugü le a-nyun kenthün süni mvu; a-le Zion nyu mah nnyü shüo tsü roshe pe kazü nyu shüla.

¹²Temi nme-e lo sin rünyi ki senye kekvu kesen nyu-e; Mele Jerusalem khinrun nyu yülo titse tenyen mvu.

¹³Ai tsü le tsonla, a-sidyükezonyu le mula. lo püshükedanyu le thyüzüo kemu kendi nyu no sikela genyu.

¹⁴A-sharhi dan le yhükephonyu hontseo tsonda nyu ho, lo tezi lope anyugun nyeo temi nme-e no anyugun kesülo mvula.

¹⁵Temi dan le nrasen-o zo, “Tinla lo.” “Hagun le rhu laso! A kesü nyalo!” Tsügenyu anyugun le anyugun nsin kelo min ndio senye kecha cha ka ko ho.

¹⁶Npugü le anyugun phin rüchün sinmvu la; a-le anyugun hü kezen laso. A-le agun püshükeda lo sharhi dan sümvu laso.

¹⁷Agun le keche hyulo kemvu gü tsü nri loho la kemvuthen nri ryü. Agun le keche pe agun tsü lo keho senye gü ka kekeche khwen bin.

¹⁸Kenrhinyu le agun nri lo lao agun le tsonda nyu-e gülo mvula. Agun jon le güla; kenkhin gü le ryü laso.

¹⁹Logi le tsangneki shwa tsüryü kethyü nyeki nmhen-o anyugun le agun hü tsüryü. Anyugun le rincho ge agun hü zen tsüryü; agun le shabin kemvu ka kazü kesi nyu agun tenlo.

²⁰Anyugun le Npugü le kejükelo raja gü, agun keyhun bin gü ten lola, Agun hü keryü nyu aphu ka agun ntsen kelo nrin kehü gü.

²¹Edom lo Uz temi dan, hagun dyü gwalo, thyülo kegwathen hagun kenyülo. Hagun kenke ko ryüjü nyo; hagun ko hagun kenyhün kezekego-o kejokepvü thyüti.

²²Zion le a-kemu tho laso; Npugü le agun no me kazü ki dothyü sin loho so. Ai Edom, Npugü le shaja pe ntsü ti; a-le nthyü kezü khishwi shüti.