Read Southern Rengma Naga EZEKIEL 1 Bible Online

EZEKIEL 1 - Southern Rengma Naga bible

EZEKIEL 1

¹Chen shenryü gü shyezi gü ka jonpvün nyü püshükeda gü Buzi nyugü Ezekiel, a higü le Babilon kazü nyu Judanyu donyu dan zen-o Khebar züri khoka bin. Tsüka tsang le kashü, lo ale Sunggigü hyu.

²(Tsü le Raja Jehoiakim zen-o dothyü tinkela chen pvün ka.)

³Babilon nyu tsü Khebar züri khoki Npugü le akenthon khwen nyü lo a-kekvu shalo.

⁴Ale nrishü kethyü ka teso kipon tsangkenbu terhi le ryü kejü hyu. Tsangkechwü le nmhukezün nyu chwiryü, lo tsü kehun tsang le nhonben bin. Tsangkechwü le chwikeryü ka tsü tha nme le lazo kenshwen hontse bin.

⁵Tsangkenbu terhi lvu ka tsü temi joja hontse rhünkehü nyukhu pezi le kebin ale hyu,

⁶tsü dan nme me tse a-mhun pezi, sekin pezi pvü hü.

⁷anyugun pha le njü, lo anyugun tsen le methu tsen hontse. Tsü dan le lazo shon nshwen kela hontse.

⁸Anyugun mhun pezi lo sekin pezi nyeki anyugun nmeme ge ben pezi le bin sekin nme hensin nyu nmeme.

⁹Nyukhu nmeme tse a-sekin kenyhun sükhun-o a-ra no keti pe quenzi thyü ketun bin. Anyugun le gü kethyü ka anyugun min no rani mvuo dan me thyü gü lahü.

¹⁰Rhün kehü nyukhu nmeme tse a-mhun kechacha pezi: mhundyü zin temi, njüzin shünyho, ngwazin methutse, lo sizin logi mhun.

¹¹Nyukhu dan nmeme tse a-sekin shahvu sükhun pe a-ra le a-khoka kebin gü kensü, lo sekin shahvu keju pe a-min sun.

¹²Nyukhu nmeme tse quenzi nren ntsun, tsügenyu a-dan gü le lihizin ntsun nmvue anyugun le gü kenyü kipon rani mvutse gü logwa.

¹³Nyukhu dan nyu tsü bensa kethyü nme le nnusun bin. Lo mah keben gü le tsangkechwü nishwishü.

¹⁴Lo Nyukhu dan tsü le keben kenmhen gü zen-o tin nsin nshe hü.

¹⁵Ale nyukhu pezi dan tsü nri kebin ka ale kerükehü pha pezi hyu, lo nmeme le nyukhu nme khoka bin.

¹⁶Kerükehü pha dan aphu kenme; aphu tso minketsen hontse nshwen, lo kerüpha kecha nme le nme lvu nyu kehüsü kübin,

¹⁷lo kerüpha dan tsü le quenzi aphu gü logwa.

¹⁸Kerüpha dan ge yhütyü le kesü thyü bin.

¹⁹Nyukhu dan le nnu shülo kerüpha dan-e nnu, lo nyukhun dan le sun shülo kerüpha dan-e tson.

²⁰Nyukhu dan le gü kenyü bin ki gü, lo kerüpha dan-e nyukhu le nyuthyü yo tsü gwünzin thyü, nyukhu dan le tsü dan ketsen kebin genyu.

²¹Tsügenyu nyukhu dan le nyu cheka nnu, sun, nmvue lu ge so layo kerüpha dan-e tsü hontse thyü.

²²Nyukhu dan soki kristal kenshwen pe kethyü tsang hontse le bin.

²³Lo tsü hensin nyu nyukhu dan le bin, aphu anyugun sekin kenyhun sükhun pe kecha gü ti lo sekin kenyhun pe anyugun min jepvü bin.

²⁴Ale tsü dan kenye khwenyü; tsüle zükeda kentyü, rihü danda lo Kekvutsin Sunggigü khwen hontse. Anyugun le nyemvu lalo, anyugun sekin keju lola,

²⁵ai anyugun so ge tsangki tsü thakhwen nme le ryü bin.

²⁶Tsang tsü soki Safir pe kethyü rajakhün hontse, lo tsü ge dun kebin gü le nripe temi hontse.

²⁷Lo tsügü joja le ben pe laso pe mah nyu ro kebin hontse. Lo tsü le ben pe aphu ben bin,

²⁸lo tsünyu zengo jvüja aphu bin. Keben tsügü le Npugü le kehü tsinshü.