Read Southern Rengma Naga EZEKIEL 10 Bible Online

EZEKIEL 10 - Southern Rengma Naga bible

EZEKIEL 10

¹Ale Cherub soki tsangneki tsü nrishü, lo tsü soki tsü Safir pe kethyü rajakhün hontse nme le bin.

²Sunggigü le linen phi ben kehü gü kazo, “Nyukhu dan hensin ki kerüpha janyu yüo mahgi kenhon pe nben sülo. Tson-o mahgi tsü pe nyida gü ge kezen shülo.” Ale a-le gü kethyü nri bin.

³A-le yü kethyü ka cherub le Kershvuka tesinzin sobin, lo khülukesü le a-nyuzin tsennu gü sü bin.

⁴Npugü keben gü tsü le cherub dan ge chwiryü lo ketu sen-o Kershvuka nyu keyütson ki güla. Tsüselo khülukesü le Kershvuka gü süla, lo tsennu tsügü nyu keben gü le ben shü.

⁵Cherub kenye khwen gü le tsennu ngwen gü ki-e nyülo. Tsü le Kekvutsin Sunggigü khwen hontse.

⁶Npugü le linen phi ben kehü gü no cherub dan ki kerüpha jaka mahgi kenhon peha khülo lo tse johokeshü ka, temi güle güo kerüpha nme khoka solo.

⁷Cherub nme le a-ben keto pe anyugun dan nyu mah le kebin bin nyu shüo mahgi peha khü pe temi linen pi keben gü ben nyu shü. Temi gü le mahgi khilo-o tinla.

⁸Cherub nmeme sekin hensin nyu temi ben hontse kethyü kebin ale hyu.

⁹Ale tsünyu kerüpha pezi le kebin ko hyu, aphu kenme, lo nmeme le cherub nmeme khoka bin, kerüpha dan tsü le tso minketsen hontse ben bin, lo tsü dan aphu kerüpha nme le nme kehüsü kü bin.

¹¹Cherub le nnu keshü ka rani mvutse lihikie gülo. Anyugun aphu kentsin -o rani mvu tse gükenyü denzin gü.

¹²Anyugun min, seren, ben, sekin lo kerüpha aphu yhütyü le sü.

¹³Kerüpha hidan hile ale tsemin kerigü ka kehyu kenme.

¹⁴Nmeme le a-mhun pezi zi, keri gü le methutse, kenyhun gü le temi, kenshen gü le shünyho lo pezi gü le logi mhun hontse.

¹⁵(Tsü dan tsü le ale Khebar züri khoka kehyu dan.) Nyukhu dan tsü le tsangneki soshü,

¹⁶lo nnushü, lo kerüpha dan-e tsü dan then. Anyugun le sikin sükhun shü, lo kerüpha dan-e anyugun then bin.

¹⁷Nyukhun dan le sunla lo kerüpha dan ko suntin la; lo nyukhu dan le nyelo, kerüpha dan le tsü dan then, nyukhu dan le tsü dan ketsen kehü genyu.

¹⁸Tsüselo Npugü kehü keben gü tsü le Kershvuka nyu keyütson tsü khelao nyukhun dan soki küla.

¹⁹Ale nribin nsen anyugun le nye sen-o kazü so küla, lo kerüpha dan le tsü dan then hü. Anyugun le Kershvuka khinrun nphozin ki tsü, sun gwa tinla, lo keben gü tsü le anyugun soki bin.

²⁰Ale Tsü dan kehyu le Khebar züri ki Israel Sunggigü hensin nyu nyukhu kehyu dan tsü le tse shalo.

²¹Anyugun nmeme le mhun pezi, sekin pezi, lo nmeme sekin hensin temi ben hontse kethyü le bin.

²²Anyugun mhun le Khebar züri nyu ale nyukhu kehyu mhun gwünzin. Nyukhu nmeme tse njüo gü.