Read Southern Rengma Naga EZEKIEL 11 Bible Online

EZEKIEL 11 - Southern Rengma Naga bible

EZEKIEL 11

¹Sunggigü kapu gü le azen-o Kershvuka khinrun nphozin gü. Tsünyu khinrun khoka ale temi nkio pvün lope Azzur nyugü Jaazaniah lo Benaiah nyugü Pelatiah senye sharhi hvu sin-o hyu.

²Sunggigü le aka zo, “Silakehü temi gü, temi hidan hile nyida higü nyu gwakemvu rhi, tsontsin zü kehü dan le.

³Anyugun le zo, ‘Agun le whütse ka dan thyüni tiso, Nyida gü le henla hontse, lo ngun le tsünyu thyü hontse le, ai tsü le mah nyu ngun nokhin shü hü.’

⁴Tsügenyu silakehü temi gü, anyugun keni lalo.”

⁵Npugü kapu gü le a ketsenlo, lo Npugü le ano jolo higü zoshü lotse shü: “Israel temi dan, hagun le nyu zo lo rhibin yo ale shabin.

⁶Hagun le nyida higü nyu temi chonritsin dushvu lao tsonda nyu simin le sü laso.

⁷“Tsügenyu, Aphu sokekvu Npugü a higü le hagun kazo bin nle. Nyida higü le henla ketsin, ai thyü gü le nyu la? Hagun le dushvu kenjü simin dan tsü le! Hagun le hinyu bin loho- ale nyida hinyu hagun khishwi lati!

⁸Hagun le zhethon nshvu hü le? Ale zhethon kepen temi zenryüo hagun wheti.

⁹Ale nyida nyu hagun khishwi lao pe sinrünyi nyu ben nyu shü lati. Ale hagun no sila titse laso.

¹⁰Hagun no hagun kazü hinyu terinyu si lati. Tsonlo temi aphu ale Npugü letse shati.

¹¹Nyida higü hile la le mahnyu thyü nokelo hontse hagun no loho. Ale hagun le Israel kazü lihika bin-e shaja pe tsüti.

¹²Hagun le ale Npugü letse sha loti, kechamvule hagun le hagun khoka kebin senye dan jvü zen kethyü nyu a tejvü gwünrho lo ajohokeshü zenmvu laso.”

¹³Ale sidyüjo zo nsen, Pelatiah le chetsü gü sila. Ale kazü nyu nkhünrün tsü gü nrao, “Kemvui, Aphu sokekvu Npugü! Nle Israel nyu nsen kenjü aphu boshvu titse bin le?”

¹⁴Npugü le aka zo.

¹⁵“Silakehü temi gü, Jerusalem nyu keyhun temi dan le nle lo npvünyu Israel nyu me kazü ki yhun kebin nyu rüla kerabin. Anyugun le zo, ‘Donyu me kazü ki yhun tinkela nyu le Npugü rüshvu titse kethyü le nithen sa laso. A-le ngun no kazü gü lo laso.’

¹⁶“Tsügenyu ale zokebin jo hi lope me kazü ki yhun tinkela npvünyu ka zoshü lo. Anyugun no nithen ki senye dan kazü ki yhunlo tse nishü kela gütsü le ale. Tson-e gwünkho keshanyu jaka we anyugun le gü kela kazü ki tsü anyugun zen bin ti.

¹⁷“Tsügenyu Aphu sokekvu Npugü a higü le zokebin hi lope anyugun ka zoshü lo. Ale anyugun hükezen shü kela kazü dan nyu anyugun kequen lo lati, lo Israel kazü khi nipe anyugun tsü lati.

¹⁸Anyugun le rani ryü lo, anyugun nshünkemvu lo kentsükenchen, teromen, anyugun le sen kehü dan khela ti.

¹⁹Ale nyun keshün lo kerüchün keshün pe anyugun tsü lati.

²⁰Tsonlo anyugun le ajvü dan then lo joketsin nyu a johokeshü dan zentin lati. Anyugun le a temi lo ale anyugun Sunggigü thyü ti.

²¹Ai ale nshünkemvu lo kentsükenchen teromen rüshvu nyü kehü dan shaja pe tsü lati. Anyugun le thyü keshü dan genyu shaja pe tsüti.” Aphu sokekvu Npugü le zo laso.

²²Cherubim le nyeso, lo kerüpha dan le tsü dan sithen gü. Israel Sunggigü kehü keben gü le anyugun ge bin.

²³Keben gü le nyida kheo kelu sen-o nphozin kazüthun ki gü la.

²⁴Tsemin ki tsü Npugü kapu gü le azen nigü Babilon nyu kazü ki shüla. Tsüselo tsemin gü le ndila,

²⁵lo ale Npugü le pe ahikeshü aphu pe me kazü ki kebin dan ka zo.