Read Southern Rengma Naga EZEKIEL 12 Bible Online

EZEKIEL 12 - Southern Rengma Naga bible

EZEKIEL 12

¹Npugü le aka zo,

²“Silakehü temi gü, nle me nren kehü temi dan nyu hü laso. Anyugun yhütyü we bin, ai thame hyu mvu; anyugun nyetin le bin, ai thakhwe tsemvu, anyugun le me nren kethyü genyu.

³“Tsügenyu silakehü temi gü, me ka a-keno fü gü kejü nyu khvü hontse phinlo-o tsangzün kemvu ka chwi lalo. Temi aphu no nle bin kecha ki tin kejü hyu shülo. Me nren kehü tsü dan le nsha-e logwa.

⁴Anyugun no ngwün gü nhyuo nle me kazü ki yhun tin kejü hontse n nri nrün genyu tsangben ketseka me kazü ki yhuntin nrün kanyü phinlo.

⁵Anyugun le nri kebin ka nka bon ka a-kü nme runphelo lo tsünyu nkanyü khilo.

⁶Anyugun no nle nkhvü pe nbu ge shülo nyhütyü sun-o kezün nyu diki güjü yo shamvu kebin hyulo. Nle thyü kebin tsü le Israel nyu genyu zensü nme thyü ti.”

⁷Ale Npugü le ano thyü lotse keshü hontse thyü. Tsü nyü ale me ka keno fü gü kejü nyu hontse akanyü phinlo, lo tsüje tsang le zün gü kejü ka, ale khvü pe abuthun ge shülo-o tinla.

⁸Tsüsi lonyü Npugü le a nthon.

⁹“Silakehü temi gü, Israel temi a nren kehü nyu dan le nle nyuthyü bin yo shün bin le,

¹⁰Aphu sokekvu Npugü a higü le zokebin jo hi lope anyugun ka zoshü lo. Jo higü le Jerusalem nyu kedagü lo tsünyu yhunkebin temi aphu genyu.

¹¹Anyugun ka nle thyü kebin tsü le anyugun ge thyü nrün zensü letse zoshü- anyugun le me ka keno fü kehü lo me kazü nyu yhun tin kela nyu thyüti.

¹²Anyugun so gon kebin gü tsüle kezün ki a-khvü pe a-bu ge shüo anyugun le a-genyu kabon ge a-kü runkenjü nyu tsü kebu chwi ti. A-le a-yhütyü sunlo-o diki gü jüyo sha loho.

¹³Ai ale a joh süren pe rün lati. Tson-o ale a-zen-o Babilon nyida ki gü, lo a-le tsü hyu mvuo tsünyu si lati.

¹⁴Ale a-hensin keda nyu, a-tsontsin kehü nyu, a-rikhun nyu aphu pe tson kechacha ki shü lati, lo temi dan le anyugun dushvula titse fü ti.

¹⁵“Ale anyugun kenjün pe senye kecha lo sinrünyi kazü dan ki shüla lo anyugun le ale Npugü letse sha loti.

¹⁶Ale anyugun temi kerho no teri, chenda, lo kehokenyü nyu nrho loti, tson-o anyugun le senye dan nyu bin=o anyugun tho dan tsü le kentsükenchen thyü la letse shalo lo ale Npugü letse sha loti.”

¹⁷Npugü le aka zo,

¹⁸“Silakehü temi gü, nle tyü kethyü ka ndünlo, lo nle tsü kethyü ka nshvuo nyhun lo.

¹⁹Senye apentha jolo higü hile Aphu sokekvu Npugü le pe Jerusalem lo temi anyugun kazü nyu yhun kebin nyu dan genyu letse zoshü lo: Anyugun le tha ketyü ka ndün ti, lo tsü kethyü ka nshvuo nyhun ti. Anyugun kazü no nrün lati, kechamvule tsü kebin nyu aphu tejvü nyu bin mvu laso.

²⁰Ntsoka temi le sü kebin nyida dan nkela lo kazü nnu lati. Tsüselo anyugun le ale Npugü letse sha loti.”

²¹Npugü le aka zo.

²²“Silakehü temi gü, nyuthyüo Israel temi le jokejvü higü zoni hüla: Gwünkho le gü la lo zokenjü dan tsüle thame pen mvula ole?

²³anyugun ka Aphu sokekvu Npugü a higü le tsü genyu nyu zo tiyo zoshü lo. Ale jokejvü tsügü no ndi lati. Israel dan nyu tsü zosin mvu lati. Tsü sunka hihontse anyugun ka zoshü lo, gwünkho le ryü laso, zokenjü dan tsüle ketsin ryü laso!

²⁴“Israel temi dan nyu tsemin keba nmvue me tsontsin zü kehü sidyüjo no bin sinmvu lati.

²⁵Aphu sokekvu Npugü a higü le anyugun ka zoti, lo ale zokeshü dan tsü le thyü pen lati. Thyü ntsü loho. A nren kehü nyu dan, hagun keyhun ka ale thyü titse zokenjü dan thyü lati. Ale zo laso,” Aphu sokekvu Npugü le zo.

²⁶Npugü le aka zo,

²⁷“Silakehü temi gü, Israel temi dan le nle tsemi kehyu lo sidyü kezo dan tsü le hisiki nithen ki rüla letse rüchün hü nle.

²⁸Tsügenyu anyugun ka Aphu sokekvu Npugü a higü le zobin letse zoshü. Ntsü sin loho. Ale zokela dan tsü pen lati. Aphu sokekvu Npugü a higü le zo laso!”