Read Southern Rengma Naga EZEKIEL 13 Bible Online

EZEKIEL 13 - Southern Rengma Naga bible

EZEKIEL 13

¹Npugü le aka zo,

²“Silakehü temi gü, Israel sidyükeshanyu le anyugun npvü anyugun sidyüjo pe zokehü dan nkhin shülo. Anyugun no Npugü jo nyü lotse zoshü lo.”

³Hile Aphu sokekvu Npugü zo: “Sidyükesha kepho dan we thyü lo tiso! Anyugun le anyugun npvü thu keyhun lo rüchün kelo tsemin dan zohü.

⁴Israel temi dan, hagun sidyükeshanyu le nyida kenke nyu yhun kehü lihie kemvu mesükerun hontse laso.

⁵Anyugun le chwida nla kela-e rikhun mvu, nmvue chwida khwen nimvu, tsügenyu Npugü jon nyü teri le keryü ka Israel nyu nolo kemvui so.

⁶Anyugun tsemin kenku, lo anyugun le ryü kejü zo kehü dan-e a-kemvu. Anyugun le ajo zohü letse hü nyo, ai ale anyugun nishü mvu. Tson yatse-e anyugun le kezo jodan tsü le thyü pen titse nrin hü nyo!

⁷Ale anyugun ka zo: Hagun tsemin kehyu dan tsü le kenku, lo zokenjü dan tsüe a-kemvu. Hagun le tsüdan tsü le ajo letse hü ,ai ale hagun ka zomvu!”

⁸Tsügenyu Aphu sokekvu Npugü le tsü dan ka zo, “Hagun jo dan le kenku lo hagun tsemin dan-e a-kemvu. Ale hagun ntsun bin nyo.

⁹Ale shaja pe hagun sidyükeshanyu ketsinkemvu tsemin lo ryü kejü rüla zope me tsontsin zü kehü tsü ti. Hagun no a temi dan le tha rhi titse kequen kelo ka tsü bin loho; hagun zan lope Israel temi zan kethu nyu kesin mvulati; hagun le hagun kazü nyu niryü mvu lati. Tsüsiki hagun le ale Aphu sokekvu Npugü letse sha loti.

¹⁰“Sidyükeshanyu le aphu gwa bin letse zo-o a temi tsontsin zühü. Aphu ketsin gwa bin mvu! A temi dan le tsophen pe chwida khwen, lo tsüsiki sidyükezonyu le ryüo kechon pe nye.

¹¹Sidyükeshanyu dan ka anyugun chwida le che güjüla sele tse zoshülo. Ale tsang no risa shüti. Tegwün che pe jon, lo terhi thyü pe tsü whün ti.

¹²Chwida le nla lati, lo temi aphu hagun ka kechon pe nye kethyü le dihontse gwa layo shün ti.”

¹³Hile Aphu sokekvu Npugü le hi zo, “A nyunkenta nyu tsangkenbu terhi, tsangri, lo tegwün no chwida nke lati.

¹⁴Anyugun le kechon pe nye kenjü tsü chwida boren lo kenyikho lao bin kezen tso no ndo lati tse nda bin. Tsü le nlao hagun jon shvu kü lati. Tsüselo temi aphu ale Npugü letse sha ti.

¹⁵“Chwida kekhwen lo kechon pe tsü nye keshü nyu le anyunkenta kekvu sha ti. Tsüselo ale chwida lo kechon pe nye kenjü-e nke laso tse zoshü ti-

¹⁶Tsü dan tsü le aphu gwa bin mvu-e aphu gwabin letse Jerusalem ka kezo sidyükesha dan.” Aphu sokekvu Npugü le zo laso.

¹⁷Npugü le zo, “Silakehü temi gü, ntemi dan nyu tenunyu ryü kejü rüla zo kehü dan nri shü. Anyugun nkhin shü.

¹⁸Lo Aphu sokekvu Npugü le anyugun ka zokebin jo pe zoshü lo: “Hagun tenunyu dan we thyü loso! Hagun le temi dan no kechanyu so kekvu bin lo nrün genyu jadu nyu bengun kekhin ri lo pekesun phi da hü nyo. Hagun le a temi dan ge kerhün lo kesi kekvu khilo-o pe hagun kechwi thyü titse hü nyo.

¹⁹Hagun le barley jenthün gwa lo tensü pon me ponhvu hyulo nrün genyu a temi dan mhundyü nyu arühvu mvu lahü. Hagun le sila kü kemvu boshvula, lo yhunlo kü kemvu temi no yhun hü nyo. Tsü hontseo hagun le a temi dan sao anyugun le hagun tenyen hü nyo.”

²⁰Higü hile Aphu sokekvu Npugü le zo, “Hagun le sen-o kerhün lo kesi kekhe titse kehü bengun kekhin tsü ale ntsü hü nyo. Ale hagun ben nyu tsü dan süthü pe shwen lao hagun le khin sen kehü a temi dan hoshü lati.

²¹Ale hagun mhun kesunphi dan süyhün lao a temi dan no hagun kekvu nyu bin mvu shü lati.Tsonlo hagun le ale Npugü letse sha ti.

²²“Hagun kenku genyu temi kegwa nyu, ale nthyüla nyü hü kemvu dan no shese lahü. Hagun le temi gwakemvu nyu no a-tho gwakemvu khekela khin-o anyugun kenishü hünyo.

²³Tsügenyu hagun tsemin kenku lo ryü kejü rüla zope me tsontsin zü kehü tsü le ndi so. Hagun no ale Npugü letse shalo nrün genyu ale hagun kekvu nyu a temi dan kenishwi shü bin nyo.”