Read Southern Rengma Naga EZEKIEL 14 Bible Online

EZEKIEL 14 - Southern Rengma Naga bible

EZEKIEL 14

¹Israel nyu sharhi peha le Npugü kenda ketso titse a nthon ryü.

²Tsüselo Npugü le a nthon.

³“Silakehü temi gü, temi hidan le anyugun nyun pe teromen tsü lao teromen no anyugun tsontsin zen-o kemu nyu gü la hü nyo. Anyugun we ale kenikeshü jo khipe anyugun tsü titse rüchün hü le?”

⁴“Tsügenyu Aphu sokekvu Npugü a higü le zo kebin jo hi lope anyugun ka zoshü lo: Israel temi a-nyun pe teromen tsüo tsüdan no a-tsontsin zen-o kemu nyu güla, tson-o ryü sidyükeshanyu nthon kehü nyu le aka kenikeshü jo hyu loti-kenikeshü jo tsü gü le teromen kechon le hyulo zü!

⁵Teromen tsü dan aphu genyu Israel nyu le a kipon rani tin laso, ai ajo gü genyu anyugun no jokezen nyu ryükelo nrin bin.

⁶“Tsügenyu, Israel temi ka Aphu sokekvu Npugü a higü le zo kebin hi lope zoshülo: Kentsükenchen teromen dan khelao rani ryülo.

⁷“Lihi gwünkho kae Israel temi nme nmvue Israel temi dan nyu yhun kebin sinrünyi nyu nme-e a kipon rani gü teromen rüshvu tinla, tson-o gü sidyükeshanyu nthon yatselo Npugü a higü le a jokenishü ti!

⁸Ale a-ntsun ti. Ale a-khipe tsinhi nme thyü ti. Ale a temi dan nyu a-khi lati, tson-o hagun le ale Npugü letse sha loti.

⁹“Sidyükeshanyu nmele mele sa pe kenku zola yatselo, tsü le Npugü a higü le a-sa kela genyu. Ale Israel temi dan nyu a-khi lati.

¹⁰Sidyükesha gü lo a-nthon kethyü güe shaja kenme hyu ti.

¹¹Israel temi no a khela nmvue anyugun kemu pe anyugun nrhu lalo kegwa nyu anyugun ntsenlo nrün genyu ale higü thyü ti. Anyugun le a temi lo ale anyugun Sunggigü thyü ti.” Aphu sokekvu Npugü ale zo laso.

¹²Npugü le aka zo,

¹³“Silakehü temi gü, tsipwen nme le muo aka joketsin sen mvulo, ale aben penso-o anyugun ketyüketsü khikeshü nke lati. Ale chenda nishüo temi lo senru metse nke lati.

¹⁴Noah, Daniel lo Job anyugun mishen nren tsünyu yhun bin yatse-e anyuugun kegwa le anyugun nti keni loti.” Aphu sokekvu Npugü le zo laso.

¹⁵“Nmvue ale tehen thyü nishüo temi tün-o kazü gü le nshvuo njwen gülo keshvu thyüla,

¹⁶lo temi hidan mishen le tsünyu yhun bin yatse-e anyugun le anyugun nyenyu dan-e keni loho- Aphu sokekvu Npugü, ale rhün kebin hontse. Anyugun le anyugun npvü anyugun keyhun kenilo lo kazü gü le temi le yhun kemvu bin thyü lati.

¹⁷“Nmvue ale teri zen ryüo kazü tsü ge shülo kenke terikanyü nishüo temi lo senru metse nkebu la,

¹⁸lo temi mishen dan tsü le tsünyu yhun bin yatse-e anyugun le anyugun npvü anyugun nyenyu dan-e kenilo ho, ai anyugun npvü anyugun keyhun keni loti. Aphu sokekvu Npugü, ale rhün kebin hontse.

¹⁹“Ale kenpen nme nipe kazü tsü nyu shü lo anyunkenta nyu temi lo senru keyhun kechon nke lao,

²⁰Noah, Daniel lo Job dan le tsünyu yhun bin yatse-e temi tsü dan le anyugun nyenyu dan-e keni loho. Anyugun kegwa le anyugun keyhun nti kenilo ti.“ Aphu sokekvu Npugü, ale rhün kebin hontse.”

²¹Hile Aphu sokekvu Npugü le zobin: “Ale shaja gwakemvu tsin pezi nipe Jerusalem ge shü ti- tsü le teri, chenda, tehenthyü, lo kehokenyü no temi lo senru metse nke lati.

²²Temi peha le rhün lo-o a-nyenyu kenilo yatselo, tsü dan le nki keryü ka anyugun nrishü. Anyugun le gwamvu pe dihontse yo nrishü, lo ale shaja zen-o Jerusalem ge ryü kejü tsü le tsonzü letse shatsentsü lo; ”

²³tsüsiki nle ale thyükeshü kon aphu gwa letse shati.” Aphu sokekvu Npugü le zo laso.