Read Southern Rengma Naga EZEKIEL 16 Bible Online

EZEKIEL 16 - Southern Rengma Naga bible

EZEKIEL 16

²“Silakehü temi gü, Jerusalem le kentsükenchen tho thyükela tsin pe hishü lo.

³Aphu sokekvu Npugü jo pe Jerusalem ka zolo. “Kanan kazü nyu nnyulo. Npvü le Amornyu, lo njvü le Hitnyu.

⁴N nnyukelo ka nme-e nhen ryü mvu nmvue zü pe nsü mvu nmvue tsi pe nnyen mvu nmvue phi pe nje shü mvu.

⁵Temi nme-e n njün ho tse tha hidan thyü nso mvu. Nkhipe phenchvünyu shwenla.

⁶“Tson-o ale nken gü laryü nle nzinyu yhon kebin hyu. Tezi le nje pfü bin, ai ale nno sila nyü mvula.

⁷Ale nthyü pe senbin kegwa hontse minlo. Nle min-o nko nkin lo thon pe lünyu nme thyülo. Nnyü no tsun chwiryülo, lo npehü le thonlo, ai nle nkenyhün lo nkenben.

⁸“Ale n nken nigü, lo nle keso keyhüdyü gwünkho le nkiryü kela hyu. Ale aminrün tesogü pe njelo lo nzen keso titse zoshwi shü. E, ale nzen-o sunkethyü kejoshü lo, lo nle ahon thyülo.” Aphu sokekvu Npugü le hi zoshü.

⁹“Tson-o ale zü pe nge tezi süla. Ale oliv ter ja pe n yün shü.

¹⁰Ale keshvu phi khipe n nben shü lo thyügi phaje kegwatsin, linen pe kephin nme lo silk pe minrün ketseyho keri nme tse pe ntsü.

¹¹Ale kontyü- pingin pe ntsü.

¹²Ale hikonkebün lo nye lo raja perün gwasa pe ntsü

¹³Nle suna lo rakagi ronye le bin, lo nle a-zintse linen lo silk pe kedo phi ben hü. Nle thoshe kegwatsin pe kethyü tensü tyü, lo khuzü lo oliv ter tyü. N kezegwa le ben, lo nle rajagi thyü la.

¹⁴Nle zegwa kethyü genyu senye aphu nyu nzan chwi,ale nthyü kezegwa sa keshü genyu.” Hile Aphu sokekvu Npugü le zo.

¹⁵“Ai nle nkezegwa lo zan kechwi süpvüo nka keryü nmeme tse zen zhü.

¹⁶Nle nphi peha pe nle rüshvu kehü bin dan nthyü, lo keyüla nyu hontse nkhi pe temi aphu tsü.

¹⁷Nle ale pe nketsü rakagi lo suna kontyü dan khilo-o tsü pe pechenyu men zülo-o tsü dan zen keyüla hü.

¹⁸Nle ale khipe nketsü keshvuphi tsü khilo-o pe teromen dan ge shü, lo nle oliv ter lo rünkenyi ale pe nketsü tsü pe teromen rüshvu.

¹⁹Ale chvü, thoshe kegwatsin, oliv ter, lo khuzü pe ntsü, ai nle tsüpe teromen kenyü thyü nrün genyu kerüshvu tho thyü.” Hile Aphu sokekvu Npugü le zo.

²⁰“Tsüsiki nnyu peche lo tenu nle nnyu pe aketsü dan lope kerüshvu thyü pe teromen dan tsü. Anyenyu khilo-o pe teromen rüshvu nmvue nle aka zoketsin zokemvu tsü le gwamvu mvu ola?

²¹

²²Nle keyüla nyuthyüo kentsükenchen nyu yhun ketse ka gwüngwa-e n nche ka nle nyhün lo nkenyu zinyu yhon kehü rüchün shü mvu.”

²³Aphu sokekvu Npugü le zo, “N we thyü loso! Thyü loso! Nle gwakemvu dan tsü aphu thyü, tson-o

²⁴tsonda aphu khoka teromen kershvubin thyü lo keyüla tho thyü.

²⁵Nle n kezegwa pe dyükenbe nyu thuphen la. Nle nkhipe tsü nyu keryü nyu aphu tsü, lo khenyütsen keyüla nyu nyeki-e shvu.

²⁶Nle nzen-o serikemvu thyü nyü kehü nkajon Ijipt nyu no nzen-o zhü ki güo nkeyüla tha thyü pe ano anyunta.

²⁷“Ale shaja pe ntsü titse lo a jochü njün tsü khilo la nrün genyu aben penso loso. Ale nkhipe Filistian nyu, nkeyüla tho genyu n ntsü lo n ntsun kehü nyu ben nyu shü laso.

²⁸“Nle kechanyu zen-o nkerünyu ndi kela genyu Assiria nyu then tinla. Nle anyugun zen-o keyüla kehü nyu, ai anyugun-e nkerünyun thyüshü mvu.

²⁹Nle Babilon, hathyü kehü senye gü zen-o keyüla kehügi, ai tsü dan-e nkerünyun thyü shü lomvu.”

³⁰Hile Aphu sokekvu Npugü le zobin nyo; “Nle kejokemvu keyüla nyu hontse hi aphu thyüla.

³¹Tsonda aphu nyu nle teromen kershvubin thyü lo keyüla tha thyü hü. Ai nle keyüla nyu kecha hontse pisa hü tinla mvu.

³²Nle nyeginyu le anyepvü so mvuo temi kecha zen keyüla tho thyü kela nyu hontse.

³³Me le tha pe keyüla nyu tsühü, ai n we jwe pe nsonyu aphu tsüo lihikie ryü nzenjü titse hü.

³⁴Nle keyüla nyu kecha shü kethyü nme. Temi nme-e nno tsonlo tse tenge mvu. Nle nchün lomvu; nle pe anyugun tsü. Ele, nle nkecha.”

³⁵Tsügenyu keyüla gi Jerusalem! Npugü ale zokebin nyülo!

³⁶Hile Aphu sokekvu Npugü le zo, “Nle nphi yhünla lo keyüla nyu hontse nkhipe nsonyu lo kentsükenchen teromen aphu tsü lo nle nnyenyu kechon dushvu pe teromen kerüshvu thyü.

³⁷Tsügenyu ale himhundyü ki nsonyu nkenyü kehü lo nle ntsü kehü aphu kequen shüti. Tsü dan zenryüo nhun pfülo lo ale nphi yhünlao anyugun no nkenyhün hyu ti.

³⁸Ale nkeyüla lo dukeshvu genyu n nmuti, lo anyunkenta lo nthün-o kesi lope n shaja thyü shüti.

³⁹Ale nkhipe anyugun kekvu nyu shü, lo tsü dan le nle keyüla lo teromen rüshvu kehü bin dan sürho lati. Anyugun le nphinya lo nkontyü dan sentin lao nno nkenben shü lati.

⁴⁰“Anyugun le temi danda thukeyhun-o tsope njon, lo anyugun le zhethon pe duthürü lati.

⁴¹Anyugun le nka dan rola lo tenunyu danda no nle shaja thyü kebin hyu ti. Ale nno keyüla, lo jwe pe nsonyu tsümvu lati.

⁴²Tsonlo anyunkenta ndilao, ale matse lati. Ale anyunta nmvue ayhüthyü bin loho.

⁴³N selo ka ale nge thyü keshü dan nle nmhin laso, lo ntho aphu nyu ano anyunta la. Tsügenyu ale nno tsü aphu tho. Nyuthyüo nle kentsükenchen tho kethyü nti mvule keyüla tho thyüsin hü nla?” Aphu sokekvu Npugü le zo.

⁴⁴Npugü le zo, “Jerusalem, temi dan le nrüla jokejvü hidan zoti, ‘A-nyu ko a-jvü hontse.’

⁴⁵Ketsin nle njvü nyugi le. A-le a-nyepvü lo a-nyenyu khela. Nle ntsagi dan hontse, tsü dan ale anyugun nyepvü lo a-nyenyu ntsü la. Nle lo ntsagi dan nyida dan jvü le Hitnyu lo anyugun pvü le Amor nyu.

⁴⁶“N tsagi le Samaria, a-le tesoki a-rünyi dan zen-o bin. Nsikezengi le tesinzin a-rünyi dan zen kebin Sodom.

⁴⁷Nle anyugun phanyu then lo anyugun kentsükenchen tho dan hontse tiya hü le? Nmvu, gwünkho keshanyu jaka hagun le hagun tho aphu nyu anyugun nyeki shvukvu laso.

⁴⁸“Aphu sokekvu Npugü le zo, Ale rhünkehü Sunggigü ketsin genyu, nsikezengi Sodom lo a-rünyi dan le ntho gwakemvu hontse thyü mvu.

⁴⁹A-le lo anyugi dan le ketyüketsü kechon le bin-o bwe lo rüyüo yhunkelo genyu ketekho hü, ai anyugun le rhokedyü nyu lo kendinyu nshwe n shwimvu.

⁵⁰Anyugun le ketekho lo nyun rüo ale ntsükehü dan thyü, tsügenyu ale anyugun nkela, nle tsü shasa bin.

⁵¹“Samaria le nle thyükela kemu ponha-e thyü mvu. Nle a-nyeki kentsükenchen thyü. N tho gwakemvu pe n sikezengi kendyü yatselo a-le mumvu.

⁵²Tsügenyu nle nkejokepvü nhen mvu loshvu. N tho dan le ntsagi tho nyeki gwamvuri kela genyu anyugun nri keshü we anyugun le mukemvu hontse le. Tsügenyu kejo-o nmhun nhon lo, n genyu ntsagi nri pe nshün kela genyu.”

⁵³Npugü le Jerusalem ka zo, “Ale au no gwakenye ni loti- Sodom lo a-rünyi dan lo Samaria lo a-rünyi dan. Ele, ale nko no gwakenye loti.

⁵⁴Nle n npvü ngenyu kejo lati, lo n kejokepvü rüchün keshü ka n sikezengi nyu dan we gwasa letse lati.

⁵⁵Au le gwakenye ni loti, lo nle lo n rünyi dan ko gwa ni loti.

⁵⁶Nle ketekho kehü gwünkho ka Sodom zo keyü thyü mvule

⁵⁷nle gwakemvu kethyü pe hishü kemvu ka? Ntsoka we nle a-hontseo Edom nyu, Filistian nyu lo n kajonyu kecha dan n kenrhinyu mhundyü nyu keyü kethyü nme thyü laso.

⁵⁸Nle nshün kemvu lo kentsükenchen tho thyü kela dan genyu kenjün thyü mvu loshvu.” Npugü le zo laso.

⁵⁹Aphu sokekvu Npugü le zo, “Nle pvüzü kebin hontse ale n ge thyüti, kechamvule nle zoshwikeshü pe lihi kemvu thyü lo kejozenkelo gü gwünrho la.

⁶⁰Ai a we n nche ka nzen kejozenkelo rühvu, lo kethonthen bin nrün nzen-o kejozen ti.

⁶¹Nle dihontse thyü layo rüchün loti, lo n tsagi lo n sikezengi zen nikeryü ka kejo lati. Tsü le ale nzen-o kejozenkelo nme kemvu, ai ale au no nnyugi hontse shüti.

⁶²Ale nzen-o kejozenkelo thyükeshün niti, lo nle ale Npugü letse sha loti.

⁶³Ale nle thyüzü kela dan aphu jüshü ti, ai nle tsü rüchün nikelo ka kejori lao nra mvu lati.” Aphu sokekvu Npugü le zo laso.