Read Southern Rengma Naga EZEKIEL 19 Bible Online

EZEKIEL 19 - Southern Rengma Naga bible

EZEKIEL 19

¹Sunggigü le ano Israel raja nyu mihvu genyu nyungwakemvu lü thyü shülo tse aka zo:

²Njvü le shünyho gi dihontse kethyü la! A-le shünyho peche rigwakemvu dan nyu a-nyu leyi.

³A-le a-nyu leyi lo thyü kehü jvü lope senthyü; a-le temi tenketyü nyu thyü la.

⁴Senye dan le a-rüla nyülo tson-o chwe nyu a-min lola. Anyugun le hükhuvü lope a-hüshwi pe Ijipt ki shüla.

⁵A-le khwen gun gü a-sidyü aphu ndila. Tsüselo a-le a-nyu kecha nme leyi ni, lo tsü gü le shünyho rigwakemvu nme thyüla.

⁶A-le kemin kho minkelo ka a-le shünyho kecha zen-o ho. A-ko thyü kehü jvü shalo lo temi tenketyü nyu thyü la.

⁷A-le chwida kenko dan boren, rünyi dan nke. A-le nho keshü tsen kazü tsünyu temi aphu kerü shvula.

⁸Senye dan le kequen-o a-zen kega titse; temi le lizin hizin ryü. Anyugun thyü kehü joh lo anyugun chwa nyu a-min la.

⁹Anyugun le a-khin khinla lo a-zen-o Babilon raja gü ki güla. Anyugun le a-khwenlo lao a-kenra no me no nyüni mvula. Israel rincho dan ki tsü.

¹⁰Njvü le vain ro pe rinyu nme khoka sen kenjü hontse. Tsünyu zü le kechon kebin genyu vain tsü le a-nyü lo a-sha le kesü thyü.

¹¹A-ro dan le nko, lo min-o rajathün thyü. Vain gü tsü le min kü gü nmhae tilo kegwa thyü; temi aphu tse tsü le a-nyü chon lo thon pe dihontse yo hyu.

¹²Ai nyunkenta ben le tsü men phü la lo tsüshwen pe kazü nyu shüla. Npho tsangkenbu le a-sha whün nsin la. A-ro dan bose la; tsü dan le silao pe rola.

¹³Lo tsü lope kazü kesi nyu sen ni, kesin lo zü kendi kazü nyu.

¹⁴Vain bin gü tsü mah le ro lola; mah le a-ro dan lo a-sha-e rola. A-ro dan le thame nko loho, lo rajanyu thün thyü loho. Hile nyungwakemvu lü, tsü thyü nini hü.