Read Southern Rengma Naga EZEKIEL 2 Bible Online

EZEKIEL 2 - Southern Rengma Naga bible

EZEKIEL 2

¹Ale tsü hyu ntsin nkhün-o kazü nyu che tsüla. Tsüselo ale thakhwen nme nyükelo le, “Silakehü temi gü, solo, ale nzen kenthon nyü bin nyo.”

²Thakhwen gü le zokebin ka, Sunggigü kapu gü le anyun yüryüo apenso shü, lo ale thakhwen gü le zokebin nyü bin,

³“Silakehü temigü, ale nnipe Israel temi dan ki shüti tse bin nyo. Anyugun le a nren lo ranio a ntsun lo anyugun bon nyu le a nren kethyü hontse ntsokae tson bin.

⁴Anyugun nyun le rü lo a rühvu hü mvu, tsügenyu ale nnipe Aphu sokekvu Npugü a higü le anyugun ka zo titse kebin jolo pe zoshüti.

⁵A nren kehü nyu le nkhwenyü-e nmvue, anyugun le sidyükeshanyu nme le anyugun dan nyu bin laso tse kethyü sha loti.

⁶“Ai silakehü temi gü, n we anyugun nshvu nya anyugun le lihi zoe. Anyugun le n nshwen lo nsüjün mvu ti; lo tsü le zukeshonnyu dan nyu keyhun hontse ti. Tson-e n nren kehü nyu nshvu nmvue anyugun genyu nnyun nkhi nya.

⁷Anyugun le nyüe nmvue, nle ale nno zolo tse keshü zoti.Anyugun le dihontse me nren hüyo shalo.

⁸“Silakehü temi gü, ale nka zokebin gü nyülo. Tsü dan hontse a nren ya. Nmün kvuo ale pe ntsüti tse kebin gü tyülo.”

⁹Ben nme keto pe akipon shükebin ale hyu, lo tsügü le kethusü nme senbin.

¹⁰Ben gü le kethusü gü shwüshü, lo lizin hizin thu kenjü ale hyu- tsünyu nyun gwakemvu, kechü lo nyunkenjün kethyü thu njü.