Read Southern Rengma Naga EZEKIEL 20 Bible Online

EZEKIEL 20 - Southern Rengma Naga bible

EZEKIEL 20

¹Tsü le agun le dothyü gü kethyü chen tsenyü ka shyepvün gü jonryü nyü. Israel nyu donyu sharhi peha le a kiryüo Npugü kendo shün, lo anyugun le a mhundyü ka dun bin.

²Tsüselo Npugü le a nthon.

³“Silakehü temi gü, temi hidan nthon shüo Aphu sokekvu Npugü le zokebin pe anyugun ka zolo: Hagun le a kendo shün titse ryü bin nle? Ale rhünkehü Sunggigü ketsin genyu ale hagun no aka thame shün loho. Aphu sokekvu Npugü a higü le zo laso.

⁴“Silakehü temi gü, nle anyugun jünkera titse bin le? Tsonlo thyülo. Anyugun bon nyu le kentsükenchen tho kethyü pe anyugun ka zoni shü.

⁵Ale zokebin gü pe anyugun ka zolo. Ale Israel kejükelo ka ale anyugun no keswe nme thyü. Ale Ijipt nyu a khipe anyugun kishüo anyugun ka zo: Ale Npugü hagun Sunggigü.

⁶Tsü kitsü ale Ijipt nyu anyugun zenchwi ryü, lo anyugun zen-o ale anyugun genyu kejükelo kenya lo kazü kegwa, kazü aphu nyu kegwatsin gü nyu shü titse swe.

⁷Ale anyugun no sokehü teromen kentsükenchen dan pe shwenla, lo Ijipt tero kenku dan tsü no anyugun thyü nrhu nya lotse zo, ale anyugun Npugü Sunggigü genyu.

⁸Ai anyugun le a sü mvu lo a khwenyü mvula. Anyugun le teromen kentsükenchen dan pe shwenla mvu, nmvue Ijipt nyu tero khela mvu. Ale Ijipt nyu tsü anyugun no anyunkenta kekvu shalo titse ndala.

⁹Ai ale tson mvula, tson yatselo azen kecha lalo keshvu genyu, kechamvule anyugun le zen-o yhun kebin temidan le kebin ka ale Ijipt nyu Israel nyuzen chwila titse zoshü laso.

¹⁰“Tsügenyu ale Ijipt nyu anyugun zenchwi gü kazü kesi ki shü.

¹¹Ale lihigüe thenlo yatselo kerhün hyulo kehü a johokeshü pe anyugun tsü lo a jvü pe anyugun senthyü.

¹²Anyugun no Npugü a higü le anyugun thyü kenshün hü letse shanilo nrün genyu ale Sabbath then kelo tsü lope agun jaka zensü nme thyülo.

¹³Ai kazü kesi ki-e anyugun le a sü mvu hü. Anyugun le temi lihigüe thenlo lo kerhün hyulo kehü a tejvü gwünrho lo a johokeshü kenila. Anyugun le Sabbath gü bo nrhu shüla. Ale kazü kesi nyu tsü anyugun no anyunkenta sha lo anyugun nkela titse ndala.

¹⁴Ai ale tson mvula, kechamvule tsü ale Ijipt nyu Israel nyu zenchwi kela kehyu senye dan dan nyu azan kechala lo keshvu genyu.

¹⁵Tsügenyu kazü kesi nyu tsü ale anyugun zen-o ale pe anyugun ketsü kenya lo kazü kegwa, lo kazü aphu dan nyu kegwatsin nyu tsü gü mvu letse keswe thyüla.

¹⁶Ale keswe thyüla, anyugun le a johokeshü kenila, a tejvü gwünrho, lo Sabbath bo nrhulao anyugun teromen dan rüshvu nyü kvu kela genyu.

¹⁷“Ai ale anyugun njün hola. Ale kazü kesi nyu tsü anyugun boshvu mvu letse rhilo.

¹⁸Tsü sunka ale anyugun dan nyu selo dan zen shü: Hagun bon nyu le thyükelo tejvü dan then nya; anyugun jvü dan then nya nmvue anyu teromen no hagun nrhu nya.

¹⁹Ale Npugü hagun Sunggigü. A tejvü dan lo a johokeshü dan zenlo.

²⁰Sabbath pe jon kenshün nme thyülo, tsonlo tsü le ngun le thyükelo kejopenkelo zensü thyü loti, lo ale Npugü hagun Sunggigü letse shani loti.

²¹“Ai shenhe tsü güe a sü mvula. Anyugun le lihigüe then lo yatselo kerhün hyulo kehü a tejvü gwünrho lo a johokeshü dan zen mvula. Anyugun le Sabbath bo nrhula. Ale tsünyu kazü kesi nyu tsü anyugun no anyunkenta kekvu sha lo anyugun boshvula titse ndala.

²²Ai ale tson mvula. Tsü le Ijipt nyu Israel nyu zenchwi keryü kehyu senye dan nyu azan kechen lalo keshvu genyu.

²³Tsügenyu ale kazü kesi nyu tsü keswe kecha thyüni. Ale anyugun kenjün pe kazü aphu nyu shüla titse swela.

²⁴Ale tsü thyü kechamvule anyugun le a johokeshü keni, a tejvü gwünrho, Sabbath bo nrhu, lo anyugun bon nyu le lothyü keryü teromen rüshvu.

²⁵“Tsüselo ale tejvü gwakemvu lo kerhün pe tsülo kemvu johokeshü pe anyugun tsü.

²⁶Ale anyugun no anyugun tha kerüshvu lope anyugun gwün nrhu, lo anyugun nyuri lope kerüshvu thyü. Tsü gü tsü le shaja pe anyugun tsüo ale Npugü letse pe hishü nrün genyu.

²⁷“Tsügenyu silakehü temi gü, Israel nyu dan ka Aphu sokekvu Npugü a higü le zokebin hi lope zoshülo. Anyugun bon nyu le a nshwen kethyü kon kecha nme le jozen kemvu.

²⁸Ale anyugun zenryüo anyugun tsü titse zo kenjü kazü nyu shü. Anyugun le rincho ketetso lo senbin kenjvü dan hyu kethyü ka anyugun kerüshvu thyü pe tsü dan aphu ka shü. Anyugun le rope kerüshvu lo zu pe kerüshvu genyu ano anyunta.

²⁹Ale anyugun ka shün: Hagun le gü kehü bin ketetso dan tsü le nyu la? tsü gerho tsü dan lope ‘Binketetso dan’ letse ko tinla.

³⁰Tsügenyu Israel nyu ka Aphu sokekvu Npugü a higü le zokebin hi pe zoshülo. Nyugenyu hagun le hagun bon nyu kemu hontse thy:ulo tsü dan teromen then bin mvulo shvula?

³¹N thu hi hagun le jwe lope shü lo hagun nyenyu pe mah nyu tsü rüshvuo teromen tsü gü lope hagun bo nrhu hü. Tson la-e hagun Israel nyu le ryüo akenda gü le nyu yo shün hü! Aphu sokekvu Npugü a higü le rhün kehü ketsin Sunggigü genyu, ale hagun no aka thame shün loho.

³²Hagun le senye kecha hontse, kazü kecha ki yhun lo senbin lo tso dan rüshvu kehü temi dan hontse nyüo hagun nyunki rüchün loso. Ai tsü hontse loho.

³³“Ale Aphu sokekvu Npugü, rhünzin kehü Sunggigü genyu, ale anyunkenta nyu kekvu nme, akekvu aphu sen-o hagun so gon titse zoshü bin.

³⁴Hagun le tin kezen kela tsipwen dan ka ale hagun kho kequen kelo ka akekvu lo anyunkenta pe hagun hishü ti.

³⁵Ale hagun zenryüo ‘Senye kazü kesi’ gü nyu shü, lo tsünyu ale mhuntsun hagun nkhin shüti.

³⁶Ale Sinai kazü kesi ki hagun bon nyu nkhin keshü hontse hagun nkhin shüti.” Aphu sokekvu Npugü le zo.

³⁷“Ale hagun ntsen tsekho lo lao hagun thyü pe azen kejopenkelo zen loti.

³⁸Ale hagun dan nyu me ronlo kemvu lo kemu nyu dan khi lati. Ntsoka anyugun le yhun kebin bin nyu tsü anyugun khishwi lati, ai ale anyugun no Israel kazü nyu niryü loho. Tsüsiki ale Npugü letse hagun le sha loti.”

³⁹Aphu sokekvu Npugü le zo, “Hagun Israel nyu aphu ntsoka we hagun kenyülo! Güo hagun teromen dan lothyülo! Ai ale hagun zen shübin, siki we hagun le a jozen tiso lo jwe khipe tsüo azan keshün gü rühvu kemvu thyü mvu lati.

⁴⁰Kazü tsü gü nyu a kazüthun kenshün Israel kazüthun ketetso gü ge hagun Israel temi aphu a rüshvu ti. Ale hagun ge akenyü lo hagun no kerüshvu, hagun tha hokeshü kegwatsin dan, lo jwe kenshün dan sen keryü nrin ti.

⁴¹Ale hagun le kezen tin kela tsipwen dan ka hagun zenchwi ryü lo hagun kequen kelo ka ale hagun le kerüshvu tho ro keshü dan tsü loti, lo senye dan le ale nshün letse hyu ti.

⁴²Ale hagun zen-o kazü ale pe hagun bon nyu tsüti tse zo kenjü gü nyu niryülo selo hagun le ale Npugü letse shati.

⁴³Tsüsika hagun le kejokepvü tho thyü lo dihontse hagun nrhula yo rüchün ni loti. Hagun le gwakemvu aphu thyü kela genyu hagun npvü hagun ntsü lati.

⁴⁴Ale a kerühvu no bin titse solo hagun Israel nyu le ale Npugü letse shati, kechamvule ale hagun serikemvu lo hagun tho gwakemvu dan hyulo kezü dan pe hagun ge shü kemvu genyu.” Aphu sokekvu Npugü le zo laso.

⁴⁵Npugü le aka zo,

⁴⁶“Silakehü temi gü, Tesinzin nrishü. Tesin gü nkhin-o zoshü lo sidyüjo zope tesin gü chün nkhin lo.

⁴⁷Tesin gü chün no Aphu sokekvu Npugü le zokebin nyü lotse shülo: Nrishü! Ale mah thyüshü bin, lo tsü le chün nyu kebin senbin kerhün lo kesi-e ro lati.thame tsü bokenmhüla loho. Tsü le tesinzin kezen sen-o tesoki nsin, lo aphu tse mah kenyü kenyen gü shati.

⁴⁸Anyugun le Npugü a higü le tsü roshü lo temi nme-e tsü bokenmhülo kemvu hyu loti.”

⁴⁹Ai ale tsü kenio, “Aphu sokekvu Npugü, ano tsü thyü nyata! Temi aphu ale a-zintse jokejvü nyu tha zohü letse kenya bin laso.”